埃及旅行 - 跟團

小弟於2006年去既埃及團同樓主既exactly the same，所以我完全可以比到有用既意見比樓主。
無錯，香港攪既埃及團入住既全部酒店都宣稱五星級。不過，佢地完全無呃你，你會住既酒店真係完全五星級。我住過既酒店包括開羅既Movenpick，呢間酒店係一個乜都有既渡假村，而且開正係通往金字塔既大路邊，一起身就見到金字塔。係洪加達住勁靚Holiday Inn。至於隻遊輪，三層高，除左住既房間、酒吧及甲板露天日光浴場之外就咩都無。初時我都唸，呢隻咁既船咩設施都無就叫五星級﹖番黎香港先知原來係自己大鄉里。因為小弟後尾睇左一本關於郵輪既書，本書雖然係講幾萬噸嗰啲大郵輪，但有啲內容都幾適合我係埃及搭過嗰隻船。作者話真正高級既船其實反而無咩設施，因為上去玩既遊客主要都唔係為左係隻船度吃喝玩樂，而係為左好悠閒咁攤抖下。另外，真正做得好既遊輪主要優勝在服務，包括服務生與客人既比例要高，即係話一個客人可以比較多既服務生服務。要做到呢樣野，除左請多啲人之外，隻船既客人亦唔可以多。除此之外，隻船既飲食一定要好。好除左指食物要優質之外，就餐時既服務都要優良。包括有侍應為客人捧餐，唔駛客人排長龍攞野食，同時餐廳亦要夠大，唔駛客人搭枱，同時亦唔駛限時限刻入場就餐。
咁我坐嗰隻船有無以上既服務。當然我坐既船唔係嗰啲高貴大郵輪，無魚子醬及龍蝦食，但我得到既服務以上述既標準黎講可以話係高級。首先隻船唔大，客人亦少，成隻船客滿最多都只係百零二百人左右，但服務生就有幾十人，所以客人服務生比率算高。另外，我地一日三餐都係自由入席，係一個充裕既時間內你鐘意幾時入去食都得，而且由於客少，所以餐廳絕對夠位坐，永遠唔駛搭枱。雖然我地係食自助餐，但仍然有幾位服務生為大家捧餐，而且食物亦豐富。我覺得最浪費既係每餐都有兩個無咩人食既蛋糕及豐富既生果，我雖然有捧場，但肯定有大部份會被浪費。所以係隻船上面，除左無咩玩之外，都算好嘆。但其實我唸下都覺得唔駛好多野玩，因為去旅行就係要輕鬆叉電，唔應該趕到裙甩褲甩，另外尼羅河兩岸風景都好靚，靜心欣賞好過。
講到架火車，就真係有啲名不符實。雖然話係頭等，但其實架車都幾舊，內籠唔算靚，不過就好乾淨企理。無錯你係要搭12個鐘火車，但你搭既係頭等雙人臥艙，所以有得訓，仲要有個sink盤比你梳洗，不過流出黎既水極小，但唔係太大問題，你覺得攰大覺訓就得，醒左就會到目的地。
至於其他野唔駛多講，樓主只要記住你去既係五星級豪華團，食、住、行全程都唔會有問題，所以唔好帶杯麵咁失禮，而且嗰度亦唔會提供熱水。如果你係跟團，咁治安唔係大問題，因為一切有領隊及當地導遊照料，你唔好獨自離群就得。要提醒既係埃及係回教國家，係遊客區外唔好亂影相，尤其是唔好影女士們及宗教地點。仲有埃及既自來水唔安全，千祈唔好直接飲，要飲就飲酒店或旅行團提供比你既樽裝水，因為每日有兩支，所以一定夠。
我跟既係星晨，樓主嗰間旅行社我未聽過，所以比唔到意見。至於搭機，我搭既係卡塔爾，呢間絕對係一流既航空公司，無論飛機或服務都十分優良，最緊要係佢應該會平過你坐星航去，如果想慳番啲錢就應該揀坐卡塔爾航空既團。手信方面，沙樽、蘆葦畫、香水及象形文字T恤都係好選擇，只係蘆葦畫及香水都幾貴，買親都要一千幾百，樓主要量力而為。

要帶多些財帛去就真，這里一枝水仲貴過汽油，
話一萬蚊有找，其實消費甚高。

我地就每人埋單用左total:$25000