澳門2日1夜行程

我想你首先去嘅地方行程：

澳門島中區（議事亭附近）：

大三巴

聖安多尼教堂

澳門博物館

食禮記雪糕

澳門瑪嘉烈餅店

歎爽滑豆腐花--頤德行


澳門島南西區（媽閣廟附近）：

觀光塔(要買飛)

海事博物館

媽祖廟

離島（氹仔地方）：

龍環葡韻博物館

食豬扒包

大菜糕

你都係想去好多地方啫，三日時間，都要排得好少少行程．

唔知你覺得點呢？

先去聖安多尼堂，之後去大三巴，然後入澳門博物館，響大炮台出口出，順便行下大炮台，之後如果你唔怕行，可以響大炮台另一方向行落山，去禮記食雪糕（禮記離中區都幾遠，可能要行十幾二十分鐘），如果怕行，響返原路落黎，去食煲仔翅，之後去食豆腐花（頤德行都幾難搵架，唔識點教你搵），之後出返南灣金來區食安德魯蛋撻．返酒店放低D手信休息吓先．

晚上去漁人碼頭

第二日坐bus去媽閣廟，海事博物館（響媽閣廟對面），港務局大樓，亞婆井，可以順便上去西望洋山，之後去觀光塔（午餐？）．坐bus去氹仔龍環葡韻博物館D地方，之後到都已經差不多時間要排隊買豬扒包啦（最出名係大利來記，不過個人覺得佢嘅豬扒包超難食，唔知點解次次都見起碼有幾十人排隊買，個人覺得求其一間茶餐廳嘅都好食過佢），之後去買莫義記大菜糕（響官也街，我最近食過佢嘅芒果雪糕，勁香），再之後行去龍環葡韻，順便去埋上面間教堂，響龍環葡韻睇埋日落（以前日落都好靚，而家俾D巨無霸賭場遮住，紅樹林又冇埋，又沙塵滾滾，又冇雀仔睇，差咗好多啦）．

如果唔想係澳門食，可以響氹仔食埋晚飯先，可以考慮下去阿曼諾（響官也街口，向龍環葡韻嗰邊街口，向左轉，直行大約５分鐘，食地道葡國菜），或者去小飛象（官也街另一邊路口，向左轉，行２分鐘左右，食土生餐），或者其他如木偶，熊貓．．．如果想食中菜，大東同紅記都好出名，誠興水蟹粥都好出名（不過超難食）．全部都響官也街．


第三天的行程要去威尼斯

希望幫到你.
～預先祝你們在澳旅途愉快～

2009-05-06 18:27:10 補充：
抱歉未能幫上;另外02位朋友部份資料係網上的廣告,有D係OK啦,有D真係唔得架,請小心;
祝你旅程愉快;

最好第一日去氹仔同路環
因為威尼斯人係氹仔, 而且都幾大, 你再賭埋真係可以玩通宵
咁去完又可以順住去路環睇下
跟住去氹仔小市集食下野

咁第二日就留番係澳門四圍行下買手信差唔多啦