未試過面對「合約」的問題…
事原一個月前, 經一個不太熟的朋友(楊先生) 介紹下認識了李先生,
李先生想裝修, 搵我爸爸報價,報咗價之後, 決定搵我爸爸做.
俾訂金當日, 約我爸爸去茶樓飲茶,
差唔多食完, 李先生拎出一份嘢, 大約有5-6張紙, 叫我爸爸「睇下有冇問題」,
我爸爸睇緊第一頁, 係我爸爸之前的報價, 李先生就拎出二萬二千訂金.
由於家裡等錢洗, 我爸爸好想傾成呢單裝修,
亦都以為全部都只係佢之前的報價單,
所以未睇完就簽了名…嗰份紙一式兩份, 都有我爸爸簽名.
過咗差唔多一個星期,
我爸爸先發現原來最後有一張寫咗「條約」的紙,
當中有好多不公平的條款, 例如:
「我爸爸要提供六個月的保養.」
「工程完成後當發現損壞等情況, 李先生通知我爸爸上門維修,
我爸爸必須在三日內前往維修, 如有推卸責任, 或借故拖延時間,
李先生可以不經我爸爸同意另外搵人維修,
而維修的費用由我爸爸支付.」
「工程必須在四十日內起貨, 如有超過, 一日支付李先生一千元.」
「雙方同意以上內容.」
我爸爸非常擔心以上呢份「合約」中的條例,
當然, 我爸爸事實上係簽咗名, 但係
(一) 李先生冇講過原來有此合約條例
(二) 條例都唔係雙方傾妥, 起碼我爸爸沒有同意這些內容
(三) 條例有很多不合理、不公平
(四) 只有我爸爸的簽名, 李先生沒有簽名
(五) 前面報價單中的工程, 有好多都由李先生決定取消而冇做的
我爸爸想知道 :
1) 呢份合約究竟有冇約束力的? (因為以上所講的五個原因)
2) 李先生係咪「詐騙」呢?
3) 有些工程由李先生決定取消而冇做, 實際上做的工程已和合約中所提及的工程不一樣, 咁呢份合約是否已沒有效用?
(爸爸擔心合約內容中有些工程已由口頭上取消, 不知李先生會唔會其後表示我爸爸冇完成工程, 要求我爸爸做返又唔俾錢)
4) 如上題是, 咁最後一頁的條例是否都沒有效用了?
5) 如果此事鬧上法庭, 或小額錢債審裁處, 爸爸是否最終都會冇事的?
不好意思, 篇幅頗長, 但由於我爸爸已被呢件事搞到佢食唔安、瞓唔落,
又擔心個中間人楊先生同李先生兩個人唔知會搞出咩「花臣」, 每日都擔驚受怕…
我雖然都已安慰他, 亦覺得「邪不能勝正」的,
不過爸爸仍然好擔心, 有好幾次表示「想喊」…
我真心希望有人可以解答以上疑問, 好讓我爸爸心安,
先感謝解答的人~!!
先感謝三位的回答~! 由於第一份合約中的工程已有改動, 咁而家我可唔可以另外訂正一份新的合約, update返而家實際有咩工程, 總數幾多等等, 再另加一句 「以呢份合約為準, 之前於xx年xx月xx日簽署的合約內容取消」, 叫李先生簽名, 如簽了名, 之前的合約內容是否可以取消? 定係兩份合約內容都可生效呢? 謝謝~!
另外, 我發現合約中是有兩個簽名位置, 現在只有我爸爸簽了名, 是否都仍然生效? 有冇得拗?
謝謝 kenzzz_ch 的補充~! 正如之前所講, 最初的合約中有好幾樣工程, 而我爸爸諗住都可以賺都筆錢, 為了與李先生「好來好去」, 應承了免費做幾個小櫃在廁所, 但我爸爸已講明, 李先生肯做咁多櫃先會送呢幾免費的小櫃, 當作贈品般. 現在李先生已取消咗幾個櫃唔做, 咁我爸爸是否不需要附送呢幾免費的小櫃給李先生? 不做呢幾個免費的小櫃有冇問題呢? 另外, topsychan 先生: 我都表明家裡等錢洗, 爸爸已「窮到燶」, 可以找律師都不用麻煩大家了, 你明白嗎?
謝謝 kenzzz_ch 的再三解答~!! 問清楚了爸爸, 原來事實有點不同, 唔好意思~ 原來最初我爸爸的報價單沒有呢幾個在廁所的小櫃, 但之後李先生的合約內他自己加了呢幾個小櫃上去. 那個時候, 李先生仍未取消廚櫃、衣櫃的, 其後因為李先生與我爸爸發生了一點拗撬, 然後我爸爸先對李先生講 : 你肯做咁多櫃先會當作贈品般, 送呢幾個小櫃給你的. 但現在李先生已取消所有的廚櫃、衣櫃, 不做了, 我爸爸亦不需要叫木工師傅上門做櫃, 咁我爸爸冇理由自費叫木工師傅上門做這些沒有收錢的小櫃吧? 但係合約又有這幾個小櫃, 咁我爸爸需唔需要做?
另外有一個廁所的洗面盆櫃, 爸爸的報價單及合約中都有的, 是與廚櫃、衣櫃一起做的, 因為只做一個櫃, 與做一大組廚櫃、衣櫃的價錢不同的, 如果李先生肯做廚櫃、衣櫃, 咁廁所的洗面盆櫃搭單做埋就唔會好貴的. 而家乜木櫃都冇做了, 點搭單做埋個洗面盆櫃俾李先生呢? 唔做呢個又得唔得?
