法官的晉升機會

法官愈高級, 就愈難晋升. 因為高等法院或以上嘅法官任命係終身制, 而人數又定實咗, 所以要有得升,就要等上級有人死或退休. 而做法官, 愈有經驗就法律見解愈精. 加上又唔係乜勞動工作, 所以七八十歲先退休大有人在.
終審法院計埋首席法官李國能, 共有四位常任法官, 8位本地非常任法官及9位外地非常任法官. 每次開庭都係由四位常任法官加1位非常任法官組成. 終審法院法官都係極資深嘅本地及外地法官, 而首席法官係政冶任命. 人數咁少, 所以極難升到上去. 而升咗上終審法院做法官, 亦等如上咗神枱, 無得再升 (除非俾國家 / 行政長官睇中做首席法官啦!).
高等法院上訴庭係由一位首席法官及10位法官組成. 上訴庭法官係由原訟庭法官升上去, 幾年先至會有一 / 二位升上去. 所以上訴庭係被視為法官仕途嘅終點站.
高等法院原訟庭係由一位首席法官及24位法官組成. 要做原訟庭法官, 首先要被委任做 "暫委高等法院法官(Deputy High Court Judge)", 即係由區域法院法官暫升上去試用, 在唔夠法官審案時幫輕吓. 暫委法官人數不限, 但要做得5,6年先可以有機會 "坐正" 為原訟庭法官. 暫委法官因為未坐正, 所以亦只會審刑事或一般民事案, 而唔會處理特別案件, 例如遺產, 憲法等. 此外, 高等法院原訟庭亦有一班 "特委法官 (Recorder)", 其本身係資深大狀, 得閒聽吓案幫吓手兼過吓官癮. 任期為3年, 無得坐正.
區域法院法官係由一位首席法官及30位法官組成. 要做區域法院法官首先亦係要被委任做 "暫委區域法院法官(Deputy District Court Judge)", 即係由裁判法院裁判官暫升上去, 在唔夠法官審案時幫輕吓. 情況同原訟庭差不多, 但就無特委法官. 區域法院法官唔係終身制, 所以會有多 d 人退休或唔撈. 晉升機會好 d .
裁判法院嘅官係叫裁判官(Magistrate), 唔係法官. 裁判法院由一位總裁判官(Chief Magistrate), 6主任裁判官(Principal Magistates), [每位主任裁判官管一個裁判法院] 及75位裁判組成.