如何護理皮膚一問

1) 如何護理皮膚 ?
***淨係護膚都唔够, 平時睡眠要充足唔好太夜至瞓(15歲起碼要8個鐘, 最好10點半前上床), 重要食多D水菓同蔬菜, 最少要好似政府建議咁兩份水菓(1份=1個中型橙或蘋果)同三份蔬菜(1份=半碗), 重要飲足够嘅水(8杯, 約等往2公升, 最好係水, 唔好用咖啡, 奶茶或汽水代替), 避免食太多刺激嘢(煎炸, 朱古力等), 等D腸胃暢通D, 皮膚自然會好D.
2) 護膚的正確步驟是咩 ?
***首先要洗面(如有化則要先落), 再輕輕將toner拍勻成塊面, 跟住如果日頭就搽眼霜及防曬度數最少15(SPF15)嘅日霜, 如果夜晚就搽精華液, 最後搽晚霜同眼霜. 另外一星期做一次mask.
3) 用什護膚品 適合我 ? ( 整個步驟的護膚品 ) ( 清楚列明 名稱、價錢和哪裏有得買 )
千祈咪買市面一般標榜專對付暗瘡的產品, 因為大多含有酒精, 反而會刺激皮膚分泌多D油脂. 你得15歲, 不宜盲目買D貴嘅專櫃名牌產品, 可考慮下列介紹:-
***洗面 - 一定唔好用D梘性或者可以起哂泡潔膚液, 可用Cetaphil Gentle Skin Cleanser, 一般西葯房有售, 16安嘅唧唧裝大概唔使九十蚊, 夠用三個月, 每次唧2至3吓輕輕捽勻成塊面(約2分鐘), 再用水洗乾淨, 就算化咗淡都已足够洗乾淨, 有需要重覆一次便可, 如有用睫毛液則需要另外唧一D cleanser搽落睫毛度輕輕捽吓(梗係要瞌埋眼啦), 用化棉輕輕抹去後再清洗便可.
***Toner - 可用Neutrogena Alcohol-free Toner(約七十幾蚊), 化品店, 萬寧, 屈臣氏有售, 唧些toner在化棉上輕輕拍勻成塊面.
***日霜 - Neutrogena Oil Free SPF15日霜, 或Olay 有SPF15的日霜, 化品店, 萬寧, 屈臣氏有售, 均約百零蚊.
***精華液 - Auqamoist 透明質酸, 化品店或萬寧有售, 30ml一支約百零蚊, 每次只需1至2滴就够搽勻個面.
***晚霜 - Olay Total Effect (化品店, 萬寧, 屈臣氏有售, 唔係好記得幾錢, 好似約2百蚊).
***眼霜 - Body shop 有一隻eye gel幾好用又唔算貴, 但唔記得叫咩名, 可以去Body shop問, 去到重可叫佢哋介結埋D爽D嘅日霜(一定要SPF15或以上)同晚霜, 選擇多quality都幾好, 價錢大概百幾至二百幾.
***面膜 - 唔使買現成的, 自己整重好, 將1湯匙蜜糖(本港寶生園, 澳洲或紐西蘭蜜糖均可, 約50至80蚊一樽, 最好不要用大陸蜜糖)及1湯匙黑糖粉(太古出品, 惠康有售, 大約10蚊一包有排用)同於小碗中調勻, 用一個掃仔將混合物搽勻上面, 約15至20分鐘後去冲凉時冲洗干淨便可. 蜜糖緊膚效果超正又有消炎作用, 黑糖粉有磨砂作用可去死皮及黑頭(冲洗前整濕兩隻手用向外由下巴開始打圈動作輕輕按摩塊面, 需然D黑糖粉一路按會一路溶, 唔刺激, 但爆瘡時都不宜做), 一星期可做一至兩次. P.S. 每日朝早空肚飲一杯暖蜜糖水對腸胃同皮膚有大大的益處, 如能晚上空肚(或飯後2小時)飲多一杯更佳, 方法係兩茶匙蜜糖用一杯暖水搞勻, 勿用太熱的水, 因會破壞蜜糖中的酵素.
4) 如何清理黑頭 和 傷過所留下的孔 ?
***試吓用黑頭貼, 或去美容院做一次facial清吓D黑頭, 如果你每日早晚用Cetaphil洗干淨個及定期做蜜糖/黑糖mask一定會有幫助, 但一定要有恆心!!!!! 至於因暗瘡發炎引致的凹洞就好難自己整得平, 唯有好好護理皮膚, 暗瘡嚴重嘅要去睇醫生, 等D皮膚唔會因為暗瘡發炎得太嚴重而留下凹洞, 同埋唔好自己亂咁唧(會有黑印), 如果D凹洞係最近形成嘅可以試吓用"秀碧除疤膏"按摩吓(一般西葯房有售, 唔記得幾多錢, 好似廿幾定三十幾蚊一支啩), 希望可以令D凹洞冇咁明顯.
5) 用咩的化妝品好 ? ( 清楚列明 名稱、價錢和哪裏有得買)
***見上.
寫咗成個鐘, 希望可以幫到你咗!


2008-12-27 09:41:13 補充：
唔揀我唔緊要, 但要小心認清邊D答案係推銷, 建議你只買公開發售的產品, 因為較有保障.

2008-12-27 09:48:02 補充：
唔够Budget想慳D嘅話, 祗買cleanser, 日霜同晚霜都得, Cetaphil係極好但又平嘅產品, 所以一定要買, 加埋日霜(一定最少要有SPF15防曬的)同晚霜, 係就係最少要三四百蚊, 但一般可用三個月, 除開都唔算貴.

2008-12-27 09:51:31 補充：
記得要飲蜜糖水同做蜜糖面膜, 又平效果又好, 惠康有佢自家牌子(First Choice)嘅澳洲蜜糖賣, 1KG好似只係50蚊左右咋!

2008-12-27 09:57:20 補充：
面霜可去莎莎或卓悅等大間嘅化品店買(客人較多, 貨物流通量較快), 應該比萬寧或屈臣氏平, 唔買我建議的牌子嘅話, 佢地有多元化的產品可以比你揀, 不過我住九龍, 唔知屯門邊度有.

2008-12-28 11:40:40 補充：
Sorry, 我之前的推介都係自己用過的, 我未試過IS QUEEN的產品, 所以唔知呢個牌子是否好用, 祗能重申日霜必須買有SPF15或以上防晒功能的, toner則不要用有酒精的, 所以唔建議你買"控油保濕平衡水", 因為市售聲稱"控油"的通常都含酒精.