戰艦分幾多種?各有什麼不同功能?

樓上第二位小朋友抄既野大致上都啱，不過有啲資料嚴重過時，依家啲新戰艦仲有幾多隻仲用緊蒸氣輪機﹖而且“戰鬥巡洋艦”係一個老過你阿爺既term，早係二戰之後已經無人用。
樓主問既問題好複雜，要從之前既無畏艦年代既海軍講起。係嗰個年代，世界各大國既海軍主力係所謂既戰列艦(Battleship)。佢地單隻艦既噸位一定係全艦隊最大，而且佢地存在既目的好簡單，就係搭載儘量多既大炮並發射儘量多既巨型炮彈去摧毀對方。支炮同炮彈有幾巨型﹖去到二次大戰既戰列艦末期，最巨型既大炮口徑達480毫米，每發炮彈超過一噸重。
不過戰列艦太巨型太昂貴，唔可以做得多，就算係人類史上領土最廣、最強大既英帝國，係國力顛峰時既二十世紀初都只可以有15隻左右既戰列艦，所以要靠其他戰艦幫戰列艦打仗。
巡洋艦(Cruiser)就係呢啲輔助艦隻中最重要既。，佢既責任原本係帶領艦隊入面其他更小既艦隻去搵敵人既艦隊係邊，然後叫戰列艦所在既主力艦隊來對付敵人。不過其實巡洋艦係縮小版既戰列艦，佢地既火力都好勁，去到二戰時，巡洋艦同一啲所謂既“袖珍戰艦”已經唔係咁分得清楚。德國海軍中人所共知既名艦如尤金親王號、沙恩霍斯特號及格耐森瑙號就係呢種好難分辦係袖珍戰艦定係巡洋艦既戰艦。
驅逐艦(Destroyer)係一戰前已出現，既然佢叫得做“破壞者”，究竟要破壞啲乜﹖驅逐艦天生既敵人就係潛艇，佢係艦隊入面既任務主要係反潛，早期驅逐艦主要係用深水炸彈對付潛艇，打水面艦艇就用魚雷。
時至今日，戰列艦已經全部退役，大國艦隊核心已經改成搭載飛機既航空母艦(Carrier)。上面有人話已經無左巡洋艦，咁講只係一半啱，因為依家起碼美、俄兩國海軍內仲有巡洋艦呢個級別，但事實上現代驅逐艦既噸位愈來愈大，戰力愈來愈強，同巡洋艦已經無咩分別，所以其他國家索性取消埋巡洋艦呢個艦種名稱。但係美、俄艦隊入面，驅逐艦仍然係跟傳統專注反潛，而巡洋艦就改左行唔去搵敵人，而係專注艦隊區域防空。
巡防艦(Frigate)有時叫護衛艦，係噸位比驅逐艦更小既艦艇。咁多年來巡防艦既任務都無咩變，都係做啲較次要既工作，例如艦隊警戒，係艦隊前方偵察及聯絡等。大國海軍已經較少開發新既巡防艦，反而小國就較多引入巡防艦作為海軍主力，貪佢夠平又好用。
至於潛艇，以功能黎分就有攻擊潛艇及戰略潛艇兩種。以動力黎分就有常規動力及核動力兩種。攻擊潛艇係用來獵殺敵人既潛艇及其他戰艦，而戰略潛艇就載住好多支彈道飛彈(Ballistic Missile)係大海到週圍走，一有命令就射晒啲飛彈出去攻擊敵人重要戰略目標。所有戰略潛艇都係核動力，而攻擊潛艇就核動力及常規動力都有。常規動力多數指用柴油機及發電機推動既潛艇，但依家有啲新既潛艇係用絕氣推進系統(Air Independent Propulsion)推動，比柴電潛艇好得多。
大國海軍入面有好多專門用作兩棲登陸既戰艦，其中最大既係兩棲攻擊艦(amphibious assault ship)，佢基本上係一隻航母，不過最有趣既係佢個大肚入面會裝左好多架用作搶灘登陸既既氣墊登陸艦及其他各式支援船隻。美國有好多個型號既兩棲攻擊艦，例如塔拉瓦級和硫磺島級，而最新既係黃峰級(Wasp)。
除左戰艦，海軍仲有好多其他支援艦艇。所謂三軍未動，糧草先行，一國海軍勁唔勁除左睇佢既戰艦打唔打得之外，仲要睇佢既支援船艦好唔好先得。通常大國遠洋艦隊都會有一隻大型補給艦隨行，隻艦大到裝得晒比成支艦隊用既武器、油料、食物等補給品，而且隻補給艦仲要可以係惡劣天氣下於行駛中為其他戰艦補給。順帶一提，以前美國佬好寸咁話中國海軍無能力做以上既行駛中補給，話呢啲係高技術，中國無咁易學到，點知幾年前中國就係一次演習中完成第一次行駛中補給，美國佬即時收聲。
除左補給艦，支援海軍既仲有油船、拖船、駁船、領航船、破冰船等，但有四種支援船值得講下。有啲大國海軍會有專門既醫療船，例如美國既仁慈級(Mercy)，而中國近年亦已有一隻專門既醫療船入役。而美國海軍由於財大氣粗，所以佢會有造專門用黎指揮作戰既指揮艦，佢地就係大家熟悉既藍嶺級(Blue Ridge)。另外有兩種支援艦艇都與潛艇有關。第一種係潛艇母艦，佢地係專門係大海上為潛艇補給及維修，要水下部隊可以好好作戰，一隊專業既潛艇母艦部隊一定唔少得。如果潛艇出左事，就要靠專門既深海救難潛艇(DSRV)出馬。DSRV好細隻，唔計駕駛只裝到十幾廿人，但佢可以潛入幾千米深海底，救出沉入海底潛艇既船員。不過呢啲絕對係頂尖高科技，據小弟所知只有美國及英國有相關既船隻，俄羅斯都好似有，不過唔肯定。而且DSRV每次出動都勁煩，從有潛艇出事到DSRV去到事發現場通常都要一個星期，好多時DSRV落到去出事潛艇時都已經太遲，2000年俄國庫爾斯克號事件就係最好例子。

2009-06-14 09:38:57 補充：
樓上有人提到小型既飛彈快艇，事實上呢種艦艇既前身係魚雷快艇，係一戰時已經出現。後期飛彈出現時就出現埋飛彈快艇。雖然飛彈快艇好細隻，但戰力可以好可觀。1967年六日戰爭中以色列有隻護衛艦就係比埃及飛彈快艇既蠶式飛彈(西方叫冥河飛彈)擊沉。不過由於近年大型戰艦既防空能力增強不少，飛彈快艇係各國海軍已經買少見少，而魚雷快艇更係基本上絕跡。

2009-06-14 09:45:50 補充：
至於巡邏艇，一般都唔屬於海軍，多數隸屬海岸防衛隊、海監處或簡單咁屬於水警。通常呢啲巡邏艇執勤時都係獨立行事，與海軍無關，只係緊急時候先至搵海軍做後盾。

玩iorn of heart同睇wiki會幫到你~

戰艦分幾多種?你指是不是戰列艦,
戰艦（Battleship），是人類創造的最龐大又複雜的武器系統之一，另稱戰鬥艦、戰列艦（中國大陸）。它是海軍作戰艦艇，特色是大口徑火砲、厚重裝甲、高噸位,用來作遠程打擊敵手的戰略武器,其後戰艦被航母取代。


戰艦隻類型:航空母艦 、戰列艦 、戰鬥巡洋艦、輕巡洋艦 、驅逐艦、護衛艇、巡防艦 、魚雷快艇 、飛彈快艇 、巡邏艇。航空母艦,主要以戰機作戰,防空導彈、機槍等。戰列艦使用大口徑的大炮、機槍、高射炮。戰鬥巡洋艦和戰列艦大致一樣。戰鬥巡洋艦是大火力與高機動力相結合的戰艦性能較好,但防護裝甲比戰艦/戰列艦薄。輕巡洋艦:現代巡洋艦裝備有飛彈、火炮、魚雷等武器。有些巡洋艦可攜帶反潛直升機；動力裝置多採用蒸汽輪機，少數採用核動力裝置。隨著海軍航空兵的崛起，巡洋艦的地位日漸衰落，在現代戰爭中巡洋艦實際上已經消失了，它們的作用完全被驅逐艦代替。驅逐艦是一種多用途的軍艦，1890年代至今海軍重要的艦隻之一。一種專門發射魚雷的可以摧毀大型軍艦的魚雷艇,裝備88-102/以上毫米艦炮以及450-533毫米魚雷發射裝置以及地對空飛彈、反艦飛彈。護衛艇:是指一種噸位小於巡防艦，但是高於巡邏艦，輕武裝的水面艦艇。巡防艦是指在近岸海區與其他兵力合同或單獨地執行殲滅敵方輕型艦船，為大型艦船擔任警戒和護衛任務的水面軍艦
,攔截來襲的威脅（多為飛行物，如飛彈、飛機、直升機、無人載具），以及各種救援任務。魚雷快艇:噸位小，航速高，機動靈活 ,航行速度30到40節，有的可達50節艇上裝有魚雷2至4枚。飛彈快艇 、巡邏艇: 導彈快艇噸位小，航速高，機動靈活，排水量通常為數十噸至數百噸，航行速度30到40節包含魚雷、水雷、深水炸彈和艦對空導彈等。搭配的感測系統有搜索、探測、武器控制、通信導航、電子作戰等。巡邏艇主要用重機槍為主要武器 ,

只係指Battleship級?
有:
Ironclad: 仲係用蒸汽機
Dreadnaught: 第一種重裝甲重火力ge戰艦
Pocket battleship: 二戰德國專利, 迷你戰艦
Fast battleship: 主要賣時速高
Heavy battleship: 極重火力, 裝甲,