✔ 最佳答案
我成十七歲人，喺你呢個情況入面我活咗十五年。另外嗰兩年就係喺我一兩歲，本身都冇乜需要有記憶嗰陣………………………
我嘅情況衰到係小學嗰陣只要連續兩星期冇唔記得帶嘢返學，唔駛俾老師寫手冊，我mama已經會送小禮物俾我做獎勵。而一個學年我都係攞得一兩件禮物………
除非你之前一直都好好，可以一下就記得哂所有嘢，而你而家係突然間好似連屋企點返都唔記得咁嚴重，咁就梗係去seek for help好啲啦！但係你連自己啲徵狀都記得，我覺得冇乜大問題！我情況嚴重過你咁多，都生存到呢日，所以其實你唔駛驚！有好多方法可以幫到你記得啲嘢！
你唔記得同呀媽講過乜、唔記得落堂say咗goodbye未、唔記得落咗堂未呢啲其實係因為你覺得啲嘢唔重要，你唔上心啫。如果係好似落堂打larng鐘之類基本上冇乜影響嘅嘢，我建議你都係唔好嘥自己啲記憶，唔好理佢啦！反正老師走咗即係落堂、個老師嚟咗就係上堂、啲人開始問人要唔要去toilet就係recess。就算係你唔記得咗放學個鐘打咗未，唔識得要返屋企咁大影響嘅，咁你見到啲人執嘢你咪問下隔離位：「而家係咪放學啦？」咁佢就會答你架啦！好似好傻咁，但係其實我都成日係咁問人：「係咪lunch啦？係咪放學？真係走得？」但係要小心俾人玩，我試過lunch嗰陣問人，個人答我：「唔係呀！而家maths堂呀！」XDD，所以問多幾個人就保險啲。
如果你媽咪同你講嘅嘢係好重要嘅，咁你喺聽完佢講乜之後就唔好做其他嘢住，第一時間喺個腦入面狂重覆佢講過啲咩。如果你將佢講啲嘢化成point form，數埋手指佢講過邊幾個point，講埋出聲，咁效果梗係好啲啦！但係如果佢係問你食咗飯未之類嘅嘢，咁就唔記得都冇乜所謂。
至於你買嘢硬係買唔齊呢，其實你可以寫一張list要買啲咩。可能你list有咩要買嗰陣都會list漏，咁你就要花多啲時間寫，用多啲時間諗清楚係咪就係得你寫咁多，定一話漏咗嘢。有時候啲念頭嚟得快，走得仲快，你抄都抄唔切，但係你潛意識覺得已經數哂，咁之後好難會諗得返起究竟漏咗啲乜。所以你要慢慢嚟，每寫低一樣嘢個腦就淨係諗住佢，到寫完之後再諗另一樣嘢。又或者你可以將要買嗰啲嘢排成有rhythm嘅句子，好似「柴米油鹽醬醋茶」咁，你可以記做「柴米 油鹽 醬醋茶~」、「salt sauce、chai cha、vin rice oil」咁。總之令啲嘢怪啲，咁你一定會記得住。當然，唔可以係買太多嘢嗰陣啦，買成百樣嘢，唱都唱到suffocate。
如果有嘢要帶(就當係功課啦)，就要一諗起，即刻就dum佢入個袋喥，迅速了咗件事。但係可能你已經就嚟去瞓，懶啦，唔想搞咁多嘢，咁你可以寫張note，黏喺廁所塊鏡喥，咁第二日刷牙就一定會記得去攞功課。有時又可能你已經瞓咗落床，唔想起返身去攞，咁你可以同自己設定一樣物件嚟提自己。例如同自己講：「好啦！聽朝一起身戴眼鏡就要記得去攞功課！一見到眼鏡就要攞功課！眼鏡=功課！」將兩樣嘢link埋。但係要小心，嗰個物件一定要係你肯定會接觸到，例如塊鏡入面自己個倒影、鬧鐘聲、掀開張被嘅感覺等等。如果你同自己講：「聽朝見到早餐隻煎蛋就要攞功課！」而你傭人原來聽朝整腸仔俾你咁就真係攞嚟搞。
我有啲朋友會寫低一日要做嘅嘢，然後成日睇住本note book睇下啲嘢做哂未。我咁多年嚟唔係到執書包要睇下第二日要帶咩書都唔會記得攞本handbook出嚟睇下要做咩功課，呢個方法幫我唔到，但係對你又有可能有幫助。但係我相信要做到呢個方法係要培養習慣，唔係都好容易會唔記得睇本嘢，咁你又要攞多本簿嚟提自己要睇嗰本嘢XD。
唔同嘅事件、物件都有唔同嘅方法去記，人人都會有自己嘅方法，但係所有方法背後嘅principal都係令自己專注喺需要記嗰樣嘢喥啫，只要搵到個方法，就ok架啦！你背書都背到，應該難度唔大！
希望我幫到你啦！^ v ^
