初行山者去邊行好?

我而家就介紹你我初初行山既三,四條路線吧,之後你就要自己摸索喇,

一.甲龍~川龍
果日我就大頭蝦,搭51號去到甲龍先落車,之後沿荃錦公路上返去,過扶輪公園,落扶輪公園自然教育徑至川龍,再步行回荃灣歸程.

*你可以乘51至郊野公園站,省卻甲龍至郊野公園站之悶途
**步行時間:1小時內 (扶輪公園至川龍)
***交通資料:在如心廣場乘51號巴士至郊野公園站($7.8),回程就搭80號小巴回兆和街($4.5)

本人評此為不值得特別去行既路線

二.黃大仙至紅梅谷
由黃大仙港鐵站e出口出發,沿沙田坳道之大長斜上,至法藏寺後繼續上,最後便會見到獅子亭,再步行數步便見麥里浩徑第五段,沿路入,初為樓梯,享有市區美景,至m102左右,就會入返山腰,沿山腰走,不久便見登獅子山頂之路,可沿路進(個指示牌係嚇人的,不過d樓梯又真係幾嚇人,好長..)至回歸亭後,往望夫石方向走,不久便見沙田,而旁有一大石,此正為望夫石,繼續沿路落,橫過引水道,再落便是紅梅谷燒烤場,可轉右落去世界花園乘巴士離開,或沿指示返回大圍站

*你可以選擇乘18號小巴,代替港鐵站至法藏寺之悶途
**步行時間:2~4小時(因應體力而定)
***有捷徑可以代替法藏寺與沙田坳之間的車路,是為慈雲山北巴士站後的石屎路,沿路進,不久左方有路,雖然你可能覺得呢條唔似正規路,但係岩的.

本人評此為新手試腳路線

三.東涌至昂平
由東涌a出口出發,過富東邨,沿單車徑走,不久右方有一隧道,沿路盡,一直直行,上天橋等,入侯王廟路口,之後一直都係石屎路,過左兩間屋企之後,左方有條睇唔到頂既樓梯,沿路一直走,要走1500級樓梯,至3號轉向站後,接入木棧道,上上落落,上上落落,既可以望到機場,又可以同頭頂既遊客揮手,十分寫意,唯體力需求較大.步行2~4小時,便至昂平

*回程方法:1.乘23號巴士回程(平日$19,假日$27),2.步行至昂平奇趣徑,至尾後,會見到東山法門,沿路走半~兩小時,便至石門甲,向停車場方向走,有一牌坊,為石門甲村之類既野,沿路進,有指示可以出返東涌道,沿東涌道走,見一天橋,上左天橋後,至頂,轉右,直行便至富東邨
**量力!!小心中暑!!

本人評此為半體力訓練路線

四.大埔頭至大尾督
由太和出發,行去大埔頭果邊,過火車橋底後,一直有指示.不久便遇粉紅色扶手的樓梯,沿樓梯進,便至九龍坑山(比較高果個先係真正既頂),走呀走,至頂後,便會不斷落斜,落返「學斗」水塘,沿水塘邊走,不久至分乂路,上八仙嶺,又要挨下樓梯,至黃嶺下,亦即代表八仙嶺盡在眼前,走完八個峰,以後行山都順順利利~最後沿樓梯下走,轉右落大尾督.

*落左管理站後,轉右落大尾督,唔好轉左,既冇小巴站,又冇巴士站,叫的又冇人應的.
**步行時間:全日
***要體力需求

本人評此為優質路線,既能欣賞風景(湖光山色),又能操fit自己,唯冇地方補給.


另外,我又推介d路線比你,如果你真係唔太足體力的話
一.港島徑第一,二段(山頂至香港仔)
步行時間:2,3小時
多人行
主要為落山
風景美
路線:在山頂搵盧吉道,沿盧吉道行接港島徑.

唔打咁多喇,廢事你心亂,但你想要相既,我都比到你.



2009-10-22 19:33:31 補充：
唔好話唔得~我初初行山全部係獨行(當然包括以上四項吧,行左十幾廿次山先開始跟隊)

港島徑一, 二段順走, 不過第二段落香港仔可能會驚驚地...


馬鞍山郊遊徑, 由馬鞍山上, 去昂平高原睇海景, 再落西貢 (落西貢有少許斜同石頭路多, 小心d行就ok)


東大古道, 全程絕對唔辛苦, 可睇到少量機場景色, 但路線長, 風景麻麻


西灣亭至北潭坳, 可飽覽全港最靚0既大浪西灣+咸田灣, 赤徑, 不過之後上大浪坳出北潭坳會辛苦d


港島徑第八段, 風景靚到被times本國際雜誌讚過, 但0黎黎去去都係得一個景... 雖然官方網頁話係3粒星, 其實都唔會危險同難行, 有好多碎石, 小心d就完全無問題



以上路線打個名, 就可以搵到好多資料

其實行山好難唔辛苦的... 特別對於體能差0既...

我都係新手, 最多行下抖下, 都係一個唔錯0既方法...

但只行2個鐘... 無咩可能...

新手應比官方網頁提供時間, 預多1-2 hrs...

2009-10-23 00:53:21 補充：
如果真係想搵d短時間0既, 郊遊徑會適合你多d...

但郊遊徑都有易有難~ 記得搵齊資料先好出發