畫漫畫要用咩工具??

依條問題真係有排答……

首先你要知道既係漫畫只係一個概念
簡單黎講有紙有筆畫得出黎就係漫畫
用咩工具其實唔重要此其一

其二係近年好多漫畫都轉向數碼制作
當然用鋼筆漫畫紙依然係主流
但係用電腦畫漫畫交稿已經係趨勢黎


以傳統既漫畫畫法黎講
都離唔開紙同筆
另外仲有一D可以用亦可唔用既工具

紙方面有漫畫專用紙
佢地有耐磨同光滑表面既特質
一方面可以重覆用鉛筆響上面起稿
另一方面用鋼筆畫線可以好流暢
而漫畫專用紙有淺監色界線
用黎表示內外框出血位甚至係四格格仔既位置
係相當貴但係方便用既工具黎

其他他可以用畫紙或A4紙
一般黎講要睇番係用咩筆
鋼筆對紙既要求比較嚴格

因為如果紙唔靚就會勾爛紙
如果直接用鉛筆起稿
擦個陣又可能會令紙起毛同墨線滲透或變淡色
用紙既時候亦可以多作嘗試搵出你適合用既紙出黎

筆個方面
首先要有鉛筆起稿
鉛筆以淡色H筆為好
因為擦個陣份稿唔易污漕
但係H鉛筆有個唔好處係好硬
如果筆力重就會留好多筆痕響紙上面
令用黑筆畫出黎既線唔靚

嚴格黎講投稿係唔可以用鉛筆直接交稿
因為好難保持乾淨唔花
印刷上亦難控制深淺色
所以一般都要求用實色筆（但唔係原子筆）黎畫線

最經典係用鋼筆
鋼筆由筆杆（木或膠）同埋筆尖組成
鋼筆要用墨水（如專用墨水或日本毛筆墨水）
唔同種類筆尖有唔同彈性
比如G鋼筆咀係最大彈性
圓筆（地圖筆）係最幼身
優點係可以畫到粗幼變化極大既線出黎
缺點係用墨水要小心佢唔乾而整污糟份稿

但係唔係只係鋼筆先可以畫漫畫
好多人都係用現成既針筆或者係啫喱筆
因為處理黎講冇咁麻煩同污糟
所以亦都好多人用
而且亦有好多人係用MARKER做塗黑

紙個度就好重要
因為如果紙面唔滑
MARKER甚至針筆就會有滲墨情況出現

基本上有紙筆就可以畫漫畫
用手打網可以做到基本深淺效果
但如果要再進一步就要用網紙同修白

網紙係有黑色花紋既透明膠紙
用界刀界上去之後貼好就得
另外修白可以用塗改液
亦可以用圭筆同專用修白液黎修白

額外工具方面
有畫曲線用雲尺
圓規同間尺
唔想直接響鉛筆稿上畫線可以用燈箱
等等好多輔助工具

漫畫原稿基本可以用以上物品完稿
詳細有關挑選既可以參考教畫漫畫既書或者網頁
而香港可以買到漫畫工具既有以下地方
有D漫畫工具會一套出售
亦可作參考

ART SUPPLY CENTRE
太子弼街77號地下
（依間野響漫畫節同人展會有攤位同減價）

廣益美術用品公司
旺角洗衣街169號地下

中南圖書有限公司
旺角西洋菜街2號J-Q室地下