✔ 最佳答案
樓主係航天版係想問噴射引擎定係火箭引擎﹖點都好，我兩款引擎既原理都講下。
先講噴射引擎。佢既原理好簡單，首先個引擎會從前方吸入空氣，入左去引擎既空氣會經過一系列既壓縮機而被壓縮，之後呢啲高壓高密度空氣會進入燃燒室，同噴入黎既燃料混合，然後啲混合空氣被點燃，令啲氣體急速膨脹幾百倍。因燃燒室空間有限，所以膨脹既空氣惟有向引擎既後方高速流去，最後經噴嘴噴出。空氣係噴出時，會產生一個同高溫氣體流動方向相反既力推動飛機前進。係高溫氣體流出噴嘴前，佢會推動一塊渦輪葉片，塊葉片會帶動引擎前既風扇吸入空氣，繼續以上既循環。
至於火箭引擎同噴射引擎則有部份相似。不過火箭引擎唔吸空氣，佢會自己帶埋氧化劑作為氧氣既來源，啲氧化劑直接進入燃燒室同燃料混合燃燒，之後既過程同噴射引擎大同小異。高溫氣體向後噴出，產生一個相反既力推動火箭前進。因為火箭唔吸空氣，所以佢可以係無空氣既大空飛行，但裝備噴射引擎既普通飛機就唔得。
2008-10-17 19:33:17 補充：
樓主好細心喎！你既疑問完全中point。你既補充問題牽涉到一啲更深入既噴射引擎結構，如果樓主想知，小弟亦唔怕講多啲。不過，首先澄清一個概念，所謂既“飛機引擎”即係“噴射引擎”，兩者係同一樣野。
2008-10-17 19:35:29 補充：
首先解釋係引擎後方既渦輪同係引擎前方既風扇之間既關係。兩者雖然係一前一後，但無錯兩者係由一條軸連接起來。所以當高溫空氣流過渦輪時，就會帶動引擎前既風扇吸氣。但係風扇後面既壓縮機又點呢﹖
2008-10-17 19:40:00 補充：
其實所有噴射引擎既壓縮機都唔只一個，通常都會分為兩段，即係前段既低壓壓縮機及後段既高壓壓縮機。而兩段壓縮機各自又細分為幾個，一般依家軍用噴射引擎共有九個壓縮機，我記得多數係前六個係低壓，後三個係高壓(實情還望高人指正)。每個壓縮機都係一塊扇葉，根據葉片不同既長度及密度造成不同既增壓比，佢地既目的係將普通空氣逐漸壓縮到可以係燃燒室同燃料充份混合。
2008-10-17 19:45:12 補充：
以前既噴射引擎較簡單，而同係未有渦輪風扇噴射引擎之前(即係無你成日係客機引擎見到嗰把大風扇)，所有壓縮機及渦輪都連接係一條軸上。但咁樣有一個問題，因為所有壓縮機同渦輪因係同一條軸上，令佢地轉速一樣，咁樣就造成低效率既問題。因為高壓壓縮機係應該要轉快啲去更有效咁壓縮空氣，所以就有人唸到，咁成個引擎一齊轉快啲，就晒高壓壓縮機咪得囉﹖
2008-10-17 19:56:46 補充：
呢條橋初頭都ok，但後來就發覺唔店，因為咁會造成嚴重既引擎喘震既問題。呢個問題係源於低壓壓縮機既扇葉長過高壓壓縮機唔少，而且流過低壓機既空氣密度比流過高壓機既空氣密度低好多。如果兩級壓縮機用同一速度轉，高壓機附近空氣密度大好多，啲空氣會好貼服咁流過葉片，而且高壓機既葉片較短，強度亦大啲，所以無咁易係轉既時候“發”來“發”去。但低壓機就唔同，條葉片長得多，轉得快會比高壓機既葉片“發”得嚴重好多，而低壓機附近既空氣密度亦低，空氣流過既時候無咁貼服。
2008-10-17 20:05:08 補充：
但仲有一個嚴重問題。就係低壓機唔可以無限制咁加大轉速，除左上述既原因之外，更重要既係當低壓機既葉片愈來愈快，會快到一個地步個低壓機無辦法再加大流過空氣既流速及密度，咁塊低壓機葉片就會好似機翼咁進入失速狀態。呢樣野就大鑊啦，因為如果低壓機葉片失速，無辦法將空氣壓縮到預計既密度，咁連帶埋後面既高壓機都有可能失速，呢樣野隨時令進入燃燒室同燃料混合既空氣唔夠而令成個引擎停俥，咁個引擎就會係空中熄火(Topgun入面Maverick&Goose架F-14出事都係源於類似既原因)。所以噴射引擎設計者就面對一個兩難，架機轉得慢就效率低，轉得快就隨時令引擎熄火。
2008-10-17 20:08:24 補充：
解決既辦法得一個，就係將由風扇至渦輪既一系列葉片安裝係唔同既軸上。現代噴射引擎通常都將風扇、低壓壓縮機及後面既渦輪裝係一個軸上，而高壓壓縮機就裝係另一條軸上。有一條軸會套住另一條軸，令佢地成為兩個同心圓柱體，兩條軸既轉速唔同，咁就大致解決上面既兩難。
2008-10-17 20:10:02 補充：
後來有人將低壓壓縮機又獨立裝係第三條軸上，令個引擎有三條同心圓軸，但呢個引擎太複雜，始終唔流行，最終依家既主流噴射引擎都係上述既兩軸式。
