「北風之神」PK「俄亥俄」

✔ 最佳答案

小弟對北風之神唔係好熟，因為佢都係近一、兩年先至服役，所以我去左維基補下習先，睇完維基先發現兩者既分別都幾大。

首先係外型同排水噸位既分別。唔知俄國人食錯咩藥，就算係紅寶石設計局出品既最新型戰略飛彈潛艇仍然保留左Delta III 及 IV型嗰個極核突樣衰既突起飛彈艙，雖然嗰艙既突起程度已經無Delta IV咁難睇，但個飛彈艙仍然極度破壞成隻船既流線型。俄亥俄當然無啲咁核突既野，成隻船極為流線型，絕對無不必要既突起，咁樣對潛艇既靜音極有幫助。有江湖傳聞話俄亥俄級潛艇從來無人能夠跟蹤過，而小弟睇過俄亥俄既外型就好相信。

雖然北風之神個飛彈艙極核突地突起，小弟初時以為咁既設計係為左裝多啲飛彈，但令人更失望既係佢奇低既載彈量。原來北風之神得16個飛彈筒，但完全流線型既俄亥俄就有24個。但最激死人既係佢之前既颱風級都有20個發射筒，而且颱風級係完全流線型。仲有，原來北風之神嗰16個發射筒唔係個個都裝戰略飛彈，有四個做左戰術武器垂直發射裝置，即係話成隻艦既戰略飛彈得番12支，以一艘全新既戰略潛艇黎講，咁既戰力倒退實在令人好驚訝。

而且北風之神一啲都唔細隻，滿載排水量有24,000噸，雖然細颱風級一個碼，但仍然比俄亥俄既18,000噸多太多。最奇怪既係兩隻艦都係長170m，寬13米(北風之神13.5米)，咁多左嗰六千噸去左邊﹖小弟估計大部份去左俄國潛艇最出名既雙層殼體，同埋俄國既機械不嬲都比美國既笨重啲。

不過有兩樣野北風之神就真係幾先進，分別係噴射水流推進及高度自動化既操縱。如果樓主有睇過《追擊赤色十月》，咁你大概會知道噴射水流推進其實大概類似書中紅色十月號既“履帶”系統，即係將水吸入推進器後然後加力再噴出(詳細原理小弟並不清楚，煩請高人指點)，水流既反作用力就推動潛艇前進。呢個系統可以避免傳統螺旋槳既機械噪音及係高速時出現既空蝕現像，而且噴射水流推進亦比螺旋槳有效率好多。不過北風之神極速得25節，同俄亥俄既24節差唔多，係潛艇黎講唔算好快。不過呢個都正常，因為戰略核潛最緊要夠隱形，速度唔係咁緊要。但小弟估計呢個25節極速唔係真係谷盡既速度，因為呢個噴射水流推進要比傳統既七葉螺旋槳有效率得多，1970年代用螺旋槳既洛杉磯級同俄國自己發展既阿爾發級極速分別係32節及45節，所以我唸北風之神既極速係可以快啲，不過應該係好極端既情況下先至會用到。另外有樣野小弟比較失望既係北風之神係推進系統既創新無做到底，推進器改左噴射水流，但反應爐同推進器之間既傳動裝置仍然都係最老套既蒸氣輪機，而唔係最新既核-電模式，即係反應爐帶動發電機直接驅動大軸，從而將傳統變換過程中不必要既傳動裝置，例如上面提到既蒸氣輪機及波箱等消除。咁即係話北風之神雖然應該會比颱風同Delta靜左啲，但因為傳動裝置仲係好傳統，所以應該又唔會靜到好似美國既海狼級咁厲害。

北風之神官兵只有130人，呢個絕對係國際間先進既比例。當年俄亥俄都出名少人，但都有155人，不過北風之神比俄亥俄遲三十年出現，先進啲都唔出奇。

總結來講，北風之神雖然係設計上都有創意，而且有一啲地方都算先進，但佢既整體戰力比佢既前任及其他西方競爭都手都差左一截，平心而論，佢唔係一款令人非常滿意既潛艇。

維基參考網址﹕
北風之神﹕
http://en.wikipedia.org/wiki/Borei_class_submarine

俄亥俄﹕
http://en.wikipedia.org/wiki/Ohio_class_submarine

Delta﹕
http://en.wikipedia.org/wiki/Delta_class_submarine

颱風﹕
http://en.wikipedia.org/wiki/Typhoon_class_submarine

「北風之神」PK「俄亥俄」

回答 (2)