入黎啦，我有兩個問題問你地啦，有經驗養倉鼠的主人就可以入黎~(20點)

唔知你既鼠養左幾耐呢?一由開始養至今都一直咬人?A.鼠鼠成日咬人既原因多數有以下幾個可能:
1.鼠鼠咬人多數因為驚,鼠鼠保護自己只係得牙同爪,所以驚起上唻就會用牙同爪去對抗外來者. 鼠鼠咁細隻,其實驚人我覺得好正常,好似如果有隻動物大你咁多倍,一手就拎起晒你整個身體,我諗都會幾驚.所以慢慢唻,俾d耐性同時間吧

初養鼠頭兩日時應該唔好掂鼠鼠,之後再用以下方法同鼠鼠熟,如果已養一段時間,亦可搵兩日唔好打擾鼠鼠再慢慢培養感情:
a)你可以隔住個籠叫多d佢,在籠邊拎d野食引佢埋唻(主要係想有食物袋既聲音俾佢聽到),唔一定要拎零食引佢,拎主糧入面既野食都ok架啦,唔食零食會健康d.日日叫佢都有野食既話,佢好快就會記得你把聲or裝食物既袋既聲音,我覺得鼠鼠認食物袋既聲比較快.
b)等到你地熟d,做到你一行過佢就行埋唻or冇咁驚你,之後你可以試下伸隻手入籠隻俾野佢食
c)再熟d再試下俾野佢食既摸下佢頭or身
d)佢都唔抗拒之後,可將食物放在手心,等佢行上唻食,慢慢佢會習慣左你既手
e)再熟d就可以抱佢,抱既時候唔好忽然由頭or從後抱起佢,咁會令鼠鼠以為有敵人攻擊,最好慢慢叫住佢先抱佢,如果抱唔到,可以用乾淨既杯唻俾佢上去咁樣抱.抱之前記得先輕聲叫下鼠鼠先

2.鼠鼠唔舒服既時候,可能你輕輕一抱就令佢感到唔舒服,又或精神上都會特別敏感,因為自己弱左就更要保護自己.
仔細檢查鼠鼠既身體有冇異常,檢查下鼠鼠既排泄物,同埋個籠會唔會有野整親鼠鼠.

3.有第隻鼠一齊住既話,都會易咬人.兩隻或以上既鼠一齊住既話,其實好易會打交, 打交係因為倉鼠本身就係獨居動物,根本唔適合同其他鼠一齊住既. 佢地既地盆意識好強,到發情既時候先會一齊,我睇書講過,外國既倉鼠繁殖場,都係一隻籠一隻鼠,再到交配既時候先放埋一齊一段好短既時間. 成日都keep住要抵抗敵人既情緒,即係較神經質,咁就好易動不動都想咬人

4.太餓,唔夠野食就會亂咁咬,搵野食,可以一次放多D食物落去,等鼠鼠有較多既安全感,但留意食物唔會變壞先可以

5.你手有食物既氣味,鼠鼠有機會會誤以為係食物而咬落去

6.牙痕
倉鼠屬於齧齒目動物,牙齒入面既齒髓腔唔識得去閂埋,所以牙齒會不斷生長既,如果唔磨牙,就會令牙齒過長,太長會令鼠鼠食唔到野,合唔埋口,甚至插穿鼠鼠既口,咁係會死既,所以鼠鼠係好鍾意咬野.
所以如果鼠鼠既牙長到合唔埋口or食少左野,就一定要搵醫生同鼠鼠剪牙,唔係就好易死架啦
專整俾鼠鼠咬既磨牙石or木係針對鼠鼠磨牙問題而設,所以我覺得係比較好既.都可以買鹽璣OR較硬既食物棒(一支木,外面有食物包住)俾鼠鼠咬

7.懷孕既鼠都會特別精神緊張,從而成日咬人

被鼠鼠咬到,雖然冇咩危險,但傷口一定要處理既,所以記得消毒同貼膠布

B.要訓練鼠鼠,最基本就係需要你同鼠鼠既關係好,而家鼠鼠成日咬你,絕對唔適合訓練任何野,可以試下A1既方法同鼠鼠熟左一排先,再進行訓練,鼠鼠可訓練既事如下:

1)訓練鼠鼠唔好咬籠
訓練唔咬籠我覺得係實用既一項,因為咬籠會整傷鼠鼠鼻同下巴,又嘈,所以我養鼠一同佢熟就第一件事就係訓練佢呢樣:
試下教佢,我習慣見到鼠鼠咬籠既時候就會叫佢,用d好似鬧佢既語氣叫佢,多數佢會停一停,之後又咬過,咁就再鬧,佢一唔咬既時候,我就俾野佢食,慢慢佢會明白,唔咬就有野食.我試過好多次都會學得識,當然可能係要試好多好多次.

2)之後再可以訓練佢聽你話
其實呢樣係由同鼠鼠熟五步驟申延出唻,keep住同鼠鼠咁做,鼠鼠自然會愈唻愈聽你話,聽到你既聲or知你行近,就會訓緊都出唻睇下你
之前我有隻鼠試過走佬,半夜俾我見到佢在廳行緊路,我又未訓醒,就同佢講:"你出左唻邊個俾野你食呀!"(我都唔知做咩會同佢講野,而唔係捉住佢先),跟住佢就行返去籠邊,望住我,好似等我抱返佢入去咁(佢自己入唔返去),當然,唔係隻隻鼠都會咁,唔好亂試
我好多隻鼠都試過放出唻玩時會自己返入籠or乖乖地唔亂走,不過呢d我覺得熊仔鼠會較易做到

3)可以買迷宮去訓練鼠鼠
在實際情況下其實就冇咩用,學術研究會有用D,多數用唻測試鼠鼠既記憶力,但實際養鼠鼠唻講,就算鼠鼠識得點行迷宮,都唔代表識認路,而且你放鼠鼠出籠既話,十成十都係走左去
而且迷宮好少見到有得買,我只係見過一次,好似五百幾

倉鼠咬人係好正常,我都比倉鼠咬過啦,冇野既