中國的潛艇技術在世界中來說是如何?

✔ 最佳答案

樓主問左一個好有趣既問題，佢有趣在呢條問題既爭議性極大。雖然係人都知大陸潛艇近年大有進步，但進步成點就分歧極大。就連樓上仁兄提到宋級潛艇可以逼近至“小鷹號”五海里既新聞都係充滿疑問既事件。最大既疑問係嗰隻宋級艇係迫近小鷹號航艦戰鬥群既外緣五海里，定係犀利到迫近小鷹號航母本身五海里﹖兩個可能性引申出來既結果差天共地，如果係前者，咁即係話大陸既潛艇仲未夠先進，因為佢係美戰鬥群既外圍已經被截住。如果係後者就係驚天動地既大新聞。因為美國航艦戰鬥群有層層反潛防禦，最外圍有定翼反潛機(S-3維京式剛退役，美國用咩代替﹖)，內層有專職反既既驅逐艦數艘堅守中路，又有反潛直昇機輔助，如果宋級咁都可以深入敵陣中心叫陣，咁即係話整個美國，以至整個世界都未必可以阻止宋級攻擊。究竟邊個係真﹖小弟當然比較信係前者。
言歸正傳，中國既潛艇技術近年的確有大進步。首先靜音性幾乎肯定國際先進水平。除左因為引入左出名靜既基洛級之外，一啲常見既改善靜音性既措施亦已經成為常規裝備，例如消聲瓦、七葉單軸螺旋槳及減震浮筏等。前兩者小弟係於五年前於我國艦隊訪港時親眼所見，而且令我驚喜既係宋級既消聲瓦既舖設手工極佳，表面完全見唔到係潛艦外殼常見既鉚釘，非常光滑，證明大陸造船技藝一流。
但真正有趣既係一系列對中國潛艦既傳聞。首先係動力系統，無論核動力及傳統動力都有好多好似科幻小說咁神奇既傳聞。其中最引人入勝既係傳聞最新既093潛艦裝置左領先全球既高溫氣冷堆(High Temperature gas cooled reactor)。呢種核反應堆既理論存在多年，結構同常見既輕水堆相似，但輕水堆以普通水作循環介質，但高溫氣冷堆就用氦氣作為介質。傳聞呢種反應堆效率好高，可以令隻潛艦行超過40節，而且傳左好耐093及094都係用呢款反應爐。小弟初時都唔係好信，甚至唔相信呢款反應堆既存在，但前排小弟係一個網頁中知道中國早係2003年已經係清華大學成功運行一個高溫氣冷堆，而提供呢條消息既係官方既新華網！既然連官網都係咁講，093及094究竟是否真係裝左呢種反應堆，到依家都無人知道真相。
關於傳統動力既傳聞仲過癮。係人都知大陸發展緊絕氣推進潛艦(Air Independent Propulsion，簡稱AIP)，即係想隻潛艦唔似普通柴電潛艦咁每隔幾個鐘就要上水面抖氣，而係一潛就係幾日以至兩個禮拜。問題係大陸發展緊咩類型既AIP潛艦﹖以前傳得最多既係燃料電池(Fuel Cell)AIP，但燃料電池都有好多隻，究竟係差啲既鉛酸電池，定係超先進既質子膜電池﹖兩種電池都超神奇，因為燃料係液態氣及液態氫，而“廢物”只係純水！但前者較笨重，亦有洩漏有毒物質既危險，而後者則只有一個薄膜就可以進行反應！鉛酸電池既傳聞有唔少人支持，因為俄國最新既阿穆爾級AIP潛艦就係用鉛酸電池，以中國咁鐘意用俄國科技，呢個講法有唔小既可信性。但後者則係世界最進技術，德國既212級潛艦就係用佢，以中國係全球收集技術訊息既能力，中國引入到呢種技術既可能性亦唔小。
但傳聞未止於此。因為近年大陸有好多消息傳出話中國係鋰電池技術上有大突破。鋰電池即係常見於遙控車嗰種方形9V電，只係呢個電池比遙控車既大千百倍，有唔少人認為最新既041元級潛艦就係用鋰電池。不過，近一年又有消息話元級無錯係用AIP，但用既係較落後既斯特林發動機(Stirling Engine)。呢個技術首先由瑞典應用於哥特蘭級潛艦，但其實只係普通柴油機加埋燒液態氧，技術要求較低，日本最新既AIP潛艦蒼龍號就係用呢個技術。不過呢個傳聞無咩根據，因為中國同瑞典無咩聯繫，而且中國就算要引進技術都唔會引進呢種較落後既，佢自己閂埋門都可以搞到出來，而且點解唔從俄國引進更先進既燃料電池﹖甚至有傳聞話元級根本就係普通柴電潛艦，無用AIP，呢樣野我都唔信，因為發展AIP係世界潮流，中國軍事發展一向幾有前瞻性，無理由最新既常規動力潛艦唔會試下AIP。
推進方式亦有科幻式傳聞。依家所有中國潛艦都用螺旋槳推進，但傳聞中國正發展英國率先使用既噴射水流推進系統潛艦，而且過幾年海試。小弟認為呢個傳聞可信度較低，因為天下間暫時只有英國人成功，我唸中國的確係研究緊，但離有實艦海試仲非常遙遠。
仲有其他有趣既傳聞。例如有傳093上面裝備有中國自研既潛射巡航導彈。而091漢級作為第一代攻擊核潛本來噪音極大，但經過一系列改裝後已經大幅下降。與中國潛艦噪音水平有關既傳聞一樣驚人。有人話中國核潛既噪音可以低過100分貝，比海洋自然噪聲更低！呢個水平甚至好過美國最先進既海狼級！當然呢個傳聞唔可信，但較多人相信093既噪音都只有115分貝，與俄國勝利3型潛艦相近，比美國洛杉磯級差少少。

2009-08-18 20:34:31 補充：
另外中國潛艦有無裝備拖曳聲納及船側陣列聲納都有爭論。一般認為中國潛艦有裝拖曳聲納，而近年亦有唔少文章話中國潛艦已經係船側裝左高性能既聲納陣列，令探測能力大幅提高。

2009-08-18 20:34:45 補充：
最後想講兩個同飛彈有關既傳聞。有傳093裝備左潛射防空飛彈，不過講呢樣野既人唔多，小弟亦無聽過中國有將已有防空飛彈改成潛射型既消息，所以我唔係好信。但最有趣既傳聞就係究竟巨浪2型既射程係幾多﹖依家094已經肯定存在，大陸亦好似認094裝備既彈道飛彈係巨浪2型，但佢既射程有8,000公里、12,000公里，甚至係14,000公里之說。

2009-08-18 20:34:58 補充：
小弟比較相信係8,000公里，因為巨浪2型係東風31型既潛射版，而東風31型幾乎肯定射程係8,000公里。不過，由於增加射程只不過係加長導彈及做一啲小調較而已，所以巨浪2既最終型係唔係真係射程超過10,000公里就不得而知。而家甚至傳聞有巨浪3型在研製中，但無咩有價值既消息係關於呢種新飛彈。

2009-08-18 20:35:45 補充：
尚有少少補充，請參與意見部份。

中國的潛艇技術在世界中來說是如何?

回答 (3)