廿萬作穩陣股票投資, 買邊幾隻好呀?

女人仔, 我想問下, 你呢廿萬係咪辛苦錢? 你買股票係為左賺錢定係娛樂?

如果呢兩個問題分別係 "是" 同 "賺錢". 你真係唔好亂來.

第一, 個市升唔等於所有股票都升. 而且你只係覺得個市 "好似" 升緊, 如果一個禮拜後你覺得個市變成 "好似開始跌", 你點算?

第二, 如果個市繼續升, 但你買果隻升少少就跌番落去, 你點算?

第三, 就算你買果隻股升緊, 升到幾多你會放左佢? 升十蚊你放唔放? 升十蚊跌番五蚊你放唔放? 跌左五蚊之後升番十蚊你放唔放? 如果你買完已經跌左五蚊你又放唔放?

第四, 股市既升跌幅可以好驚人, 就算係大藍籌, 一日之後唔見10%錢唔係好難, 你乜都唔識, 一掟廿萬落去只係掟錢落海.

我知點勸你你都未必會聽, 見到身邊既人開始賺錢, 自己一定會想試下. 如果你真係想試, 你可以少少地每樣買一手試下先. 感受下升同跌既幅度, 同埋真係買同你心目中既買有咩分別. 邊試買邊學, 真係賣左賺到錢, 下一次先兩手兩手咁買. 慢慢加上去, 記得千祈唔好心急. 如果第一次買一手已經蝕錢, 即刻停手唔好再入市. 唔係你果廿萬會好快無晒.

祝你好運.

而家入市唔系好時機, 皆因美國大印銀紙, 商品物價又未能與經濟配合, 石油金屬都冇咩好大經濟復蘇誘因而上升, 攪到d莊家冇哂出路焗住炒股, 跟本各國股市泡未好重, 恒指系7月份內升三千點, 但失業率仍然高企, 雖則話股市系反映未來半年至9個月經濟表現, 有邊個敢講9個月後實會好番, 唔系想潑您冷水, 就算您果廿萬系風流錢又好, 救命錢也好, 都唔想您損手, 您而家八十幾蚊入匯豐, 一手三萬幾, 萬一唔好彩個市跌二千點, 分分鐘匯控得番七十蚊, 一手冇左成五千蚊, 攪到個人都down哂, 您而家要玩, 我建議您買少量工用股, 例如中電(002)又或者地鐵(66), 佢地雖然升得慢但防守性強, 大跌市都唔會好似滑梯咁, 兼且派息都唔錯, 要進取d可以買少量國企基建股, 例如中交建(1800)或中鐵(390), 因市場地位好鞏固兼寡頭壟斷, 跌左都經得起風浪會上得番, 記住玩股票系考耐力同控制力, 一定要有止蝕位, 唔好麻木追貨, 巴菲特都唔系隻隻賺, 心急就好快玩完, 股票日日都有得買, 個市太高您又想玩, 最好分段入用平均成本法去玩, 保本難度比賺錢更難!