英國,意大利,法國旅行

樓主想擺重點係意大利當然好，以下係小弟既意見。
典型既意大利行程如下﹕羅馬 > 佛羅倫斯(加埋去比薩睇斜塔) > 威尼斯 > 米蘭。一般羅馬會留4日， 佛羅倫斯留2至3日，其中一晝去比薩，威尼斯及米蘭各留1日。當然，樓主唔駛跟住上述既次序行，而呢個係南至北既順行線，你調轉由北向南玩當然可以。
小弟覺得羅馬應該要玩4日，因為呢個城市好大，剩係交通都用左唔少時間，建議樓主去到羅馬用11歐羅買一張乘車証，該証令你可以係3日內任搭市內地鐵及巴士，極之方便。
佛羅倫斯其實2日就夠，因為嗰度好細，景點超集中，計劃得好就算加埋比薩斜塔都只需2日。佛羅倫斯得米高安哲羅廣場比較麻煩，因為嗰度唔係市中心，行去或搭車都可以，但當然搭車會好啲。比薩城本身無咩野睇，你只需花一個上晝搭車去到嗰度，然後直往城北參觀斜塔及大教堂即可。小弟當時坐第一班車去，到中午已經番到佛羅倫斯。
至於威尼斯同米蘭就真係1日夠。小弟無去米蘭，但有去既朋友話嗰度無咩睇，得個大教堂，最多參觀兩個鐘，同埋行下名店街，或去睇必需要一年前預約既《最後的晚餐》，值唔值得就視乎樓主點唸。威尼斯一樣無咩睇，最正既野都集中係聖馬可廣場上，參觀完個教堂及係廣場上行下，睇埋附近既嘆息橋就夠。至於水道，樓主當然可以坐下Gondola，又或者好似小弟咁，先係岸邊羅馬廣場搭船去聖馬可廣場先，然後由聖馬可廣場行番去羅馬廣場黎參觀威尼斯既城市面貌。有人會係威尼斯留多日，去外島參觀玻璃廠，小弟無去到，但據聞幾正，樓主可以唸唸。
無論係法國定意大利，用英文都唔係幾店，尤其係意大利，絕大部份人英文不佳，最多只識幾句簡單英語。呢樣野無咩辦法解決，所以樓主樣樣野都要靠自己，亦要事事非常小心，因為有咩事你好難搵當地人幫你解決。
預算方面，咁既行程每人一定過2萬，當然如果樓主住hostal可能會平啲，但唔會差好遠，你預2萬5千會好啲。另外訂火車飛可以到意大利國鐵網址reg個account黎買﹕
www.trenitalia.com