申請美國簽證被拒

我媽媽去年嚟美國探我嘅時候因為當時我被診斷有抑鬱症﹐所以佢申請過I539延期居留諗住照顧我同個BB。點知漏交資料所以申請被拒兼要取消個美國簽證﹐重要佢喺收到信30日之內離開美國。之後我幫佢補交D資料後﹐USCIS又話可以幫佢繼續搞延期﹐不過要我再交USD585蚊(之前已經比咗USD300蚊﹗)。最後我媽媽無再繼續同埋喺30日之內就返咗HK。

今年2月佢去返HK嘅美國領事館申請簽證﹐見個領事時先話佢個簽證其實重有效無比取消(真係比D美國人玩C﹗)﹐但係當個領事知道我媽媽申請過延期之後就二話不說喺佢個visa度吸咗個cancel印﹐就係咁我媽媽就無咗個10年嘅簽證﹗個領事重話我呀媽唔可以咁短時間之內再去美國(08年10月中返HK﹐今年2月再去)﹐媽媽問佢幾時先可以申請返個簽證﹐個領事話唔講得比佢知﹗﹗﹗個領事連我D醫生紙都無睇過就話我呀媽係想喺嗰邊居留﹐完全唔比我呀媽解釋就踢佢走。問都唔問我媽媽喺HK嘅狀況(我老豆細妹重喺HK架嘛)

今年係我爸爸媽媽結婚35周年﹐早排見到旅行社有個美加東西岸10天團好抵﹐佢哋想去玩下﹐但一諗起要攞簽證就頭痕。

懇請各位幫忙解答以下問題﹕

1) 其實領事館有無keep住申請人上一次申請失敗嘅資料架呢﹖如果有﹐點解又要喺張form度問申請人有無被取消簽證﹖乜佢哋唔係有晒存底知道晒申請人D野架咩﹖

2) 2月頭先去過申請衰咗﹐3月頭再去會唔會好大機會又衰﹖

3) 今次應唔應該唔好講我病嘅野﹐反而話我個工作簽證到期要成家人返嚟HK﹖上次咁老實都被佢踢走﹐都唔知佢究竟想人點﹗

4) 我諗住唔會再喺張form度話媽媽美國有個女同個孫﹐費事又比人話佢會借D意想居留﹐咁樣會唔會好D﹖

5) 帶埋佢公司嘅商業登記﹑屋契﹑醫院覆診預約證明﹑醫生紙﹑結婚證書﹑我細妹嘅公司工作證明有無用﹖

6) 應該用返上次吸咗cancel個visa嘅印嘅特區護照好定用本全新嘅BNO好﹖

唔該晒先﹗Thank you!