✔ 最佳答案
先天問題，實在有啲難度。首先你要理解呢個現象，如果你拖住個你覺得樣衰嘅女仔出街，你會唔會怕人地嘅眼光呢？佢想拖你手或者 kiss 你，你會唔會抗拒？我相信正常男仔都會。女仔亦同樣。
不過有句說話叫做「情人眼裡出西施」，只要佢真係對你有足夠嘅感覺，由佢心中睇出嚟嘅你，點都會覺得好英，唔會再介意你個樣點。熱戀期間雙方嘅界限會衝破，邊個影衰邊個嘅諗法亦唔會再存在。
所以將佢帶入熱戀，係你要面對嘅挑戰。由你講嘅嘢睇黎，佢只係接受左同你一齊，但應該未去到熱戀狀態，最多只有好感。由好感入熱戀係一個情感累積嘅過程，不斷強化佢嘅感覺就可以成功。你依家同佢都叫做已經一齊左，所以應該不乏咁嘅機會。
點樣強化呢？因為啲 feelings 絕少會一下到，所以幾乎係冇捷徑嘅。最 general 嘅 approach 就係多同佢互動，但唔係朋友之間嘅交談，要係情人之間嗰種情感交流。你要多向佢講你對佢嘅感覺，如果你唔滿意佢嫌棄你個樣，就直講。多以行動表達你嘅情感，例如你唔鍾意再畀佢啲 fd 嫌你樣衰，佢叫你同佢見佢啲 fd 就唔好去，直講「費事喺你班 fd 跟前影衰你啦」－－只要你有咁嘅感覺，真誠咁表達就得。切忌將自己嘅感受收埋。
佢一方面感受到你有血有肉，另一方面自己都不可能無動於衷（除非你對佢一啲影響力都冇），可能會 feel sorry、甚至有罪惡感等等。你可以自然咁 amplify 佢嘅 feelings，去促進大家嘅互動。另一方面你唔好因為你嘅感覺而唔好意思，只要你啲感受係真，忠於自己咁表達就得，唔好虛偽。（理論解釋可參看我其他回答）久而久之，佢會情陷更深。一到某個熱戀嘅位，大家都應該有二位一體嘅感覺，到時佢唔會再分你你我我，嫌棄你樣衰。
2009-09-22 17:52:03 補充：
唔需要刻意令佢有罪惡感，只係舉例。但如果你覺得佢真係對你唔住，咁你令佢明白，同可以分擔你嘅感覺，結果有罪惡感係應該嘅。我唔可以教你特登整到佢有罪惡感，但總之，促進更多嘅感覺交流，可以令佢更加易走進愛河，相信無人會質疑呢條常識。
不過如果你一向都有坦白完整咁同佢分享感受，而都不能令佢踏前一步，咁問題就唔知咁簡單，有好多深層野你要諗諗。
首先，段關係唔係正常兩情相悅互相傾慕墮入愛河，而係你主動表白，而佢就「畀機會」你，而之後亦無任何變得對等嘅跡象。無錯，愛情係雙方面，但係你呢段關係一開始已經不平等，好明顯係你愛佢遠勝於佢愛你，甚至可以講，佢勉強接受同你行但可能根本唔稱得上愛你。
2009-09-22 17:52:12 補充：
另外，佢已經同你做左一年幾朋友，但一年幾裡面你地都唔可以自然走入戀人狀態，而由你嘅講法睇落，似乎你係幾早下都已經對佢有意。如果你地相處左咁耐，佢都冇 feel；咁就算「名義上」畀你做男朋友，你又可以做到幾多野去令佢突然對你好有感覺呢？
我唔知道你以耐以黎同佢相處係點，但可能你一開始已經行錯路，例如一直都處於一個爭取佢接受嘅不平等身份咁。咁就更加難可以做到野，人係唔會對輕易得到嘅嘢珍惜，當佢幾時都可以選擇你嘅時候，你喺佢眼中嘅價值可以有幾高呢？重有更加要注意，千祈唔好再行歧路，選擇忍佢就佢去討佢歡喜，咁只會令你價值更加降低。當然咁唔代表唔好啗佢呵佢，呢啲對等嘅關心同搖尾乞憐係唔同。
2009-09-22 17:52:20 補充：
結論好簡單，點都係得兩條路，一係就係佢終有一日對你有「盲目」的愛（或者至少好似你咁鍾意佢咁鍾意你），修成正果；否則你哋無可能跨得過呢個障礙。所以，如果衡量過覺得佢點都無乜可能會有真心愛你嘅一日，應該及早放手，長痛不如短痛。無左條女都的確無需要 take it personal，人夾人緣嘅野唔係你問題。當你搵到真命天女，就覺得今日嘅野只係過眼雲煙。
2009-09-27 19:06:55 補充：
發問期將完。
我遇過好多人，問你點解救，但事實上只不過想搵啲安慰，激勵下。
事實上，安慰同激勵係幫唔到你。人真正需要嘅，係解決方法。
安慰同激勵重有啲似毒品，每次劑量要多啲先有效，而且效用好短暫，重要治標不治本。
如果你要嘅只不過係安慰，請叫我刪除答案。否則請來處理問題。
