k仔問題/有關律師

你無講 200幾克係純度定粉末. 如果係純度, 就直接了當 200幾克. 如果係粉末, 咁K仔純度大約55%, 即係200克粉末大約含有110克k仔. 都係同一個 band.
根據上訴庭在2008年6月6日SJ v 許守城 (CAAR7/2006) 一案的最新判刑指引, 販運或藏有可供販運1克或以下的E仔及K仔可以藏毒為交替, 判刑由法官決定. 1-10克判監2-4年. 10-50克判監4-6年, 50-300克判監6-9年, 300-600克判監9-12年, 600-1000克判監12-14年, 1000克以上判監14年以上.
以上判刑係各級法院都要遵守, 法官無得自行更改. 亦無任何求情因素可以令佢得到大幅減刑 (除非大吉利是佢本人身患絕症, 得幾個月命 - 真嘅, 唔係咒佢!) 換句話講, 除非佢打得甩, 否則一定會坐監 (未夠18就判更生 / 勞教). 純度200克大約8年. 純度110克大純7年.
你無講佢被捕情況, 唔知佢有無機會打得甩. 只可以話: 認罪係唯一求情理由, 可即減三份一. 我當佢判 8年, 即係 96個月. 認罪可減 32個月, 即係判刑 64個月. 在獄中行為良好再減三份一, 即係減多21個月多 d, 實坐42個月多 d, 4年唔夠. 法官無得自行更改
要請律師, 可揾事務律師代為介紹及轉聘大律師 (單案會轉上高院判刑, 普通事務律師唔可以在高院發言, 所以要請大律師). 一般做刑事嘅事務律師 / 大律師都識求情, 小弟唔方便介紹. 大律師高院求情一般約$15,000 - $20,000一堂. 事務律師收費約 $12,000一堂. 最低消費約三萬幾, 重係求神拜佛一堂搞掂, 否則無四、五萬收唔到科. 但係有哂判刑指引, 法官無得自行更改刑期, 所以 d 錢其實都係白使.

個人意見, 不如申請法援律師盡人事求情, 留番 d 錢安家好過.