同一款車, 3000CC V6 同 2400CC 直四 耗油量差幾多呢?

我諗你係講緊豐田上一代嘅Estima或者Alphard吧? 因為呢兩款車都係用編號 2AZ-FE 嘅直四 2400cc引擎, 同編號 1MZ-FE 嘅 V6 3000cc引擎.
照Estima耗油量嚟講, 當年日本官方數字, 直四係 10.6km/L, V6就 9.4km/L
V6有220匹, 直四有160匹. 直四其實係夠用, 咁當然如果你要好力就緊係V6好D.
V6好力D, 但當然耗油量大D, 而且引擎重咗, 車頭重咗, 咁handling上當然有影響..
至於點解大CC先有V6. 應該係話, 架車越大cc, 為配合引擎倉有限位置嘅packaging, 同埋引擎部件大少所帶嚟對引擎發力性能特色嘅各因素, 而會採用較多缸數嘅引擎設計. 試想想, 如果2400cc唔係分開直四, 而只得一個汽缸, 汽缸行程 (Stroke) 距離唔變, 咁你個汽缸嘅圓形就會好大個, 而其部件亦會好重, 惰性增多, 起步就慢咗.
所過來講, 街用車的話, 細cc就唔需要用到咁多汽缸.
維修保養當然有唔同. 每次換偈油要換多D油, tune-up engine時換火咀都要換多兩支 (V6六個缸就六支, 直四就四支). 馬力大D, 剎車消耗品如輪胎同迫力都會損耗快D.
保險方面, 睇過你某篇評論, 知你車齡唔低, 所以V6同直四係冇乜分別.
VVT-i 同VTEC 係引擎控制活瓣開合時間嘅program. 大家都係咁上下嘢, 因為唔同廠效落唔同引擎, 有其它好多因素牽連, 好難直接作比較. 至於CVT係無段變速波箱, 唔可以相提並論. (除非你係講CVVT, Continuous Variable Valve Timing, 不過都只係之前提及VVT-i同VTEC嘅統稱)