隆美爾和曼施坦因, 誰較強?

既然matthew兄講到明可以吹水，小弟梗係把握下機會。小弟絕對係隆美爾既忠實fans，自然覺得偶像最好。
曼施坦雖然係好有才華，但小弟始終覺得佢始終比較貴氣啲，唔夠親民之餘，打仗亦唔覺佢特別英勇。過人既勇氣係德軍高階將領中係好重要既特質，因為好多德軍高層將領經常親臨第一線指揮，甚至有唔少因此負傷，但我無聽過曼施坦有類似既經歷。幾年前我睇佢既“失去的勝利”，我記得佢寫過話佢係戰場上頂唔順日日食軍用麵包，跟住佢話因此佢特登為軍官安排左一餐豐富既午餐，入面有煙肉、芝士、餐酒等食物。雖然軍用麵包一聽就知唔係好野，而正如佢話齋，對於佢呢啲老人家黎講日日捱麵包唔係咁好，再加上偶爾一餐好啲又唔係咁大罪，更何況曼施坦戰績彪炳，為小小一餐責怪佢好似有啲過份。但佢咁做令我覺得佢唔夠同將士同甘共苦，佢心裡面始終有一種高高在上既感覺。所以我係欣賞佢，但未至於崇拜佢。
但我對隆美爾既感覺好唔同。雖然對於佢既事績肯定有啲係宣傳，但我覺得一個將軍可以係死後佢既敵人唔單止唔憎佢，仲要幫佢著書立說實在係天下奇聞。佢令我最欣賞既唔只係戰績，我覺得佢完全係完美既智勇雙全化身。隆美爾唔單止係英勇咁簡單，呢樣野好多德軍將領都可以，而佢根本就係完全無懼任何危險。我從來無讀過或聽過隆美爾係戰場上對任何情況有任何猶豫、畏縮或害怕既時間。佢既決定永遠都迅速、不含糊，而且佢係任何情況都冷靜及腦筋保持高速運轉，面對一個咁既對手想唔輸都幾難。不過隆美爾最令我欣賞既係佢有一種少見既俠義精神同埋永遠保持澎湃、用不完既精力。佢對部下一視同仁，願意同佢地同甘共苦，作為一個中年人，佢經常被沙漠惡劣既環境令佢週身病痛，但只要佢仲可以行動，佢就永遠都可以迅速調動部隊。雖然佢對敵人猛烈進攻毫不手軟，但佢從不看輕及意圖侮辱及殘害敵人，佢只視戰爭及保護祖國利益為佢既職責，只要職責完成，佢絕對唔會做其他無聊野。以上呢啲野令我覺得佢比曼斯坦值得我更加尊敬。

2009-02-16 23:54:36 補充：
我反而唔覺得隆美爾係東線會做得更好。其實隆美爾既戰略層面指揮經驗無曼斯坦咁好。後者集團軍總參、軍長、軍團長及集團軍司令都做過，而且曼斯坦係正統參謀出身，又長年坐核心戰區既戰略性高位，佢既經驗及視野比隆美爾會廣得多。

2009-02-16 23:59:06 補充：
相反隆美爾呢個人雖然絕對唔係有勇無謀，但係佢之前指揮既部隊無論規模及戰略重要性都比曼斯坦既部隊小。非洲軍團只係個名夠大，其實隆美爾心知肚明佢既部隊唔比一個軍級部隊好多少。非洲軍團論規模論重要性都唔及南方集團軍及頓河集團軍等部隊，甚至唔會大過第十一軍團好多。隆美爾既戰鬥經驗主要來自層級較小既部隊，唔似曼斯坦一開戰就坐最高位。

2009-02-17 00:02:09 補充：
我個人比較欣賞隆美爾係因為佢一啲係德軍高階將領中少有既特質，尤其是係佢過人既勇氣及剛正不柯既性格令佢鶴立雞群。不過論戰績，其實佢未夠古德林及曼斯坦，甚至連摩德爾、霍斯、霍普納及克萊斯特等都未必及得上。

2009-02-17 00:09:39 補充：
其實我覺得以隆美爾極端英勇既性格，佢係東線一個月內肯定陣亡。因為蘇聯既環境、戰況及蘇軍既難纏程度都勁過西線百倍，以佢咁鐘意行先領頭既性格，唔駛審肯定死得好快。據我所知希特勒就係知佢個人係咁，所以先至絕對唔派佢去東線。因為隆美爾係北非番黎後就調左去意大利做總司令，但忽然又調去西線做個無謂既B集團軍司令。當時東線蘇軍已差唔多打出國門，德軍前線正在用人之際，以隆美爾呢啲咁猛料既人，點解會做份咁既閒差﹖我覺得唯一既解釋就係希特勒唔想佢咁早死。

個人意見梗係認為：各有各好啦！唔係牆頭草，而係佢兩個係能力極高但又完全不能作 apple to apple 咁比較。
除咗主戰場一個東、一個西之外，出身亦好唔同。
由普魯士時代到近代，德國將領素養之高，喺歐洲以至世界出晒名，而馮。曼施坦則被同期納粹德國雲雲響噹噹嘅將領中，被公認為戰略策劃能力最高嘅將軍。
而隆美爾則被英美盟軍認為最有戰術才華同膽色嘅將軍，深得敵我雙方尊重，係盟軍考慮戰後取代希特拉嘅談判同領導德國嘅人選，可惜施陶芬百格上校刺殺希特拉失敗，隆美爾在極其間接嘅原因下三個月後反比希特拉賜死。
施陶芬百格上校呢段歷史已拍成戲，會喺二月中上畫！由靚仔湯主演。

圖片參考：http://ls.hk.yimg.com/hk/providers/yhk_movies/20090107/hkmov_1231316412-f1.jpg