墮胎.請解決我的煩惱.感激

係呢個時候你無法選擇.你只可以同你父母講.想當年我都係二十歲大左肚.當時既心情真係好矛盾.又傍惶又驚.矛盾不堪.簡直係苦不堪言.但最後我都係生左出黎.若果有一日我個女同我講話佢有左bb.又係好似你咁細個.我會叫佢去落左佢.因為我唔想佢行返自己條路.做一個咁年青既未婚媽媽.真係好慘.生佢出黎又俾唔到正常既生活佢.唔好話滿足佢丫.連基本需要都好難.又要受盡別人既白眼.冷言冷語.好彩既係我有一班好撐自己既屋企人.先至令我係呢十年裡面重新企返起身.面對自己既一切.所以我俾你既建議盡快同你屋企人講.無論佢地既反應係點樣.屋企人始終都幫到你.落bb唔痛.因為有麻醉針.如果你去家計會落.我可以好肯定咁話俾你聽.你一定唔會好受.我唔知去私家醫院係點樣.我只知道你未夠18歲.一定要媽咪簽名.唔洗驚唔洗怕.萬大事總會過去.襯個bb仲未有感覺就快d搞掂佢或者快d決定(香港法例規定.個胎超過3個月就唔落得)或者你可以考慮一下母親的決擇.佢始終都係一條小生命.你同佢好有緣.佢投胎先會落黎你果度.他日你就算決定要落左佢.希望你都可以燒返d金銀衣紙俾個bb.但求一個心安理德.乖女唔洗驚.今次錯左.下次就要小心.其實你肯面對呢件事.總好過d生左出黎掉落街。

我可能解答唔到你既問題,我講既野大家可能覺得唔岩聽或者無用.不過我姑且分享下自己既睇法la~
想問大家,點解第三世界國家,愛滋孤兒,天災人禍受害者生存咁困難,或者受盡白眼,點解佢地唔--好聽d講,結束自己既生命/難聽d講,殺左自己呢?既然生存咁辛苦,點解仲要繼續頑強生存?我諗大家心入面都有答案:因為佢地知道生命係最重要既~有生命,乜野希望神蹟都會有,乜野都有可能.但係若佢地選擇放棄自己既生命,就等於放棄一切.
我未有過bb,唔會體會到你既艱難,但亦都唔會體會到一個小生命,自己既骨肉至親,係自己肚入面既奇妙感受.但係你試過,你忍心親手將自己既bb活生生殺死咩?你知唔知道所謂既"墮胎"係活生生將你肚入面既bb攪碎,你忍心佢受咁樣既酷刑咩?bb做錯左d咩?點解父母做錯事,後果要由佢黎承擔?
正如上面所寫,有生命就有一切.我想回應個位為左女兒唔行上自己既舊路而會叫佢墮胎個位,你愛唔愛你個女呀?為人父母你一定好錫佢.你睇住佢由細長大,一言一行,一舉一動,都會比你無限既滿足.但係你試想,如果當年你決定要殺死佢,佢今日就唔會係你面前咁活潑,咁可愛.佢所有既前途,全部都會無哂.你話唔忍心佢由細到大受咁多苦,我知道你係為佢好,但係你諗下,人最重要係乜野呀?係生命!如果佢連生命都無,咁佢會快樂咩?佢唔單止連睇睇呢個世界既機會都無,仲要被自己媽媽親手殺死!無生命就無一切!即使佢受到好多閒言閒語,佢面對呢個世界時依然有好多快樂:呢個世界有花草樹木,有美麗既天空,有好愛佢既媽媽,有一齊玩既朋友,有返學讀書既機會,有一個掌握係佢手中既前途,更重要既係,有創造奇蹟既機會!縱使你係佢既媽媽,佢既出現並唔由到你掌握,你有權去剝削佢擁有呢一切一切既權利同機會咩?即使你有權,你忍心咩?再講,佢受到閒言閒語既原因係邊個造成呢?你可以因為自己既錯而奪去女兒既權利咩?
仲有..生命唔係話"東家唔打打西家".生命係獨一無二架.每一個人就係得咁既一次生存既機會,你願意奪去你至愛女先既生命嗎?
唔好意思,有左bb既16歲女孩.我既答案可能幫唔到你仲hurt到你,但係呢d都係我心底話.係,可能你地會話我唔明白,可能我真係唔明白,不過我只係知道生命唔由到我奪去.所以如果我發生d咁既事,我會生左佢.我知道,即使痛苦艱難,我亦都相信自己無辦法面對人,但係,我係絕對唔會殺左自己bb既.未來既路縱使難行,但係錯左就要承擔責任,唔可以殺左bb然後自己繼續若無其事咁生活.

我都唔知可以講咩了.....事已至此.......只苦了BB......
可能你的想法是正確的......但再三考慮吧~!!
請你今後好好做人...早日知苦樂法....諸惡莫作, 眾善奉行~~~


比我一篇文你睇下《冤有頭, 償有主》...冇咩意思~~只係想比你明白個道理...想睇先睇吧.....唔想睇就算~~~隨緣吧

http://hk.myblog.yahoo.com/woodreus18/article?mid=727

我建議你同屋企人拎呢件事出黎傾，
你未成年，係醫院做既話一定要父或母簽名。

bb係無辜既，
如果真係要放棄佢，請你以後要更加珍惜自己同自己既將來，
我相信個bb亦都會明白同原諒你...

決定唔要，係咪痛就唔做?
決定要，係咪唔痛就做呢?
決定要唔要唔係因為做果陣痛同唔痛。

我可以同你講，做完之後個心會一直心掛掛...
唔做既話，就要面對經濟同社會。

不過你決定做同唔做都好...
我都希望你身體健康。