意大利及瑞士14天一問

樓主個行程同小弟去年八月既行程幾乎一模一樣，只係多左米蘭，所以小弟應該可以比到一啲有用既意見你。
首先樓主個行程都好順，由南到北無咩問題。講番火車，小弟建議你只需買係瑞士通行既Eurailpass，係意大利就逐程車買飛，就算由意大利過境到瑞士既火車都係買單程飛。點解﹖因為我計下條數，發覺係意大利搭火車，連埋過境嗰程，都只係搭左六次咁多。呢六程火車順序係羅馬至佛羅倫斯、來回佛羅倫斯及比薩、佛羅倫斯至威尼斯、威尼斯至米蘭及由米蘭至瑞士既Spiez，加埋由羅馬機場至羅馬市中心嗰程都只係七程火車。其實呢七程火車你都可以係羅馬既Termini好輕鬆咁買到飛，就算樓主想book定位先，你都可以學我咁上意大利國鐵既網站reg番個account去訂飛，然後去到羅馬Termini攞就得啦。至於機場出市區嗰程，由於架車班次密，去到先買都得。所以你根本唔駛買意大利火車証，因為雖然你買左係會方便啲，但由於你搭既火車次數應該唔會好多，買左張証可能會嘥左。
但點解瑞士就要火車証﹖因為瑞士既火車飛比意大利貴(小弟既印象如此，煩請高人指正)，而且瑞士同意大利好唔同，意大利每一個城市既觀光價值都好高，所以坐火車既機會未必咁多。但由於瑞士最有睇頭既景點，如少女峰、馬特杭峰等，全部都要由酒店所處既城市專程搭火車來回先至去到，所以你係瑞士搭火車既機會比係意大利多好多，所以你買火車証會方便好多同平啲。要注意既係你有Eurailpass火車証未必真係會慳好多錢，但最緊要係你慳番逐次買飛既手續同時間，剩係呢樣野已經好值得。小弟當時既酒店係去少女峰頂既中途站小鎮Wengen，由Wengen去其他任何地方都要先搭火車去Interlaken Ost先，然後先可以轉火車去其他地方。而且由Wengen出發仲要唔係直到Interlaken Ost，仲要先經中途站Lauterbrunnen！而回程時更要成個過程做多一次！你唸下如果我次次都要買飛會煩成點﹖另外，Eurailpass唔止包係有限日期內坐無限次火車，而且佢仲有其他優惠，例如佢就包埋一程係Interlaken最多3個鐘既遊湖船河，而上少女峰嗰程車雖然唔係免費，但有Eurailpass有折頭，而且我記得係成5折咁多。我當時用到個pass都幾盡，除左上少女峰，我仲要係同日去埋馬特杭峰，當天一日內我搭左成10程火車！如果無Eurailpass你話點搞﹖

講番行程，去羅馬則可以買一張11歐羅既pass，張pass包你3日免費任搭地鐵，極之方便，我建議樓主一定要買。羅馬係整個意大利既精華，小弟認為必去既有梵蒂岡城(包括聖彼得大教堂及梵蒂岡博物館)、鬥獸場、萬神殿、許願池等。佛羅倫斯就要去百花聖母大教堂、烏菲茲博物館、藝術學院博物館睇大衛像、米開蘭基羅廣場鳥瞰全城、老橋。威尼斯只需遊下聖馬可廣場及聖馬可教堂就夠，如果時間夠，可以去外島睇埋玻璃廠。小弟無去米蘭，所以講唔到多野，不過佢既大教堂一定要去。
至於瑞士，上述既少女峰及馬特杭峰係最熱門既名山，香港人或旅行團特別鐘意去埋鐵力士峰。至於係近法國邊境既白朗峰就係較冷門既景點，不過睇相都係好靚，佢係歐洲好受歡迎，只係少啲香港人去，樓主可以唸唸。樓主可以去香港既旅行社辦理瑞士火車証。
以下係意大利國鐵既網址﹕
http://www.trenitalia.com

o係香港經旅行社買定歐洲火車套票好d, 可以問下agent點買.

意大利上晝同晚上有溫差, 我七月時上晝熱到溶晚上都幾涼架. 你九月去應該要帶多少少衫. 至於瑞士, 我係八月去, 八月都好涼, 二十度左右, 九月應該會凍凍地.

錢方面, 意大利d野都貴架, 特別係米蘭. 不過去完瑞士, 你就會覺得意大利d野一d都唔貴. 瑞士食一餐最最最平都要港紙70幾蚊呀. 不過我當時係學生, hostel, 早餐, 車費一早俾左, 淨係買下三文治同朱古力, $500用到5日.