我想知,初階機與中階機有d咩分別?

初階機跟中階機除咗用料外,最大分別係對難度題材既可靠性同把握能力.
我覺得除咗有拍片需要外,真係冇乜必要換500D,你朋友講得啱,初階機換初階機,除咗像素多啲,mon靚啲等無謂嘢外,拍攝能力跟本冇乜大提升.
D60唔知等到幾時先出同埋會係乜規格,所以無從比較.
至於D90,500D同50D就有以下分別.
三部之中只有50D係鎂合金機身,耐用堅固,不過都有人認為重係一個缺點.但係如果你日後購入大型鏡頭,咁機身堅固啲始終好啲.而且有防塵防水滴設計,微微雨照用都得(當然鏡頭都要係防塵防水滴設計).其他兩部只係塑膠機身.
觀景窗方面,50D同D90都係用五稜鏡的,比500D的鏡箱較光亮,有利手動對焦.例如影微距就會好有用.
來到分別最大的對焦及連拍.50D係9點全十字型對焦點,中間一點配合f2.8或更大光圈鏡頭仲會變成雙十字,其他兩部都只有中間一點係十字,其他點只係單線型,十字型既敏感度係單線型既三倍,即係較準較快,當你要影一啲動態題材或者極淺景深時唔可以下下用中央對焦點對完焦再構圖就會好有用.
連拍亦係50D最快,達到每秒6.3幅,D90只有每秒4幅,500D更只有每秒3.4幅.連拍快有助在動態題材時影啱你要嗰一刻,例如打藍球啱啱入樽嗰下.
閃燈同步亦係50D最快,有1/250秒,其他兩部只有1/200秒,這個速度越快越能在強光下用閃光燈時加大光圈,有利淺景深及加強閃燈有效距離.
至於90D好處就係可以反mon同拍1280x720影片,不過要留意佢拍片係冇自動對焦的,影片格式又係極大食既motion Jpeg.
500D拍片係1920 x 1080,不過只係得每秒20幅,流暢度比較差,影片格式係H.264,較慳位但要專用軟件先可以做編輯.
其實單講影相梗係中階機既50D好啦.不過大部份人都係鐘意樣樣有,所以在爭持激烈的入門機市場係有必要做到好多功能的.但係最有用既就會留翻俾中階機.
你有冇需要影難度題材呢?有的話當然係換機好,如果只係影下靜態題材或者生活相等,咁買鏡頭似乎實際啲.