✔ 最佳答案
如果同仁堂隻安宮牛黃丸，行貨，去東方紅買最平，應該係$280，我唔肯定佢有無加價，我爸上年去買俾我媽食，好似係$260-$280。
東方紅直接搵香港藥業同同仁堂拎貨，所以平過出面個d經泉昌拎貨既，華潤堂、裕華個d要$350左右。
其實如果您買得多的話，係華潤堂、裕華個d買，會有折的。 大約買六粒就會有平。
拎得起的話，真係唔好搏買水貨，始終話就話係水貨，但都唔知會唔會係假貨，食落肚既野，尤其是拎黎醫病既，寧願自己係其他地方慳，都一定要買行貨丫。
食左既功效係點，真係人人唔同，我講我既經驗您知。
我爸爸三月都中左風，前前後後到依家食左三十幾粒安宮，安宮對中風初期係好有用，我爸爸中風當晚食左安宮，起初都有d混亂，到第二日探佢時，佢已經好清醒。
但我經驗，除左食安宮，針炙、做運動都係好重要。 我爸爸住院四五十日，當時keep住食安宮，係，個人真係清醒到爆，仲識得串我，但真係坐都坐唔穩。
佢出院第二日我地帶佢去針炙，隔日帶佢去針，針完第二次，佢已經坐得穩，keep住針左三個幾月，一星期針三次。 後咪排到去政府既日間物理治療中心做物理治療，連個物理治療師都忍唔住問我地，究竟對我爸做過乜，點解佢真人同之前醫院個封轉介信所寫既分別咁大。
真既，針炙好有用，我唔係中醫師，但我父母、兩個舅父都中過風，我親眼見過晒個成效。
我媽媽上年試過小中風，當時佢即刻有食安宮，不過之後無針炙，佢到依家身子都好弱，經常感冒、頭暈；我有個舅父係加拿大，今年四月底五月時中左風，佢一中風即刻食左粒安宮，過左十幾分鐘再食多粒，入到院仲係講唔到野，半邊身郁唔到，隔左五六個鐘就郁得番講到野，依家同之前未中風根本無分別，個邊d醫生都話無可能，不過，我舅父就無針炙，結果依家行得走得都好，都成日覺得好唔精神。
我仲有個舅父已經唔係到，佢都係中風，因為哩個舅父中風做完手術後，一直昏迷，昏迷左8個月，直到佢唔係到都無醒過，所以搵唔到機會俾安宮佢食，但有針炙過，個中醫都話佢太遲針炙(個時已經係舅父昏迷左三四個月後既事)，救番醒既機會都好微，不過，舅父針炙完個排情況係好左好多，一停左無針炙先開始差落去。
所以，個人認為安宮對中風真係有一定既功效，但除左安宮，一定要帶病人針炙、迫佢做運動，咁先有機會好番。
