法國加意大利自由行, 好煩惱!

樓主既行程同我係今年八月去既都幾似，不過我去既係意大利加瑞士，而且我係杜拜轉機直飛羅馬。點都好，小弟講啲我知道既野。
我有個朋友都去過法國、意大利加瑞士團。不過由於三國景點太多，加上交通都要時間，所以要遊晒三國，14日都唔夠，我建議樓主遊兩個國家會好啲。我覺得最好係好似我咁遊意大利加瑞士，唔係因為法國唔好玩，純粹只係因為意大利同瑞士係地理上較接近，成個行程可以慳番一程內陸機。但如果樓主堅持要去法國，咁我會建議你加埋去意大利就夠，瑞士留番下次先去。
我講下三個國家有咩可以去。首先樓主要知道既係法國及意大利係兩個好大既國家，而瑞士亦唔細，所以唔好唸住一個trip可以去晒所有地方。如果樓主未去過上述既地方，咁法國剩係遊巴黎已經好夠，因為嗰度係法國最靚既地方，亦係法國文明薈萃，剩係睇巴黎亦可以慳番來回不同地方既時間。
意大利就麻煩啲。一般人都係分南、北兩個部份，好少人南北部一次過去晒，好似我呢啲歐遊初哥，去意大利暫時都只係去北部。而去北部旅遊都離唔開去四大名城，即係羅馬、佛羅倫斯(加比薩)、威尼斯及米蘭。雖然四個城市都好出名，但係每一個城市逗留既時間都唔需要一樣，但時間點分配就要視乎樓主既需要。一般黎講大家會留係羅馬同佛羅倫斯耐啲，小弟建議你係羅馬留4日3夜，最少都要3日2夜，咁先可以去晒有價值既景點。佛羅倫斯最好留3日2夜，因為要預一晝去比薩睇斜塔，再番黎佛羅倫斯就無咁趕。威尼斯雖然出名，但大部份人都留比較少時間，因為佢真係無咩睇，純粹只係見識下呢個水鄉，小弟係呢度都只係留左一日咁多。至於米蘭就更加無野睇，去既人通常都只係為左買名牌，如果樓主對購物無咩興趣就唔好去啦。
瑞士可以去既地方好多，不過通常都係睇自然風景為主。少女峰、鐵力士峰及馬特杭峰都係熱門既景點。另外瑞士有好多湖都好靚，值得一遊。但係瑞士既城市無咩睇，通常都係過境先會到下。
交通方面，如果由羅馬去其他意大利城市及瑞士不同地方都係搭火車，兩國既火車都好準時及舒適，絕對信得過。樓主一定要買火車証，雖然未必每程都用得著，但大部份情況可以免卻你買飛既麻煩，非常有用，樓主一定要去一啲熟悉搞歐洲遊既旅遊公司問詳情。
由羅馬去巴黎一定要搭飛機，但點去我就唔係好知，好似係由羅馬嗰個國際機場搭去巴黎一個內陸機場(唔係戴高樂)。機票好似可以網上訂，但樓主最好都係問下上面提到既旅行社。

請問steventtw20, 意大利自由行, 你幾多人同行, 治安安全嗎 ？ 旅店在香港或是去到意大利先訂, 價錢？