鋁窗防盜法

鋁窗閂唔實，好有可能係個 keeper 位問題，你試搵把鉗，將個 keeper 拗番入啲，咁應該可以閂到。另外一個可能性，係個窗鉸位移咗位，所以導致閂唔到。
由於你講得唔係太清淅，唔知你屋企隻窗係閂唔實，定係閂埋咗之後，扣唔實。因為兩者整法係完全唔同，前者好大機會係窗鉸出現問題，需要更換窗鉸。而後者有兩個可能性，第一個可能性，之前我已經講咗個 keeper 問題（窗玉嗰個彎彎哋用不銹鋼做嗰舊嘢），只要用個鉗拗一拗吓佢咁就得。另一個可能性係你隻窗個開關手掣耐咗，閂窗時扣唔實隻窗。嗰陣時你只需要去五金舖買隻開關手掣，問人借把電鑽同埋分半鑽咀（１６分之３吋粗），鑽穿你原本隻開關手掣啲拉釘，咁你原本隻舊手掣就可以甩出嚟，之後你再借多一把拉釘鉗，喺五金舖買包分半三0既拉釘（大約兩三蚊一包），之後你再裝番隻新手掣上去，然後打拉釘，咁就大功告成。
不過如果你廁嗰隻係「七」字形的手掣，咁仲簡單，如果五金舖冇得賣的話，鋁窗舖多數有得賣，大約十零廿蚊一隻。你買咗之後，你推開隻窗，用個十字螺絲批，喺個窗玉個底部鬆開啲螺絲，咁你隻手掣就可以甩出嚟，甩咗之後，你再套番隻新手掣入去，然後再上番螺絲，咁就搞掂。
至於啲師傅唔肯上嚟整，咁係好正常，如果係五金舖啲人，有可能係唔知咩問題；如果係鋁窗舖啲人，除非你肯為咗一隻窗而俾幾舊水人，否則係唔會有人為咗一隻窗而上門幫你整，因為人工都蝕埋俾你。

如果租住，可以叫業主整；以前我都試過lock壞，我買咗个防狼/防盜器，主機另有一線，當拉開咗條線就會响，好細部，好平，鴨寮街有得賣。
不過安全Ｄ當然整好佢，加窗花都好，但窗花安裝唔用縲絲用鍋釘仲安全；塞木都可以，但其實用力開開閂閂舊木都有機會跌出。