初哥想買天文望遠鏡

首先矯正樓主一個錯誤既觀念，觀星唔一定要用天文望遠鏡，好多時就咁用眼及雙筒望遠鏡已經睇到好多好靚既天體，而且大部份好睇既野係香港用天文望遠鏡都睇唔到。除左香港光害嚴重之外，天文望遠鏡最基本既特性就係視場狹窄，即係話佢無錯可以將啲天體放到好大，但支鏡能夠睇既範圍卻極窄，一般天文望遠鏡可以望到既野只係得一、兩粒星或一個用眼睇就好細既星雲或星團。如果樓主係想睇壯觀既星座，用眼睇就得，甚至一啲光亮既星團，如七姊妹星團，用雙筒望遠鏡睇反而最好，因為可以好輕鬆咁睇晒七粒，你用大支鏡反而只係睇到當中一至兩粒星。
咁天文望遠鏡愛黎做乜﹖佢主要係用黎睇行星、星雲及星團。呢幾類天體因為就咁用肉眼睇只係一點光或極矇，所以要用天文望遠鏡將佢地放大黎睇細部。因為要集中睇一個目標，所以天文望遠鏡視場極窄既特性反而就變成優點。不過，香港光害太嚴重，好天既日子唔多，一年都唔會有好多日好似樓主咁唸可以係天台用大鏡睇星，尤其是啲星雲星團真係暗到顛，即使用極高級數既天文望遠鏡去搵都可以搵你成晚，就算咁好彩比你搵到個影像都只係似有若無既極淡幻影，絕對無你睇相咁精彩。但好彩既係我地係香港夜空都容易睇到月球及其他幾粒大行星，觀察呢幾個天體先係天文望遠鏡係香港既主要用途。
如果樓主真係想學下野先，小弟建議你先去參加多啲觀星活動，有閒錢既就買一個優良既雙筒望遠鏡玩下先，樓上提到既7x10望遠鏡已經係好好既選擇。到樓主對星空有一定認識先至去請教啲天文前輩介紹一啲專門賣天文儀器既店舖度買支啱用既鏡。如果樓主貿然買支鏡番黎但最後發現根本無咩睇，咁就真係好唔抵。

2009-06-16 00:40:58 補充：
想更正一樣野，小弟建議樓主買既係樓上梅西爾兄提到既10x50或7x50雙筒鏡。另外，天文望遠鏡其中一個最重要既用途係用黎做天文攝影，如果樓主唔係對影天文相有所追求，咁買支大鏡番黎真係無咩用。

02樓主講得無錯;如果係初哥的話,我本人覺我最好係10x50的雙筒望遠鏡就可以啦,等有一定鍾愛或興趣真係濃厚時再買支好鏡去睇噉至係醒目囉;
今年係2009國際天文年,所以hk應該有好多嘢可以俾你去參與或參加的;如果唔介意的話可以提供幾個天文會俾你自己考慮考慮去join佢哋架;
1>星河科研社 www.astro.hk
2>坐井會 www.skyobserver.org
3>2009 國際天文年 中國香港分站 www.astronomy2009.hk
4>香港天文總會 www.hkal.org.hk
5>香港天文學會 www.hkas.org.hk ;
另外02樓主都有講到的七姊妹星團真係好睇架,到時你睇吓就知係唔係啦;
希望幫到你啦.再有問題都希望幫到你;

好似話新手第一支買7倍至10倍會好d
兩支都一樣咁好…

有人就話要睇曬成個星座先係好
難d喎！邊有咁誇張的望遠鏡呀？！
例如：獵戶座(視場高：~30deg，闊：~15deg)。一般雙筒鏡視場~7deg(10x50)，不能全部望曬，淨望條腰帶就可以。相反，用相機配80mm鏡頭就可以望曬。

咁其實第一支既雙筒,應該點揀?
同埋,大約要幾錢嫁?~
主要選擇口徑，入門雙筒鏡50mm就最好(選60mm有點重)
(eg:10x50 ，7x50)。
國產鏡：~$1xx ----(我用緊)
平價廠鏡：~$6xx
nikon、olympus廠鏡：~$2xxx
名廠(蔡司，leica)：~$5xxx~7xxx
而學會方面，我建議戈朋友你不用先加入，而應該是加入論壇如天文論壇：http://www.hkastroforum.net/index.php
希望可以幫到你