✔ 最佳答案
鼠鼠既活動及飲食正唔正常?有冇其他異常?
鼠鼠肚脹,皮膚發紫要留意會唔會係皮膚腫瘤,體內腫瘤or便秘,之前有2,3日冇食野,較易令鼠鼠血糖過低,營養不足,咁都有機會肚脹,需要睇醫生打針先得;如果有鼠b胎死腹中既話,鼠媽唔會咁耐都冇事,多數即時會好辛苦及好快致命,所以而家就唔似係咁
飲少左水就要留意返水樽出水有冇問題,而如果飲少左既時候係轉涼既話,就可能係冇咁熱而少左飲
A.腫瘤
皮膚發紫比較擔心係皮膚腫瘤,但要留意返會唔會有傷or甩毛過令皮膚紅腫;體內腫瘤唔易被發現,但就會令鼠鼠肚脤咁,多數被發現時都係已經有下體出血既情況;唔係外表生粒既腫瘤,一般都好難去分係咪硬,因為在體內or皮膚既地方,都會摸到鼠鼠既肉,咁就好自然會係林
雖然好多時初期鼠鼠較少會好累好病咁,但唔好以為咁就冇事,因為鼠鼠壽命短,新陳化謝快,d病毒都會忽然行得好快,所以病既初時已經應該去睇醫生,到嚴重既時候先去處理,就好難救得好;,如果鼠鼠年紀大,咁就要考慮清楚先好決定,老左既鼠好難承受到麻醉藥
B.營養不足
其實鼠鼠身體細小,冇咩脂肪去消耗,如果完全冇食野,有研究指出,只係一整天,就已經可能會血糖過低,所以2,3日冇野食係好大既問題,希望日後都可以多加留意,唔好再有同樣既事發生
A.B兩個可能要留意以下既事:
1)盡快睇醫生處理,鼠醫生資料及睇醫生要留意既事可參考:
http://hk.knowledge.yahoo.com/question?qid=7009031901757
2)保持環境乾爽清潔,避免有更多細菌再令鼠鼠受感染
3)檢查籠入面有冇野整親鼠鼠,擔心之前有受過傷
4)擔心鼠鼠唔舒服會覺凍,如果鼠鼠有身凍既問題,就唔好俾風直接吹到鼠鼠,要鼠鼠保持溫暖;但冇咁既情況在熱既時候,就要多加留意散熱問題,太熱都會令鼠鼠訓得多D,熱天要留意既事可參考:
http://hk.knowledge.yahoo.com/question?qid=7009061900335 第2點
5)鼠鼠試過2,3日冇野食,有返野食亦未必習慣返固體食物,要多加留意鼠鼠飲食情況,可放固定數目既食物入籠,俾一d有營養既野佢食.可以試下俾d麥片or白麵包佢
6)鼠鼠唔舒服會更易受驚,受驚會令病情惡化,除左檢查及治療外,都唔好打擾鼠鼠
7)如果鼠鼠唔食野唔飲水,就用手直接餵,都係唔食既話,就要俾d耐性試多d,鼠鼠唔舒服,又會好累咁,係冇咩胃口既
C.便秘
分辨便泌:
1拎鼠鼠既排泄物上手咁下,最好係佢排出唻冇耐(過一陣,1分鐘度啦,即摸好易係好林),睇下會唔會好硬;唔洗擔心,佢身體冇咩事既話唔會好臭.其實最好係成日咁樣去檢查鼠鼠既排泄物,因為如果之前你冇掂過,就好難分係咪特別硬左,我成日都會咁做
2)清晒個籠之後,再仔細留意佢既排泄物係咪真係少左
3)睇下鼠鼠排泄時會唔會好辛苦,平日休息又會唔會好痛苦咁縮埋一舊
4)便秘有時會見到佢肛門附近會濕濕地咁,唔好以為濕就係肚瀉,便秘都會
5)留意會唔會有排泄物塞住左
便秘處理方法:
1)將水放近鼠鼠訓覺既地方,必須確定水樽出水係冇問題(平日都要,但便秘時水份特別緊要)
2)可以俾少少橙既"衣"俾鼠鼠食,再睇下情況有冇改善,都唔得既話,俾極少極少既橙肉俾鼠鼠(大約半隻指甲大小),唔好俾菜,易有農藥但記得真係便秘先好俾,唔係一陣攪到隻鼠肚瀉就慘
3)保持個籠乾爽清潔
4)情況都冇改善(2日度啦),就必須睇獸醫處理
2009-10-15 15:39:37 補充：
謝謝誇獎
鼠鼠係執返唻,而睇表面就睇唔到鼠鼠既年齡,唔能夠推斷到鼠鼠而家係咩年紀
只可以睇返執返唻之後,鼠鼠有冇明顯大隻左?鼠鼠60日大左右就會進入完全成熟期,體型會出現明顯既長大,如果執返唻冇明顯大隻過,就應該係大過兩個月了
不過鼠鼠一歲就開始老,所以就較難分辨你既鼠鼠係咪已經年老
鼠鼠患腫瘤都未必會睇落好病,多數會好病,真係好危險既時候先會咁既,所以就唔好見佢冇咩野咁而唔理唔理,就算明顯見到生左粒野既鼠,都可以好活潑
有轉過糧就要留意返,係突然轉糧定係慢慢咁轉呢?轉糧最好就係新糧混舊糧咁,慢慢轉,唔係就易唔慣or唔食
2009-10-15 15:39:50 補充：
我都係住屯門,但就唔覺有好既鼠醫生,醫鼠唔容易,所以揀返d較有口碑既會安全d,唔係分分鐘睇左仲差過冇睇
我就唔建議搵獸醫以外既人去摸下你既鼠,因為用錯力既話可大可小,特別係懷疑鼠鼠肚係有毛病,更易出事,都唔好拎去鼠店,鼠店係做生意既地方,店員唔一定會了解鼠鼠,所以鼠鼠有病千萬唔好依賴鼠店,平日買野都最好唔好盡信
有朋友試過帶隻鼠去睇醫生,佢隻鼠係完全冇便便,但精神都好好,覺得問題不大就胡亂去左就近既獸醫,去到個醫生抱鼠都好唔熟手,隻鼠俾佢按幾下之後,就即時突然大量下體出血,冇耐隻鼠就死左,所以真係唔好亂俾人按隻鼠
2009-10-15 15:40:01 補充：
如果你既鼠仲行得走得,又有食野就唔似血糖過低,血糖低唔建議胡亂俾野佢食,因為人同鼠體型相差好大,我地食or飲既野,份量出錯就較危險,葡萄糖份量過重,已經可能超出鼠鼠可承受既份量,加上血糖過低係好危險既事,所以萬一真係出現血糖過低,鼠鼠冇咩力,訓得好犀利之類既情況,就一定要盡快睇醫生先得
好抱歉知道之前有鼠鼠死左,希望你唔好太難過;請問另一隻鼠係因咩而死呢?有死鼠之後有冇澈底清潔鼠籠及用品?
有兩籠鼠較易會有物品共用,一齊洗,掂完一隻鼠之後未洗乾淨手就掂第隻既問題,所以兩籠鼠既鼠籠及所有用品最好洗乾淨d,可以用動物專用消毒劑or牙膏去清理
