有關攝影技巧問題~

其實用閃光燈都唔一定唔靚的,你可以用反射閃光或者加柔光設備去改善,不過內置閃燈比較難做得好,可能要投資外置閃光燈先得.
其實單單用自然光都係一個辦法.要避免快門太慢引起手震最直接的方法就係提升快門速度,你可以透過加大光圈或者加高iso去達成.加大光圈副作用就係景深會變淺同埋光圈太大的話會令相片銳利度降低.仲有一個更切身的問題就係支鏡頭光圈唔夠大.加高iso副作用就係會增加雜訊,所以要適可而止.
我會建議你用iso 400至iso 800,在這個範圍內D90的雜訊控制還不錯的.你可以先用iso 800,得既話慢慢降低.
用光圈先決開盡光圈似乎係最有效方法,但之前已經講咗開盡光圈畫質較差,建議縮小半級至一級視乎快門夠唔夠快.
咁快門幾多先夠快呢?咁就要先認識安全快門,這是一個最慢但又不會手震的快門參考值.會因人而異,最終要自己慢慢試.參考值係焦距的倒數,即係焦距係50mm,快門就不要慢過1/50秒.D90有1.5倍焦距增長,所以理論值係1/75秒.你會發覺其實都頗難達到的.
不過好好彩D90既kit lens係有防震既,咁就可以慢好多.官方數據係四級防震,原本1/75秒先得,理論上1/5秒己經可以,不過我覺得好小人可以用到咁盡.我覺得以1/10秒為目標較可行.之前都提過安全快門跟焦距有關,如果你用較短焦距其實可以更慢,例如25mm咁,目標就可以係1/5秒.
要試自己的安全快門你可以用快門先決,例如將鏡頭扭去50mm,iso 800,快門先決1/10秒,影出來睇下有冇手震,有既話試1/15秒,唔得再試1/20秒,得既話嗰個就係你安全快門,當然唔好試一張,要試多啲.跟住試唔同焦距,記在心中.下次要影既時候就知道自己有冇問題.
另外握持相機手勢係好重要的,第一千萬唔好用Live view,慢快門時穏定性極差.第二係手臂要貼實身體及相機要貼實面部,我發覺好多人影相都係面部離開觀景窗的.如果你發覺50mm,1/20秒都手震的話,好大可能就係握持相機有問題.
另外要明白就算你自己唔震,慢快門係唔可以涷結動作的,唔該叫你啲朋友坐定定先好影.