報團去台灣要帶的咩?

以下是港澳居民申請入台證網址,我上個月先辦左入台證,一個月就攪左.因為不是本地出生,所以你第一次要帶文件上去辨的,第二次續就可於網上辦.不明就打去問就得了,他們會教你的.
https://nas.immigration.gov.tw/nasf/ctlr?PRO=PRO_Task01Application

飲食食

1) 牛肉麵可去西門,老董牛肉麵, 台北車站;良品牛肉麵;, 信義路附近;永康牛肉麵;和;鼎泰豐;總店

2) 刨冰/冰品店都推介俾你: 西門;楊記花生冰;, 忠孝敦化站o既;東區粉圓;, 士林近陽明戲院旁;辛發亭;,信義路附近;冰館;----我去到日日食冰當飯食

3) 士林夜市, 饒河街夜市, 華西街夜市, 基隆廟口夜市各有特式美食, 分甘同味可以試多幾款小食嘛

4)麵線, 好多書都話阿宗麵線好鬼正, 搞到我同我當時男朋友一放低行李第一時間去排隊買黎食, 點知我倆一碗兩份人食, 連半碗都食唔到就掉, 因為佢用木魚製o既湯頭又酸又鹹又濃, 我同佢食唔慣佢陣怪味,但當地人真係好鐘意食, 好多企埋一二邊又食, 蹲喺地下又食o可惜我哋唔識欣賞, 獨愛刨冰而已.....試不試由你

5)淡水有好多好嘢食, 例如碳烤臭豆腐, 燒魷魚, 炸蝦卷, 烤鳥蛋, 可口魚丸(必食!), 阿給(我嫌肥淋淋), 高過你個頭o既雪糕(以舉住杯雪糕計), 阿媽的酸梅湯(建議淡水唔好喺平日去, 無feel o既)



購物

我個人認為如果你想買潮流服飾, 台北有就有, 但係我覺得香港都搵到呢啲款, 而且價錢較貴, 我就買唔落手喇o不過東區有間bazaar係賣名牌outlets,你可以逛吓睇吓有無嘢啱你o附近又有間converse旗艦店, 我前年去用4百蚊買到對羊仔皮幻彩藍色特別版converse,不過唔係成日都有好嘢, 睇你好唔好彩



如果你女仔, 就可以買吓MJ化妝品, 因為平過香港水貨店(龍城係平但係成日斷貨), 屈臣氏同埋台北車站附近o既光南大批發係我每次必去地方o

CD,VCD都有得賣, 光南, 玫瑰, 佳佳等唱片店都可買到最新影音碟o仲有一間喺八德路附近o既學友唱片店(好似已經改咗名), 都比上面提o個三間店平啲o



手信可以去圓山站酒泉街維格烘培買鳯梨酥等食品o西門就有黑橋牌肉腸/肉乾/肉(魚)鬆, 同埋 格子趣買OMIMA 鹹濕搞笑糖果, 或者老天祿(紅招牌)買鴨舌; 淡水有鐵蛋(唔怕傷胃可以買), 魚酥, 仲有次次我去親淡水一定買番hk仲好番被人食晒o既手工麻糬(只此一檔), 我買無餡黑糖味, 老闆娘好人,仲會送多盒雪硬o既黑糖麻糬俾我即食添!



如果你鐘意買漫畫, 台版愛情小說或者日韓劇VCD, 可以去忠孝新生站對開八德路一段電腦街附近o既新光華商場, 比hk平, 而且齊款o



建議你即使千萬個不願意去觀光, 我都認為你應該加插番多少觀光行程在內, 真係買唔到五日嘢咁耐架! 九份,十份, 淡水(必去), 野柳睇吓風景,感受吓風土人情真係幾寫意架, 我下個月5號就去台北喇, 今次好多觀光呢!

你係香港住夠4年未?
未夠既話你就唔洗諗喇
因為根本唔會簽證俾你去!