點解有5.1喇叭,無7.1喇叭買?

市面上係有7.1喇叭賣的,你可以睇下以下網頁.
http://digital.sina.com.hk/cgi-bin/nw.cgi?action=view_news&id=225832&type=4&newsdate=2008-11-15
不過一體化連擴音機的選擇唔多.
香港地地方細其實唔多啱玩7.1的.真係有地方玩7.1既又好小會满足於玩套裝機,通常都會分開擴音機同喇叭買.
9.1更加冇,因為跟本冇訊源,就算而家最勁既藍光碟都係得7.1.不過部份Yamaha擴音機係有兩個所謂前置效果聲道.咁就真係會用到九隻喇叭加一個超低音.不過嗰兩個只係擴音機計出來的假聲道.
我既意見就係唔好盲目追求7.1聲道,雖然現在的高清聲音格式例如Dolby True HD同埋DTS Master Audio都可以提供真正7.1聲道,有這格式的影碟亦應該越來越多.但好多人家居實際上係唔適合用7.1的.7.1的兩個後中置係一定要放在後方比較遠距離先有好效果的.但在我見過的擺設當中99%都係放正在梳化後面,貼住自己後尾衴.咁樣的話後中置要較到好細聲而且啲聲一出就到,冇得擴散,有部份AV amp甚至冇得俾你set咁近距離.
更甚的是為了遷就THX建議,將原本應該放側面的左右環繞聲道放得比聆聽位置更前.冇錯喇叭位置係正確,不過個人坐既位置就後咗.兩個環繞聲道出的聲永遠在前面,我可以肯定講無論係5.1定7.1既效果都一定差.
如果你屋企真係夠大,無論喇叭擺位或者聆聽位置都可以跟足的話,咁7.1真係會好啲,否則玩翻5.1會比較明智.