我前世到底種左咩因，我今世條命會咁？欠左Ｄ咩福慧呢？

我今年只係１９歲。

講家庭先，我自覺得父母對我都比較冷淡。

如果我見到Ｄ可怕的昆蟲，呀爸未必會幫我手，要幫都唔會好著緊咁即刻郁手。

呀媽佢個人由細到大都俾好大壓力我，又唔多肯幫我。
例如我三年級俾同班同學杯，我寫周記同先生講，佢見到，但係佢會話我抵死，因為我平時好夜先做功課。有次唔見荷包又係，佢又話我抵死，雖然最後佢都有幫我手搵。

佢對我催谷得好勁，細個英文默書低分佢可以唱好多年。
又例如佢想我９歲獨立，洗左機衫叫我晾，我唔中意晾，幾日後Ｄ衫臭曬。我晾衫晾得密得滯又俾佢話，但係佢都冇教過我。

佢又好唔信我，例如我去舅父家過夜，佢會怕我同表哥發生關係（表哥同我都係正人君子）。又唔準我餓親半夜瞓唔著落去ＯＫ買野食。

總而言之，我呀媽同我的交流有９成時間都係責駡...而且根本好多野我同屋企人睇法都唔同，點解會咁？我係唔係前世欠左我呀媽好多？


講埋人際，我讀書好多年都有俾人杯。
５，６年級因為咀邊生瘡而俾人杯，傳簿會唔傳我個位。
中學除左四五兩年之外都同同班同學交往不來（又或者可以話俾人杯），但係起班出面都有朋友。
起中六之前冇識到真心朋友，Ｄ朋友起學校會一齊來往，但係大家都有保留。

學業因為環境關係（被杯＋ＭＡＭＡ睇唔起我讀中中），成續唔標青。
但係我係有腦筋的，只係發揮唔到。
我好有心機讀的英文科只係取得ＤＤＥＥ的成績，相反有人不學無術取得比我好的成績。（唔係我妄斷，佢真係連silent呢個字都唔識，我就隔日睇ＳＣＭＰ）

我今年重讀緊中七，我好執著，呢Ｄ心結仲係糾纏住我唔放，我瞓唔著就會諗起人地對我點衰點衰。
係前排識左個新朋友講起因果呢個理論，我個心先好過Ｄ，而且近日都有意接觸佛學。
有冇有緣人可以解下我的疑惑，係唔係我前世做左壞事，傷左好多人的心，我前半世得到的愛先咁淺呢？
而且實力又幾常發揮唔到（可能關心理事ＬＡ，又八字曾批我食傷太深，但正格勢弱，以致樣就聰明但讀書唔叻），我前世到底欠左Ｄ咩，我今世先會咁呀？
我需要要修番Ｄ咩福報呢？