有關美國空軍/戰機嘅電影...

有咩戲有美軍戰機﹖唔駛問第一號答案就梗係TopGun啦！呢套戲香港譯做《壯志凌雲》，台灣譯做《捍衛戰士》。此片當年令全球極為哄動，因為實在太有型，內容主要係講湯告魯斯點樣入TopGun受訓後為國效力。此片既主角除左湯告魯斯，仲有極有型既F-14，配角則有A-4天鷹機、扮米格機既T-45。呢套戲做完之後，去美國海軍投考飛行員既人數多左3倍，靚佬湯做完呢套戲之後亦從此大紅大紫。
另一套少啲人講既戲係《鐵鷹戰士》(Iron Eagle)。成個《鐵鷹》系列有4集咁多，不過就以第1集最好睇。故事幾有趣，講個年輕人既老豆係美國空軍F-16既飛行員，係中東比人捉左，跟住主角渣住F-16去中東救老豆。呢套係B級片，好多人都話佢好爛，特技又差，但我覺得如果你無好似TopGun既班底咁把炮，連航空母艦都借到幾隻番黎拍戲，咁以B級片既質素黎講《鐵鷹戰士》已經做得好好。《X-men》唔知第幾集有一幕講兩架F-16追住X-men既戰機黎打，嗰幕超有型，樓主一定要睇
樓主提到既《天擊戰線》係另一套相關電影。套戲既主角係渣F-18既偵察型，不過只係出左一陣就被擊落，成套戲主要都係講主角點樣係陸地上逃避敵人。
《空軍一號》雖然主要係講夏里遜福點樣係空軍一號內打恐怖份子，但去到片尾就有一場由成隊F-15去保護空軍一號並打Mig-29既精采場面。
兩集《變形金剛》同《未來戰士﹕2018》都有A-10出現。唔知點解近年荷里活既戲咁鐘意用A-10，可能見佢就黎退役及攻擊效果夠誇張。
如果想睇最多美軍戰機，咁樓主一定要睇《紅旗演習》。呢套係紀錄片，就係介紹美軍一年一度係內利斯空軍基地舉行既紅旗演習。兩年前太空館天像廳有做，我去睇左兩次，嗰度寬闊既視野真係極正。