大妗姐可否找長輩做?

首先講講點為之大妗姐先, 然後再解答吓你嘅問題.

大妗姐喺古時由女家僱來伺候新娘的臨時幫手, 以前多數係搵啲自梳女或在大戶人家中嘅馬姐做, 佢嘅責任係幫新娘做助理, 好似同新娘打扮, 帶花轎去新郎家, 揹住新娘過火盤, 帶領新娘同向老爺奶奶跪茶, 揭頭掛, 還有鋪床與撒果子的儀式(即是幫新娘新郎整定啲床鋪, 同埋放嗰乜嘢蓮子响床嗰啲), 第日起身替新娘新郎開門, 幫手拜祖先,幫新娘煮埋第一餐飯先叫做完工.

咁現今當然好難再搵到自梳女或者馬姐啦, 所以而家都係握搵女性嘅親戚朋友幫手就得, 情理上係由女家自己請人幫手, 但現今邊個請都冇所謂, 反正現在好多都係新娘新郎自己攪惦一切, 就算係請摩登大妗姐都係後生自己搵人攪惦. 我覺得由女家嘅親戚做比較好啲, 如果由男家派人過去; 好似唔係幾好睇, 因為大妗正路係幫助女家代表新娘做得好好睇睇, 所以由女家嘅親戚做比較合情理.

其實冇乜所謂請唔請大妗, 只要當日有個口齒伶俐，提示新娘應付各種難題, 帶領奉茶及講好說話就得.

希望幫到你.

2008-10-15 03:39:19 補充：
撐起紅傘護著新娘嘅當然係大妗姐. 以前新郎係唔駛去接新娘嘅, 所保護新娘仍然係大妗嘅責任.

其實以上兩位都已經解釋得好詳細，我只係講我既經驗你知
我結婚果時，我呀妹做伴娘，佢就要幫手奉茶同撐紅傘。不過因為佢都未做過，所以講吉利說話都係由旁邊既長輩同攝影師哥哥代勞，佢地會好主動，所以冇需擔心
之後我既女性朋友結婚，佢搵我幫手做奉茶。原因係男家話要搵個有父母，結左婚仲要生過"仔"既人做，咁岩我係佢好朋友，又符合晒佢要求，所以我就幫手。好好采我朋友而家真係生左個仔，哈哈，感覺自己都真係有d作用~
我奉茶果時都冇咩點講吉利說話，因為攝影哥哥係我未講既時候已經好主動咁講左喇，可能佢見我後生所以幫我講埋
本來我會撐傘，但係因為撐傘果個要同新娘一齊坐車，所以就交左比伴娘做喇
其實真係冇話搵邊個既，當然係女家既人好d啦，同埋最緊要係老人家同長輩有冇要求，因為始終大姈姐呢個位置係要好意頭，所以通常都係搵d有福氣既，有五代同堂既就最吉利喇~

安伯話：<大妗姐>呢個行業已經式微。

以前係專業人士，唔係普通人做得掂，曾見識過幾位，佢地好醒目，熟悉全程禮儀，照顧新娘無微不至，又識講好意頭話，仲要唸詩，佩服佩服！不過最近十年都無見過，應該退休了。

前幾年曾出現一批麼登大妗姐，不過好似無接班人。

現時做法，新娘出門時, 會由伴娘來撐起紅傘護著新娘，好少見會麻煩的長輩(伴郎強烈要求？哈哈！)。其餘拋米由姊妹做。

敬茶禮儀時,帶領奉茶及講好說話工作漸漸轉移到攝影師頂上，做埋大妗個份。