新金魚缸啲水唔清唔白, 有乜解救 ?

你個問題要長答先會明：
１．魚缸水要清，必須要濾材有硝化細菌繁殖；佢地會將水中o既氮化物（如阿摩尼亞、硝酸鹽），呢ｄ氮化物來自魚o既屎尿。新開o既缸，濾材無硝化細菌，就當你花錢買菌水，都唔會夠。
你冇講你換水加入去o既水有冇除氯（用除氯劑或裝起過夜／打氣）。如果冇，咁愈換水愈衰。因為水中o既氯會殺菌，令本來已經少o既菌更打折扣。所以開缸初期應該係少魚少換水。
２．水呈青綠，有可能係出現綠水。呢個情況係因為水中太多營養，加上光線太足，引發綠小球藻大量繁殖。台灣叫做藻華，養魚戶會特登o係魚塘引發綠水，俾魚苗多ｄ食物，所以其實對魚係好事；只係人要睇魚就睇唔清楚。
你冇講你個缸有幾多水、放乜野位，有冇水草、施肥，燈有幾多火，所以只可以俾ｄ guideline 你：
．養陽性水草（生長快速、對肥、光都要求高o既草）的話，每升水用約一火燈，即係如果一個方缸三邊都係２０ｃｍ，咁水量係８Ｌ，你用o既燈應該係有８ｗ；而種陰性草（生長慢、對肥、光都要求低o既草）就可以減半都得
．草會吸水中氮化物作肥料，冇草的話氮化物要靠換水同過濾處理；處理唔到，氮化物就俾藻用左
．陽光照到的話，光量強，好似室外魚池一樣，好易爆藻（所以魚池一定用紫外光燈殺滅呢ｄ單細胞藻類）；燈o既火數過強，水接收到o既能量多，藻類自然容易出現
３．你要做o既治本o野：
＊減光：睇睇個缸會唔會有陽光照到（有就要搵o野遮或移缸），燈o既火數會唔會太大（簡單啦，換囉）；光照唔好長過十個鐘－－我地種草都係八至十個鐘咋
＊減肥（１）：肥來自水中剩餘o既食物、屎尿同植物肥料（或泥底，如果有的話）；魚唔駛日日餵，我隔日餵，每次分成少量咁落，一至兩分鐘食完，呢個係減低污染原o既方法
＊減肥（２）：魚多就焗住餵，餵得多屎尿又多；咁你會唔會太多魚？一升水最好養長一厘米o既魚（如上例o個個８Ｌ缸約可養３條米奇），缸愈細，愈唔應該超過呢個比例
＊清除水中養份：換水三日一次，每次三份一至一半水，以吸屎為主，加入o既水要除氯
＊加強過濾效能：過濾器水泵流量要夠（至少要等於魚缸水量六倍，所以要以水量決定用乜o野過濾器），濾材要以生物環為主，增加養菌量
治標方法：
減左光同肥先（大可停糧兩日，燈照時間減半），先換一半水，第二日再換一半，呢ｄ綠水已經大量稀釋，加上綠小球藻要o既繁殖條件大減，好快會改善到。
如果要更快有效，可以考慮藥，但呢ｄ藥對蝦螺等低等生物有害；亦可以用紫外光燈，但要接駁水泵，將水引入燈罩先得，又要用電。
樓上wanfukau 話綠藻「過度生長则令水質被綠藻覇佔空間，令魚兒無法自由活動」；須知綠水o個ｄ藻係單細胞植物，唔係一棵棵o既，如果要阻到魚游水，濃度都要芝麻糊咁先得。
gogogo.789gogo 君則話活性炭連紅油都脫到色，「區區壹缸綠水怎不可」。恐怕佢唔係養魚，係搞工業o既，以為你缸水係有o野甩色，而唔知呢ｄ係藻類。
灝灝 君話水過酸出現綠水，但其實點為之過酸？其實佢自己o係同一點度講o既「缸底留下剩餘魚糧及過多排泄物」先係主因。解決方法中佢話「加裝氣泵，增加魚缸氧氣量」；呢個亦無關係而打多左氣，亦唔會令藻少左。小球藻係植物，光合作用會放氧，如果藻多到成缸水綠色，佢放出o既氧都足夠成晚用（我個草缸冇打氣，都係十小時o既光照），怕魚缺氧亦唔成立。
（其他回答不值一提。）

2008-11-01 18:19:28 補充：
回應：

我指出o既係，過酸唔係綠水o既原因。請睇清楚。

打氣入水，極其量只係「綠水持續之下頂住先」o既做法；唔係解決綠水o既方法。

我缸魚落左清水晶后就清清了，使乜攪咁多野！

綠水好多時係人為疏忽所引起,
所以要留意下魚缸位置、水質等~
出現原因：
- 光線過於充足
魚缸放置於經常照射太陽的地方

- 水中含過量有機物，提供養份予藻類生長
e.g. 硝酸鹽及磷酸鹽等，造成此是由於餵糧過量、水草泥養份充足

- 氧氣不足，而二氧化碳則過多，造成水質優氧化
養魚量比魚缸所能容納的數目為多，令魚缸氧氣不足，而魚類數量多，呼出之二氧化碳同時增多
- 水質過酸
缸底留下剩餘魚糧及過多排泄物，令水質變酸，同時變差
解決方法：
- 魚缸應放於太陽照不到的地方
- 魚缸之光照時間約 8 - 12 小時已經足夠
- 餵飼魚糧為每天一次，每次所需以所有魚能於一分鐘內吃畢為準
- 減少魚缸飼養數量
- 經常清理底床殘垢
- 定期更換新水
- 使用良好的濾材以養活數量更多之硝化細菌
- 加裝氣泵，增加魚缸氧氣量

2008-10-28 23:22:12 補充：
唔建議用咁多化學品~
有更多唔會影響魚健康既方法可以做,
唔需要動用到化學品~

2008-10-29 10:40:42 補充：
活性碳作用係淨化水質.
對綠水起唔到作用,
而且出現綠水時,
好多人既缸其實都已經用左活性碳~

2008-10-30 19:33:56 補充：
仲有,
千奇唔好一換換全部水,
一黎d魚好難再適應所有新水,
二黎水溫有大差別,
換最多三分之二算啦,
日常換水就三分之一~
如果你要洗走缸中青苔,
就咁拎走d水再刷就ok~

而你換水就留最面果部分,
因為排泄物等好少會係水面,
多數沉底~

2008-10-31 19:20:16 補充：
水族用活性碳與工業用活性碳有大分別~
另外,
只係你講或係邊度邊度講,
唔係做呢d野既本人根本就唔知除左活性碳,
仲有冇落其他野,
又或者根本就唔係落活性碳~

另外,
d人係知道要換而且係有換,
但係水都仲係綠,
所以就算換左都唔會有改善~
仲有,
d人既活性碳可能用左一星期都係咁,
咁你又點解釋?一星期就要換?

2008-11-01 09:32:51 補充：
加裝氣泵，增加魚缸氧氣量係用黎解決氧氣不足，而二氧化碳則過多，造成水質優氧化呢個問題,而唔係水質過酸~

有冇試過活性炭.

要買日本嘅.

大陸貨雖然平.可双差十倍價錢.

我先頭Ｄ水如你一樣.不用數天.

就變綠色及看不清.

用活性炭后.

水可清徹到好似蒸溜水差不多.

切記要買日本貨.

大陸貨基本上.

用左好似冇用一樣。

2008-10-31 17:27:38 補充：
誰說活性炭不可脫去水中綠色.記起多年前世界油價並不如今天之高企時.香港油稅亦如今天的免稅.因非法集團有水位可走.時常有報導.新界破獲非法油站.手法係用活性炭張紅油脫色變為白油渣.要知紅色是為世上最難攪的顏色.紅色也可脫丟.區區壹缸綠水怎不可.

[活性碳作用係淨化水質.
對綠水起唔到作用,
而且出現綠水時,
好多人既缸其實都已經用左活性碳~]

因好多人沒有定期更換.壹般每1-2個月換壹次已可

養魚，處理水質非常重要，因魚缸內儲水有限！需然有過濾器幫助，但不境都是缸內循環之水。

綠水原因為魚缸擺放位置，陽光過份充足，而魚缸水受到太陽光合作用，會在水中生長綠藻，輕微則对魚有益，可作魚之糧食，但過度生長则令水質被綠藻覇佔空間，令魚兒無法自由活動。

應將魚缸移至陽光不能 '直照' 位置，但亦不可陰暗無光，因光線充裕能令魚兒生長健康。

另外防止綠藻亦有方法，可到水族店查詢防綠藻之药劑，水族店尚有清水劑出售。

方法：先换掉缸內綠水，然後洗淨綠藻殘漬，再注滿新鲜水，適當放入防綠藻 及清水 藥劑入水內，再放入食鹽(每加侖約一湯匙，可令水質穩定)，過濾及打氣過夜，隔日 後(24小時)，水質便可清淅 ，才放 魚入缸 。