日本大和號vs美國馬漢級

100兄呢個問題非常有趣，佢有趣在唔單止兩種軍艦體積及火力懸殊，而且事實上當年真係發生過類似既事，所以我可以慢慢講下故仔。

首先，小弟其實唔知馬漢級驅逐艦係咩黎，就當佢係一級普通既二戰驅逐艦。不過，唔好以為大和號噸位大，火力猛就特別好打，其實佢係大而無當既代表。當年既日本海軍雖然好優秀，軍艦性能亦不錯，但佢地全部都有一個問題，就係缺乏當時最先進最前沿既戰備。最好既例子係日本海軍所有艦艇，包括最精銳既大和、武藏等戰艦，連最基本既雷達都無，但美軍戰艦一般都有雷達。美軍潛艇唔單止有雷達，甚至有幫助射擊官預計魚雷彈道既彈達計算機！而彈道計算機即係電腦既前身！呢啲咁先進既設備，日本海軍就係無。所以日本當年面對既係一個係規模同先進程度都遠遠優勝既對手，咁點有得打﹖

講番100兄講嗰個case，唔好以為大和號好勁，佢打出既炮彈絕少擊中目標，面對驅逐艦呢樣細小又靈活既對手，擊中既機會幾近於零。反而美國既驅逐艦一定有雷達，咁佢地就可以先發制人發射魚雷，尤其係夜晚既時候，呢幾隻驅逐艦會佔到唔少優勢。

唔好睇少驅逐艦既戰力，雷伊泰(Leyette)灣海戰打到最緊要關頭就同100兄講既情況好相似。當時由日本海軍中將栗田帶領既主力艦正撲向係雷伊泰島登陸緊既美國第七艦隊，而負責保護第七艦隊既只有一個由驅逐艦組小艦隊。栗田艦隊既旗艦就係大和號，佢仲有幾艘巡洋艦及驅逐艦保護。點知嗰隊美軍驅逐艦先發制人，向日艦發動攻擊，一艘日本既巡洋艦，重達18,000噸既鳥海號(Chokai)被擊中而要退出戰鬥，跟住又有幾艘戰都係被擊中。美國海航已經擊沉左武藏號，栗田唔想無埋大和號，所以退出戰鬥。

另外，係戰爭就黎完結時，本來係第3隻大和級戰艦，後來被改裝成航母既信儂號出港去接收船員。信儂號排水量超過70,000噸，係世界第一隻核動力航母企業號(CVN-65，Enterprise)服役前，信儂號係有史以來最大既航母。但佢一出港就比只有2,000幾噸既美軍潛艇射水魚(Archer-Fish)號連中3發魚雷擊沉。當時信儂號既無飛機潛艇護航，當然亦無雷達，但射水魚號唔單止有雷達，仲要有上述既彈道計算機，而當時係夜晚，所以射水魚號可係信儂號完全唔察覺既情況下慢慢跟蹤信儂號並將佢擊沉。

所以如果100兄提到嗰3隻驅逐艦既艦長戰技高超又大膽，再加上少少運氣，小弟絕對相信佢地一定可以重創大和號，甚至將佢擊沉，而除非呢三隻驅逐艦傻左駛到勁近，大和號自己根本無咩對付呢啲驅逐艦既可能。