倉鼠問題~~~唔該幫幫手

A.女鼠發情期係會背向天,身體較扁平,尾向天;男鼠發情體味會較強烈,因為係用體味唻求偶(平時都會比女鼠大味,但發情時會特別強烈),而發情時睪丸會漲大
鼠鼠發情期大約係4-5日,其中既4-12小時,多數都會在較夜較活躍時發情


B.如果被食既鼠有病or死左太耐,就有機會患病



C.倉鼠係獨居動物,根本唔適合同其他鼠一齊住,就算佢地會交配,就算好似相處得好好,亦易會打交or因壓力而生病,分唔分開過亦會有呢d問題

我明白坊間同鼠店都話倉鼠係群居,但從生物學角度,鼠鼠真係獨居架,只係多數鼠細個都唔打交,所以就易令人有錯覺,又有好多人話鼠打交只係玩,甚至話係增進感情,好彩就打唔傷,但留意一下過去既知識,就見到有不少鼠打傷打死

我細個時試過一籠放兩兄弟,個籠好大,有2間屋仔,2個瞭望台,好多野都有兩樣,都一樣打到頭都甩,就算係再大既籠,同性唔同性,係咪同一胎,其實都會打既;沖完涼再放埋一齊既方法我都試過好多次,一樣打得好勁


請問點解想繁殖鼠鼠呢?有冇了解過繁殖鼠鼠既過程同後果?
如果不斷繁殖,唔洗好耐可以繁殖出過百隻鼠,只係繁殖一次亦可能兩隻變十幾隻鼠,有冇諗過點處理?鼠鼠唔可以一家大細一齊住,鼠b之間亦易打交or因壓力而生病,有冇足夠既地方時間金錢同心機去解決呢d問題?實在有好多人不斷繁殖不斷遺棄,鼠鼠會好慘,人亦會好煩惱,一定要好好考慮先得


其實鼠鼠最好分籠,繁殖鼠鼠會有好多問題,希望你可以考慮唔好繁殖鼠鼠,我自己一籠一鼠左好耐,鼠鼠身體都好D,唔會被打,又少受驚,我既鼠多數都係老死OR年老腫瘤而死(當然配合返唔亂食野,同適當地對鼠鼠啦),建議分籠原因如下:

1)倉鼠天生根本就係獨居動物,根本唔適合群居,就算兄弟姊妹,同性別or唔同性別,都一樣可以打到死晒.睇書知道,外國既鼠鼠繁殖場都係一籠放一隻鼠,到發情期先放埋一齊一陣既
2)鼠鼠既繁殖速度好快,而且繁殖鼠鼠有好多問題(例如鼠媽媽有機會會食bb,bb未戒奶就打交但又唔分開得),就算樣樣都解決到,都會令鼠鼠既生活質素下降,鼠媽媽生育後壽命又會縮短(甚至難產),好多隻鼠又會有第d問題,所以真係唔好俾鼠鼠生bb呢

3)可能你會話鼠店既鼠咁多隻一齊都冇事,但鼠店既鼠仲好細,所以唔會打得好犀利,而且你睇到鼠店既鼠既時間都未到深夜,唔係鼠鼠最活躍既時候,所以未必俾你見到有咩問題.但我曾經見過,鼠店一堆鼠入面,有隻鼠已經得返d白骨...所以鼠店講既野,,唔好盡信,鼠店有鼠死左都唔會俾客人知呢
4) 就算兩隻鼠初初唔打交,其實之後都好易再打,特別係鼠鼠夜晚活動既多,半夜打起上唻,你又唔知既時候,仲危險.我細個既時候都試過覺得2隻鼠好似好fd咁放埋一齊,同一胎,我出去一陣返唻就打死晒啦
5)就算唔打傷打死,都會感到壓力,壓力會誘發甩毛肚瀉等疾病
6)一籠唔止一鼠,仲會較惡,特別易咬人同比較難同主人熟
7)可能會諗鼠鼠會怕悶,但其實鼠鼠天生獨來獨往,只要有足夠既空間同運動(一個轉輪都ok啦),鼠鼠就唔會悶
8)生b到戒奶分籠都唔可以掂鼠b,到掂得時,其實已經同鼠店買到既鼠差唔多大,咁又何必自行繁殖?期間仲要唔洗得籠臭一排,又可能會見到食b既情況


D.你既鼠食開咩糧呢?如果食開一隻又冇咩問題既話就唔建議轉糧,轉糧易令鼠鼠腸胃不適,真係要轉既話最好可以混d新同舊既食下先,慢慢再完全取代,而轉糧後要加緊留意鼠鼠既排泄物有冇異常,有咩事就盡快處理


Prestige糧係比較出名好既,易買,但較大粒,不過我就覺得大粒冇咩問題,細品種既鼠都一樣可以食,鼠鼠一樣食到,好似草磚咁,大舊咁多鼠鼠一樣照食,咬多D順道磨下牙
而我自己既鼠食開日本牌子MARUKAN 橙色袋MR-115,雖然好多人都唔喜歡日本鼠糧,覺得會較肥,而呢隻糧都真係較多瓜子,不過我就完全唔會俾鼠鼠食雜食,所以就冇過肥既問題,而鼠鼠都好健康,所以就一直用左好耐都冇轉,同時覺得食呢隻之後排泄物冇咁臭
水果糧就麻麻地,較易變質,海鮮糧則唔建議用


揀左主糧亦要唔亂食野先健康,俾鼠鼠食既野要留意既事詳細可參考:
http://hk.knowledge.yahoo.com/question?qid=7009080600917