點解人一定要生存呢

✔ 最佳答案

　　其實我都好認同喺某程度上法律俾人安樂死係應該嘅，但係只係限於一個好extreme嘅情況底下囉。
　　我覺得每個人喺呢個世界上都係有佢地嘅role，而我地生存嘅目的就係要盡力守住自己個role，去令呢個世界更加好。有啲人好叻、好聰明、好好運、好有智慧、好努力。佢地嘅role可能係用自己嘅才智去幫人，好似做老師教育下一代、做科學家發明幫到人嘅嘢、做政治家領導人等等。而有啲人可能唔叻、唔聰明、頭頭碰着黑、好冇慧根、好唔識得上進，搞到自己個一生一塌糊塗。但係佢地亦有自己嘅價值同影響力。佢地可能係某一個人嘅朋友，令到嗰個人成個人生唔同哂；又可能有人喺佢地身上學得教訓，令佢地唔會重蹈覆轍等等。你永遠唔會知自己邊一個行為會幫到另一個個好大好大嘅一個忙，但係你要相信自己真係有改善過其他人。就算係喺街邊一個冇人理，好可憐嘅乞兒，可能都會令到一個人心生憐憫而去做volunteer，幫到千千萬萬個可憐人。(有冇聽過蝴蝶效應？有啲嘢係真係你想像唔到咁大威力，所以每做一個決定一定要諗清楚。)
　　就係因為我地每個人都有價值，都有影響力，所以我地嘅責任係好大架！我地嘅責任唔係淨係負俾自己，仲要同其他人有交代，所以我地冇權剝削其他人得到恩惠嘅權利，更加冇權摧毀其他人嘅生命。呢句嘢好似好誇張，但係其實一啲都唔係。試諗下，你唔死嘅話，你可能有一日會俾錢俾乞兒(唔知點解係咁用乞兒做例子，不過貼切就得啦)──當係一蚊啦──佢儲咗幾日錢，就係加埋你個一蚊，令佢啱僅夠錢買個包嚟食填下肚。之後嗰幾日佢一蚊都收唔到，但係因為你個一蚊，佢都可以保住佢重視嘅生命。但係如果你死咗，佢冇你嘅一蚊，已經幾日冇食嘢，加埋之後幾日都冇人理佢，佢夾埋成十日唔食嘢，咁佢一定會餓死。呢個情況，你選擇死亡就係剝削咗佢生存嘅權利。再諗下，如果你死咗，愛你嘅人會點？呢個唔駛我講應該你都明白我想講乜。佢地會好傷心，最愛你嗰幾位可能仲會精神崩潰，就算花成世人嘅時間都未必一定回復得返。你捨得令佢地咁傷心？唔講捨唔捨得，你覺得一個人有權咁摧毀其他人？其實法律點解唔俾人殺人？唔係單單因為攞咗人條命，最主要其實係為咗個死者啲親朋戚友；殺人犯嘅罪係因為令其他人陷入精神創傷。就算俾你安樂死，你選擇咗呢樣嘢，你係冇犯法，但同殺人犯有咩分別？所以千祈諗都唔好諗呀！我第一段所講嘅extreme情況就係當一個人嘅生存會帶俾其他人更大嘅悲慟，咁佢就可以安樂死(好似大家都唔想睇住個人重病又死唔去，好痛苦咁嘅case)。

　　你其實點解會想選擇死亡？係你覺得你嘅人生好多障礙，你唔想面對？係你覺得冇一個愛你嘅人，個世界好冰冷？係你覺得你一啲才能/成就都冇，好冇意義？定一係啲咩呢？其實你拎得呢個問題上嚟問，係咪因為deep in your heart你都未係絕望到真係想死？其實你係搵到你繼續生存嘅意義嘅，只係未搞清楚究竟嗰樣嘢係乜啫，會唔會呢？其實你有咩唔開心，可以搵close嘅人傾，一嚟你可以感到受重視俾人愛嘅感覺，咁就唔會咁有輕生嘅念頭架啦！其次，close嘅人重視你，佢地擔心你就一定會同你一齊咩起呢個擔子，你唔需要獨力承擔。…umm如果你想死係因為唔覺得冇一個愛你嘅人，咁你就要多啲留意身邊嘅人，可能有啲人係一直默默技持你，只係你未見到。起碼，你媽咪生得你出嚟，就一定係想你生存！你再睇下你有幾多人回應幫助你，其實呢個世界唔係真係咁無情啫！

　　隨便選擇死亡係逃避、係唔上進、係自私嘅差勁心態，係一件好唔啱嘅事。只要留意一下身邊對自己好嘅人/自己可以幫到嘅人，你就會發覺死亡令你失去嘅嘢係多過你生存咁多年夾埋一齊，失去咗/將會失去嘅嘢多好多好多。就算安樂死真係合法化都唔好死呀！希望以後仲可以見到nana你喺知識+喥問嘢同答問題啦！

(其實你係咪青少年？因為青少人啲hormones係會令情緒失調，嗰種失落同絕望我都經歷過，我知道個感覺係幾真實，真係會令人覺得自己好似成世人都未開心過咁。所以呢個都可能係你咁消極嘅原因之一，如果係嘅話，唔好信佢呀！！！佢厄你架咋！！！)

回答 (3)