✔ 最佳答案
<我今年14歲>
你得 14 歲，仍處增高期，就不需要太急於練大隻或增肌，應該做多點帶氧運動，例如跑步，游水，打籃球等，加強心肺功能，強化骨骼，更能幫助整體發育添！況且，舉啞鈴或其他肌肉鍛鍊都要有良好的心肺功能作為基礎的，不要未學行先學走。
到你 16 歲，才正式練肌肉吧，而且要正式去學的，不要自己胡亂試。康文處轄下健身室最適合你了，價格相宜，基本設備齊全，有免費教練，又唔會 hard sell 或以不良手法推銷。
<一個星期1,3,5都會每晚8點-9點練肌肉.,練既內容:掌上壓40下.,舉10lb啞鈴40下.,分3次做.,做完一次休息 2min>
正如上面講，你現在要增肌是早了點，唔係話唔可以，而係根本你年齡未到肌肉發展的時間，你就算努力練，成果的都有限。
而且掌上壓的增肌能力不大，只係令你有點 shape，有點肉，不會明顯練出肌肉的。
舉啞鈴方面，亦唔係咁樣計的。以增肌為目標的話，揀一個合適重量，每次分開三至四組，每組 8 - 12 下，每組之間休息 1 分鐘。
所以，你每組舉成 40 下咁多，好明顯係太輕了，沒有增肌效果的，只會練出耐力和紮實。
不過最尾都係個句：你暫時唔需要追求肌肉住，先做做下打波游水，都 16 歲就去做 gym 吧。
<發覺自己做左咁耐,都好似無咩肌肉>
一來係上面所講的問題啦，令你無效果，二來你所謂<咁耐>係幾內先？一般練健身，正式去 gym 度跟教練舉鐵，都要 3 個月至有基本的雛型。
唔好諗住響屋企練都可以邊大隻，更加唔好幻想幾個星期有成果。
<跟住我就改變下時間.,差唔多日日練>
要增肌就要俾肌肉休息，一般每次練完後，最起碼要俾有關的肌肉休息 48 小時 (但期間可練別的肌肉組)。
你日日練，即係肌肉無得休息，想大隻都難!
另外要留意生活習慣，飲食和休息的配合：
1。休息。最基本就係睡眠，你每晚睡眠夠 8 小時嗎？定時定候訓覺，抑或晚晚都唔同鐘素呢？
都市人好多都會忽略睡眠的，但睡眠卻不一般人想像的還重要，因為身體好多修護 / 回復 / 增強的程序作用，都是在睡眠中才發揮出來的，睡眠不足，連帶呢 d 修護 / 回復 / 增強的程序都沒法正常進行，體能也無發增長了。
2。營養。運動後必須要補充碳水化合物和蛋白質，前者為身體提供能量，後者作為強化肌欲和修補運動後的損失，兩者缺一不可。好多做運動的人，都會運動後立即食少少野的，例如一份三文治，一個生果等等，就係為了補充營養了。
如果你唔夠營養，身體沒法補充失去能量，肌肉欠缺蛋白質去強化，體能就沒法提升，甚至會退步添。
至於食極唔肥，也是要竅門去解決的。天生瘦的人如何提升營養吸收呢？有幾個要訣的：
－ 少食多餐，即係每餐唔需要勉強食好多，但係要分多幾餐來食，例如每天加多個下午茶（三文治）同食宵夜（例如一個麵）；
－ 多食蔬菜，蔬菜同水果對腸胃吸收好大幫助的。建議每日最少食一個橙或蘋果，食夠兩個更好；
－ 多食碳水化合物和合蛋白質，呢量樣野都增重同增肌都非常重要。碳水化合物合提供能量，而蛋白質係製造肌欲的重要成份；
－ 少食油膩，好多人都會誤會，以為瘦人要食多點脂肪。其實剛好相反，瘦人多半都係腸胃吸收力低，而大量進食脂肪會加重腸胃負擔，結果令吸收力更差！唔係叫你唔食油，不過要少食，清清地就可以了。
3。放鬆自己。唔少瘦人都係容易緊張，甚至帶點神經質的。所謂心廣體胖，要心情舒暢，懂得放鬆自己，才會長肉的。我自己情緒緊張的時期，真係點食點操都谷唔漲肌肉的。
要記住，體能也好，增肌也好，係好漫長同要好多野配合的，而且要好有恆心。
