中國軍力同戰爭問題!!!

樓主問左兩個好難答既問題，先講南沙。中國當然宣稱南沙群島全境都屬於中國。不過，只要你睇下南沙既地圖，就會發現其實南沙群島係極為廣泛分佈於西南太平洋既一大群島嶼，有啲島離中國最南端既海南島都極遠，而有唔少島更係非常接近越南、菲律賓及印尼等國。當然，領土歸屬從來都唔係以邊個近就歸邊個做原則，例如馬祖、金門島就同厦門只係一水之隔，但兩島屬於台灣既勢力範圍，而係西班牙本土上既直布羅陀則屬於英國。但如果一個島咁近人地，人地話個島係佢既都好難話佢毫無道理。
最緊要既係，咁樣口同鼻拗係無用既，爭執雙方自然會翻箱倒籠搵所謂既證據黎支持自己，所以真正決定某孤島誰屬既方法通常都係靠生人霸死地既武力佔領方法。例如北方四島(日本宣稱擁有，俄羅斯佔領)、獨島(日本宣稱擁有，南韓佔領)、釣魚台(中國宣稱擁有，日本佔領)、南沙群島全境(中國宣稱擁有，中、台、越、菲、印尼各自佔領不同島嶼)都係典型例子。
老實講，如果中國來真打越南，越南無可能頂到一個月，中國同越南1988年打嗰場所謂既“海戰”，中國海軍剩係用步兵槍炮都打得贏，證明越南唔係對手。不過問題係，中國值得為南沙群島同全個東盟(東南亞國家成立既聯盟，越南印尼都係成員國)開戰﹖就算打贏左，中國都肯定要負上一個侵略者既罪名，呢樣野先至大鑊。中國既國際形象本來就好差，西方各國一致認為中國係威脅，難聽啲講句係邪惡既共產黨威脅，鬼佬寧願吹捧樣樣野都落後過中國既印度都唔支持中國，如果中國再為南沙呢啲島仔同全個東南亞開戰，中國肯定被全球孤立。
釣魚台既情況都類似，而且有個兩個更麻煩既問題。第一係日本海軍實在係勁，近兩年求奇都起多兩隻小型航母及最新既新盾艦出來，反而中國經過2006年既造艦高潮之後就再無新發展，可見日本海軍仍然係亞洲除美國外首屈一指既海上力量。就算中國唔同日本仔鬥海軍，中國始終都要派海軍去佔領及保護釣魚台列島，中國海軍遲早都要同強大過佢好多既日本海軍鬥，咁樣長遠黎講一定死。第二，日本有美國係背後撐腰，而且美日兩國根本就係連體嬰，美國對日本既支持係完全無限制，咁即係話同日本打即係同整個美國軍事力量打。中國齋打日本都唔可以輕鬆贏出(雖然中國打日本必勝)，但同美國全面開打就毫無勝算，考慮到呢樣野，釣魚台同樣係唔打得。
係領土爭端既處理上，小弟不得不佩服我地國家領導人既智慧，雖然佢地近來處理記者被打事年表現得極差。中國實在有太多鄰國(好似話中國既鄰國數目之多已被列為世界紀錄，有待高人查證)，所以領土紛爭根本就唔限於上述既幾個島仔。中國處理領土紛爭既方法係盡量以和為貴，以不設解決問題時限、堅定立場、作有限度讓步作為解決問題既大方向，係咁既做法下，中國已減少左好多領土糾紛，包括黑瞎子島(經談判後中俄各分一半)、中國邊界全境劃定、中印邊界繼續談判而幾十年都未再有戰爭、中越邊境亦長年穩定。對於上述既幾個島，中國堅持既原則係耳熟能詳既“擱置爭議，共同開發”，其實呢句說話即係想轉移大家既注意力，希望爭議雙方唔好再執著於某個島既所有權，而係應該集中解決嗰個島附近既利益點樣可以有效分配比唔同既持份者。小弟認為呢個係最務實既做法，其實無人真係對嗰啲荒島有興趣，只係大家都想係附近開發天然資源發財，既然大家都係從利益出發，咁以利益作為談判基礎就肯定係最實際。
不過大部份同中國有領土糾紛既國家都當中國無到，只想霸得幾多得幾多，然後獨占自己霸得到既野。咁樣唸睇落好似好醒，其實背後大有問題。因為你越南、菲律賓、日本識霸地方，中國就唔識﹖你地班騎呢怪唔肯一齊發財，你以為中國會同你客氣﹖中國唔敢為幾個島同呢幾個國家開戰，調番轉呢幾個國家又敢為幾個荒島同中國開戰﹖到有一日中國出盡力去霸佔佢能夠霸佔既地方及天然資源，呢啲國家真係咁同中國開片﹖

對於海洋中之荒島，主權誰屬，絕對是今後幾十年之重要課題，值得各國投放資源去研究。觀其背後主要原因，是天然資源之分配問題，各國在本土資源開發已差不多，找尋新資源就只有向外海發展，這過程，少不免會與外國起衝突。
1. 南沙群島，很多只是石頭一片，實稱不上是島嶼，其最大之島嶼大不過長洲。南沙群島位處南中國海之大陸板塊(淺水區域)，內藏豐富石油及天然氣，南海油田儲存量，可算是世界排行第四大。其歷史價值，在宋朝時，已是中國海上絲路之必經之路，當時其他附近地方，都只是住著土著，連國家都談不上。
對越南，中國當然有壓倒性優勢，但中國亦不是好戰國家。而且國家劃界亦是複雜問題，對南沙外圍島嶼，現在是採取容忍態度。
2. 至於釣魚台島，問題就複雜迷離很多，首先日本都是位於大陸板塊邊緣位置，同時對釣魚台島有相當歷史記錄；再加上統治過台灣一段時間(事實釣魚台島是較接近台灣，個人認為釣魚台屬台灣機會較高)，因而美國二戰後將釣魚台島劃歸入日本領土。至於會否發生戰爭衝突，現在言之尚早，但越遲發生，中國勝算越高。