倉鼠咬人(當左食物?)

✔ 最佳答案

唔同意樓上網友siufunlui既做法,希望網友唔好介意及可留意一下:1)如網友所講既咁,受驚就會咬人,但如果鼠鼠驚既時候仲抱鼠,咁只會令鼠鼠更驚,更易咬人
2)放鼠在身上行,咁係好危險既事,易令鼠鼠趺傷骨折,又或人既動作會整親鼠鼠,亦會令鼠鼠受驚,就算同鼠鼠已經好熟都唔建議咁做,而家唔熟就更易會在過程中咬人咬衣物

A.鼠鼠買左冇耐,咬人係好正常既事,點解你覺得佢唔驚你呢?唔係飛奔咁走開先係驚人,咬人可以亦係驚既既表現
鼠鼠保護自己只係得牙同爪,所以驚起上唻就會用牙同爪去對抗外來者. 鼠鼠咁細隻,其實驚人我覺得好正常,好似如果有隻動物大你咁多倍,帶你去一個陌生既地方,再一手就拎起晒你整個身體,我諗都會幾驚.所以慢慢唻,俾d耐性同時間吧,同時要留意有冇第d野令鼠鼠受驚,新鼠係要時間去適應環境同人,俾多D耐性吧

B.先檢查鼠鼠身體及排泄物有冇異常,怕鼠鼠有咩唔舒服or受驚後誘發疾病,除檢查外就唔好攪鼠鼠,到肯定鼠鼠冇咩事時,再兩日唔好掂鼠鼠,之後再用以下方法同鼠鼠熟,但要留意,以下既步驟唔係幾日內就做到晒既事,心急反而對鼠鼠唔好:(耐左都同鼠鼠唔熟,都可以試下做):
1)你可以隔住個籠叫多d佢,在籠邊拎d野食引佢埋唻(主要係想有食物袋既聲音俾佢聽到),隔住個籠俾野食唔會咬到你,唔洗擔心;唔一定要拎零食引佢,拎主糧入面既野食都ok架啦,唔食零食會健康d.日日叫佢都有野食既話,佢好快就會記得你把聲or裝食物既袋既聲音,我覺得鼠鼠認食物袋既聲比較快
2)叫鼠鼠既名時,最好用疊字,會令鼠鼠更易記得,平日對鼠鼠既指令,例如叫鼠鼠食野之類,都最好用疊字或簡單聲音,鼠鼠係聽唔明你講野既內容,只係會記聲
3)等到你地熟d,做到你一行過佢就行埋唻or冇咁驚你,之後你可以試下伸隻手入籠隻俾野佢食
4)再熟d再試下俾野佢食既摸下佢頭or身
5)佢都唔抗拒之後,可將食物放在手心,等佢行上唻食,慢慢佢會習慣左你既手
6)再熟d就可以抱佢,抱既時候唔好忽然由頭or從後抱起佢,咁會令鼠鼠以為有敵人攻擊,最好慢慢叫住佢先抱佢,如果抱唔到,可以用乾淨既杯唻俾佢上去咁樣抱

C.如果同鼠鼠熟左都仲咬人,可了解返鼠鼠咬人既原因多數有以下幾個可能,減少被咬既機會:
1.鼠鼠唔舒服既時候,可能你輕輕一抱就令佢感到唔舒服,又或精神上都會特別敏感,因為自己弱左就更要保護自己.
仔細檢查鼠鼠既身體有冇異常,檢查下鼠鼠既排泄物,同埋個籠會唔會有野整親鼠鼠,例如地板轉輪樓梯會唔會有隙,墊材會唔會係粒狀,而球體轉輪or玩具會令鼠鼠感到壓力而覺得唔舒服

2.有第隻鼠一齊住既話,都會易咬人.兩隻或以上既鼠一齊住既話,其實好易會打交, 打交係因為倉鼠本身就係獨居動物,根本唔適合同其他鼠一齊住既. 佢地既地盆意識好強,到發情既時候先會一齊,我睇書講過,外國既倉鼠繁殖場,都係一隻籠一隻鼠,再到交配既時候先放埋一齊一段好短既時間. 成日都keep住要抵抗敵人既情緒,即係較神經質,咁就好易動不動都想咬人

3.太餓,唔夠野食就會亂咁咬,搵野食,可以一次放多D食物落去,等鼠鼠有較多既安全感,但留意食物唔會變壞先可以

4.你手有食物既氣味,鼠鼠有機會會誤以為係食物而咬落去

5.牙痕
倉鼠屬於齧齒目動物,牙齒入面既齒髓腔唔識得去閂埋,所以牙齒會不斷生長既,如果唔磨牙,就會令牙齒過長,太長會令鼠鼠食唔到野,合唔埋口,甚至插穿鼠鼠既口,咁係會死既,所以鼠鼠係好鍾意咬野.
所以如果鼠鼠既牙長到合唔埋口or食少左野,就一定要搵醫生同鼠鼠剪牙,唔係就好易死架啦
專整俾鼠鼠咬既磨牙石or木係針對鼠鼠磨牙問題而設,所以我覺得係比較好既.都可以買鹽璣OR較硬既食物棒(一支木,外面有食物包住)俾鼠鼠咬

6.懷孕既鼠都會特別精神緊張,從而成日咬人

2009-09-08 18:33:08 補充：
如之前講既咁,要鼠鼠同你熟,絕對唔係幾日內做到既事,上次回答至到你補充既時間,都只係四日既事,俾鼠鼠靜兩日再用我講既方法,最多都只係用到兩日,咁實在冇咩可能會令鼠鼠同你熟

養左一星期並唔係好耐既事,有d人養鼠鼠一生,鼠鼠都仲係怕左佢,因為方法錯誤,過卡忽進,只會做成反效果,之前講既方法係想慢慢俾鼠鼠去覺得你係對佢好,未做到最初既步驟係唔可以跳到去最後,如果急既話就會令鼠鼠記得你係對佢唔好,你係敵人,咁鼠鼠又點會同你熟呢?

而且在鼠鼠未習慣既時候,你仲伸支竹入去,咁就好似有人拎住大形武器入侵鼠鼠既地盆一樣(對鼠鼠身體唻講應該係大形吧),而且手係伸到鼠鼠可接觸既地方,咁鼠鼠咬你係好正常既反應

2009-09-08 18:34:03 補充：
你愈急愈做得多呢d令鼠鼠覺得你入侵既行為,只會令鼠鼠咬籠咬得愈唻愈勁

你抱到鼠鼠佢唔咬你,並唔係代表已經可以抱,睇返平日鼠鼠既行為及養鼠既時間,鼠鼠未熟你就抱,只係令鼠鼠在你手太驚而唔敢咬,當鼠鼠可以自己企定定既時候,就大膽d去攻擊你

在鼠店買既鼠已經唔係太細,只係太急而已

回答 (2)