新手養熊仔鼠問題

A.新鼠買返唻的確最好唔好打擾鼠鼠住,俾鼠鼠靜兩日先再慢慢同鼠鼠建立關係,避免鼠鼠受驚而生病,但都需要先同鼠鼠檢查身體,如果鼠鼠排泄物冇咩異常,可一星期左右之後先再開始梳毛,排泄物有異常既話,長毛鼠好易會將便便痴住尾部既毛,咁就需要同鼠鼠梳毛同清便便,一切以健康為首要而鼠鼠排泄物冇異常,一星期後鼠鼠都好驚既話,可將刷毛再延期,就算d毛打交,可以遲d搵多個人幫手剪少少,好過令鼠鼠受驚

B.牙刷買軟毛or硬毛都冇咩問題,硬毛會易梳d,但有d鼠會對硬毛較抗拒

C.未養過熊仔鼠就要留意返熊仔鼠同其他品種既鼠有咩唔同,養熊仔鼠,有幾點要留意既:
1)倉鼠本身係獨居動物,而熊仔鼠比其他品種既鼠更早會攻擊同類,所以買既時候要檢查清楚有冇受傷.雖然買咩鼠都要睇真d,但熊仔鼠係打得特別勁既,連寵物度都好難話一個地方放好多隻.放到都受傷不淺,之前我去買熊仔鼠就見到好多好多都係咁.
2) 因為熊仔鼠好大隻,所以所需空間都比較大,空間太小會令鼠鼠有壓力既.而轉輪都要大d,唔係大左就玩唔到架啦.
3)有d人會覺得細隻既鼠得意d,隻鼠大大下就會冇咁鍾意,所以要諗清楚係咪真係鍾意大大隻既熊仔鼠.
4)熊仔鼠我覺得係最怕人既,我一向都係養熊仔鼠多,有時熊仔鼠既牙掂到我,佢都會即時彈開.熊仔鼠咁細膽,所以佢驚你既時候就唔好勉強佢,但我覺得都好快熟到既

長毛熊仔鼠要額外留意以下問題:
1)長毛熊仔鼠係要打理佢既毛,最好當然係日日同佢梳,最耐都要一星期梳一次,可以買一d小動物用既梳同佢梳,又或用牙刷都可以,如果耐左先梳,d毛就好易打晒結,咁就好麻煩,解結除左難之外,仲會好易整痛鼠鼠
2)可能因長毛既關係,換毛時會較明顯見到d毛飛出籠,但唔會十分多,畢竟鼠鼠大極都算細,但留意唔好因為呢d毛而誤以為鼠鼠有皮膚病,鼠鼠甩毛甩到見到肉先係皮膚病
3)長毛熊仔鼠近尾既毛好易會俾自己既排泄物痴住同整濕,要特別注意衛生問題,唔係就易甩毛or因為整住排泄物而生粒粒
4)我自己未養過長毛熊仔鼠,我自己較怕打理動物既毛,但我叔就有養過,佢有少少鼻敏感,養既時候鼻就較辛苦,不過呢樣個個人應該唔同吧