我想問下倉鼠女同倉鼠男~大約要幾久要分開佢地～

樓上網友講既野唔同意,希望網友唔好介意及留意一下:1)小灰霸戒奶已經有成熟既性器官,已有生育既能力,鼠鼠60日,已經係完全成熟期,絕對唔會係4-6個月大既
2)就算係兄弟姊妹,父母子女,都會有交配既可能,不過當然唔好,亂倫係有機會做成畸胎
3)鼠鼠發情期大約係4-5日,其中既4-12小時,所以最快既情況下,4,5日已經足以懷孕
4)小灰霸既懷孕期係19-22日,唔會話個幾月先生得既

A.兩隻鼠已經有打交既問題,仲堅持繁殖,實在好危險,就算冇打傷打死,都易因感到壓力而生病,所以最好分籠,同時要多d檢查鼠鼠身體及排泄物有冇異常,一有問題就盡快處理
鼠鼠平日都會叫,但因為音頻唔同,所以平日既叫人係唔會聽到.而當鼠鼠叫到人都聽到既時候,多數因為驚同痛苦,即係可能係打交,有病就會叫
唔知點解要繁殖鼠鼠呢?鼠鼠生bb到戒奶(21日大)都唔可以掂鼠b,到可以掂鼠b既時候,已經同鼠店買到既鼠差不多大了,呢段時間仲唔洗得籠,唔打擾得鼠鼠,會好臭呢
我覺得喜歡鼠鼠應該尊重鼠鼠獨居既天性,一對鼠如果不斷繁殖,一胎生2-10隻,就算只生一次,都可以兩隻變十隻,要諗真係咪有時間同地方去照顧鼠b?

B.如果真係咁堅持繁殖(絕對不贊成),可留意返小灰霸既懷孕期係19-22日,在19日前已經需要將佢地分開
到鼠鼠生左bb之後要留意以下幾點:
1)將鼠爸及其他鼠分開
2)唔好接近個籠,唔好掂鼠媽媽同bb,盡量等到鼠bb戒奶後先洗籠(大約21日戒奶)
3)用奶粉沖d奶代替水俾鼠媽媽飲,記得唔好俾鮮奶,唔係會令鼠鼠肚唔舒服既
4)放定好大量既食物入去,之後換食物換奶都要小心唔好俾鼠媽媽發現,到鼠bb識行之後,食物就要整碎d,唔係bb食唔到/食左落去吞唔到就大件事.
5)唔可以將鼠bb同媽媽分開,唔係bb就冇野食,生存唔到.我細個既時候,有人教我用手餵bb飲奶,但咁係唔可行既.
6)另外,如果用既籠係通風,bb可能會趺出唻,可以用d膠file整開包住個籠,但記得要整多d小孔,唔係就冇空氣

唔理鼠bb or 鼠bb被食有幾個原因:
1)如果鼠媽媽覺得bb有危險-媽媽會食左bb/收埋bb入腮,令鼠bb缺氧,都會食bb
2)鼠媽媽覺得bb養唔大-鼠bb身體弱 or 自己冇足夠既奶分俾佢地
3)鼠媽媽覺得bb有第d動物氣味
4)鼠媽媽情緒太緊張-有第隻鼠在場,有外來環境令佢緊張,有人打擾佢,甚至只係因為生育而情緒緊張
5)鼠bb死左
6)鼠爸爸對bb根本冇咩感情,所以如果生之前冇將鼠爸分開籠,爸爸就有機會會食bb,而鼠媽媽感到威脅,都會唔理鼠bb

其實鼠鼠最好分籠,繁殖鼠鼠會有好多問題,希望你之後可以考慮唔好繁殖鼠鼠,我自己一籠一鼠左好耐,鼠鼠身體都好D,唔會被打,又少受驚,我既鼠多數都係老死OR年老腫瘤而死(當然配合返唔亂食野,同適當地對鼠鼠啦),建議分籠原因如下:
1)倉鼠天生根本就係獨居動物,根本唔適合群居,就算兄弟姊妹,同性別or唔同性別,都一樣可以打到死晒.睇書知道,外國既鼠鼠繁殖場都係一籠放一隻鼠,到發情期先放埋一齊一陣既
2)鼠鼠既繁殖速度好快,而且繁殖鼠鼠有好多問題(例如鼠媽媽有機會會食bb,bb未戒奶就打交但又唔分開得),就算樣樣都解決到,都會令鼠鼠既生活質素下降,鼠媽媽生育後壽命又會縮短(甚至難產),好多隻鼠又會有第d問題,所以真係唔好俾鼠鼠生bb呢
3)可能你會話鼠店既鼠咁多隻一齊都冇事,但鼠店既鼠仲好細,所以唔會打得好犀利,而且你睇到鼠店既鼠既時間都未到深夜,唔係鼠鼠最活躍既時候,所以未必俾你見到有咩問題.但我曾經見過,鼠店一堆鼠入面,有隻鼠已經得返d白骨...所以鼠店講既野,,唔好盡信,鼠店有鼠死左都唔會俾客人知呢
4) 就算兩隻鼠初初唔打交,其實之後都好易再打,特別係鼠鼠夜晚活動既多,半夜打起上唻,你又唔知既時候,仲危險.我細個既時候都試過覺得2隻鼠好似好fd咁放埋一齊,同一胎,我出去一陣返唻就打死晒啦
5)就算唔打傷打死,都會感到壓力,壓力會誘發甩毛肚瀉等疾病
6)一籠唔止一鼠,仲會較惡,特別易咬人同比較難同主人熟
7)可能會諗鼠鼠會怕悶,但其實鼠鼠天生獨來獨往,只要有足夠既空間同運動(一個轉輪都ok啦),鼠鼠就唔會悶

你買果兩隻鼠而家幾大既先?
倉鼠通常4-6個月大先會識生BB.
你果兩隻係咪同1個阿媽生架?
佢地係同1個阿媽生既未必會搞架=3=
我之前有1對黑白兄妹住埋1齊年幾都唔搞野.
如果你個兩隻係成年倉鼠+唔係同1個阿媽既話.
放佢地1齊.睇下佢地間中有冇打下交.隻仔既有冇成日追住隻女既.
有既就想生啦.
一般放1齊1星期 / 7-9日就OK架啦.
倉鼠要大肚 1個幾月先會生得.