✔ 最佳答案
據小弟之見，一戰及二戰均不可避免。原因好簡單，因為無論德意志帝國及納粹德國既國策都係擴張性，德皇威廉二世同希特勒都係極端好戰份子，佢地無可能唔打仗。但二戰比一戰更不可避免，因為希特勒擺明車馬要消滅英俄，亦即係肯定拉埋美、法落水(因為呢兩個國家無可能比英國孤軍作戰)，咁即係話納粹德國自己迫自己一定要同英、美、法、俄四大強國全面開戰。
其實對於二戰有一個常見既誤解，就係好多人都以為德、意、日三國係夾定計侵略全世界，呢個絕對唔係事實。雖然納粹德國及法西斯意大利既關係比較密切，但兩國都分別獨立打自己既戰爭，正如意大利打阿比西尼亞(現時既埃塞俄比亞)德國就無幫手，意大利係北非同英國打既時候德國亦無第一時間幫手，只係1941年時意大利係北非瀕臨崩潰，希特勒先至派隆美爾帶兩、三個師係咁倚幫下手。日本於1937年全面侵略中國，當時納粹同軍國日本完全唔係盟友，納粹德國甚至係開戰前幾年及戰爭中賣唔少武器及派出好多軍事顧問到中國，日本同德國結盟只係為左令德國唔好再提供武器比中國，結盟後德日之間全無合作。最有趣係當德蘇兩國打到你死我活時，日本完全無唸過入侵蘇聯，可想而知既呢兩個國家既所謂“結盟”係幾咁兒戲。
2009-11-01 18:41:46 補充：
樓主既補充問題極為有趣，坦白講，小弟無法肯定希特勒上台是否不可避免。雖然威瑪德國管治差，人民求變心切，仇外情緒嚴重，但呢啲都唔係納粹黨上台既充份條件。要知道納粹黨一開始時係一個小政黨，雖然發展好快，但1923年啤酒館暴動失敗後已經証明納粹黨並非所有德國人都接受，至少國防軍就從來無接受過納粹，直至戰爭結束時都一樣。小弟對當時德國既情況只有一個模糊既印象，我唸當時其實係有好多好似納粹既激進政黨係度爭取人民支持，只係納粹係當中最成功嗰個。所以納粹能夠上台某程度上係佢地好彩，係啤酒館暴動後10年都無一個可以威脅到納粹壯大既危機及政黨，於是好戲劇性咁令呢個激進得出奇既政黨都可以掌權。
2009-11-02 21:56:12 補充：
好難講如果無納粹黨德國會唔會發起戰爭。因為凡爾賽和約對德國真係太嚴苛，呢個情況令極端民族主義政黨非常容易得到人民支持，就算納粹無上台，其他類似既政黨都會執政。講件有趣既事，係希特勒上台之前，威瑪共和國既總理選舉由興登堡及魯登道夫呢兩師徒競爭。就係呢兩條友係1918年迫德國走上總崩潰既不歸路，但興登堡仍高票當選，而魯登道夫僅輸個馬鼻，兩人得票都有幾百萬。
2009-11-02 21:56:18 補充：
魯登道夫即使曾令德國徹底崩潰，但佢去到邊都係咁受歡迎，而佢對納粹既支持係呢個小黨能夠上位既重要原因之一。可見當時普遍既德國人不僅不以窮兵黷武既德意志帝國為恥，而且更極度仇外，所以即使納粹無上台，威瑪德國最終都會變成一個類似法西斯意大利既國家，只係唔知呢個國家有無能力發動世界大戰。
