✔ 最佳答案
話哂穿耳都係喺耳珠度拮個窿, 點都會有D痛. 不過點痛都好都唔會好耐, 穿嗰陣痛嗰一剎那, 之後耳珠可能會"赤赤哋"一陣, 你要擔心嘅反而係點樣保持傷口干爽同清潔, 以避免耳洞發炎. 家陣天氣凍又干燥, 係穿耳嘅好季節, 夏天流汗多洗頭都洗得密D, 污水同汗水好易令耳洞發炎. 穿耳必需注意下列事項:
1. 唔好買聲稱防敏感的耳環, 因為表面電鍍物料的關係, 好多人都一樣會敏感, 最好用18K黄金或18K白金, 等過一兩個月之後至轉第二D物質嘅耳環. 不過凡戴咗新耳環之後一發覺耳洞有痕或紅紅哋慶慶哋就要即時換番K金耳環, 我N年前穿耳, 但到今日一戴親"朱義盛"超過4個鐘仍然會開始痕. 至於銀耳環得唔得就要睇人, 有D人連銀都唔戴得.
2. 如果穿耳間舖頭冇比藥膏你, 你可去藥房買一支消炎膏, 每次洗完頭都要將耳珠/耳環清潔乾淨同用火酒抹過, 在耳洞前後兩邊都搽上藥膏後再戴上耳環. 穿耳後的頭嗰幾日可以淨係除咗個耳環托, 不用除耳環, 小心用棉花棒做清潔便可. 如果冇發炎可以唔搽藥膏, 改而去藥房買一支"蛾朮(音術)油", 用棉花捧濕淋D油由耳環邊濕少少落耳洞. 蛾朮油係古老嘢, 但對防止發炎極有幫助.
3. 冲凉時一定要戴沖凉帽, 保護耳洞唔好比水沾濕.
總之穿耳後要注意保持清潔衛生, 如果耳洞發炎搽咗消炎膏都冇用重紅腫(即係可能有膿), 咁就要睇醫生食消炎藥喇!