✔ 最佳答案
底色不夠白是白平衡問題.一般相機的自動白平衡麻麻地準,尤其如果室內係鎢絲燈黃光的話十之八九偏黃.光管就好啲不過有時都會偏青.
你可以試下就住光源選用相機的預設白平衡,例如鎢絲燈就揀翻鎢絲燈白平衡,光管就揀翻光管白平衡.
如果效果都唔满意或者用慳電膽唔黃唔白,就要用手動白平衡,即係搵張白紙放在光源下話俾相機聽甚麼是白色.你橫掂有白畫紙就用佢吧.操作方法通常都係揀咗手動白平衡之後對住張白紙按一個掣,不過按邊個掣部部相機唔同,你要睇下說明書先得.
要影得靚一定要有直接光源照到BB面部,陰影下影會影到好多雜訊的.建議iso唔好用咁高,100可能太慢,試下用200.由於快門都會幾慢下,要耐心啲等BB唔好郁先影.出面街要一下就影到一定唔會同你咁搞就咁開閃光燈就算數.
同埋記得要用腳架同兩秒自拍防止手震.仲有底色白可能會令張相影出來暗,要加翻EV等張相夠光.
2008-12-23 22:59:49 補充:
留意申請回港證相片雖然不一定是白色,但必需是淺色背景而且冇任何裝飾.詳請可以睇翻入境處網頁.
http://www.immd.gov.hk/chtml/hktraveldoc_2_rp.htm
2008-12-24 09:02:44 補充:
還有一點要留意,如果設定手動白平衡,記得白紙要覆蓋整個畫面,雖然有啲機識得淨係睇畫面中間部份,不過有啲機係唔識.