喂人奶要准備D乜？（急，仲有几日預產期啦）

HI
奶樽都要買2個黎飲水ge
食人奶jei,都要飲水ga
買奶嘴要買d彷乳頭型狀
專比食人奶bb用
同埋'bom'奶器
要買幾盒乳墊,一盒有20塊
我每次餵奶都會換一塊
衛生d麻
餵奶前用綿花濕少少水
抹一抹個乳頭先比bb食
同埋餵奶之前'針'定杯水係身邊
因為餵奶其間,一飲水就會即刻好多奶出
飲多d魚湯,鮮奶都好有幫助

你係諗住埋身餵定泵出黎?埋身餵就唔駛買奶樽啦!
最好買定兩個餵奶胸圍,吉之島同千色都有得賣,
幾十蚊一個唔係好貴,記得要買冇鐵線既,
有d樓上鋪都會有賣,不過未必有得試,
乳墊就一定要買,我用就開pigeon,貼得穩又透氣,
貪方便唔戴bra真接貼o係衫度都ok,一盒80pads大約90蚊左右,
如果你想夜晚休息多d,要搵人幫手餵,就要買奶泵&奶樽,
6個奶樽都應該夠用,奶泵就買電動既方便d,
我用pigeon就覺得幾好,易控制又易清潔,
2百幾蚊一個價錢公道,至於奶樽消毒器我覺得唔係必需,
用個普通大煲黎煲d奶樽都已經ok!
宜家有d揹帶係可以餵奶用,好似d印傭用o個隻揹帶咁,
出街就唔駛搵地方餵奶,只要有得坐就可以隨時隨地餵奶啦!
o係d樓上鋪會搵到,大約2-3百蚊度!

仲有樣好緊要既,就係你同你老公都要了解母乳餵哺既好處,
你上香港母乳育嬰協會網址會幫到你!

如果你係餵人奶既話，就唔使用奶樽住，除非你唔係埋身餵，咁就要泵奶機同奶樽。泵奶機有分手動同電動，吉之島、荷花、永安、屈臣氏、萬寧都會有得買。奶樽既話，一般正常size既奶樽都岩吸落個泵奶機到既，要買既話可以買定半打，若果真係趕唔切既話，有兩個細size (4安) 既足夠，不過就要洗得密d
另外，餵人奶既話，多數都會有漏奶既情況出現，為免整到d衫都濕晒，有轞介既場面出現，多數都要用乳墊 (即係樓上所講既胸墊) ，放係胸同bra中間，吸走湛出黎既乳液。不過有閎咁岩真係冇既話，都可以用tempo頂住先既，不過就唔可以頂得耐，因為張紙巾會濕得濟黏住乳頭，搞到好難清潔
餵人奶既專用胸圍就要睇下你有冇需要同有冇金錢喇，因為都唔係必備既，呢d胸圍係方便你餵奶時候唔使成個"拿"起或者成個除落黎，方便就真係方便，不過都幾貴，所以有錢多就買啦。如果成日都係自己一個係屋企，又或者你唔介意就咁抽起一邊胸圍黎餵奶既話，咁就可以慳番呢筆錢
仲有其他又係唔必需既用品，例如乳頭損左之後搽既cream，專為餵人奶而設既抹乳房&乳頭消毒濕紙巾等等，都係有錢多就可以買

要幾個餵人奶既胸圍, 因為會方便餵奶,
頭一個月唔可以用有鋼線果d,
第二三個月可以開始用番有鋼線既,
之前無既就用黎訓覺著.
仲要買幾對胸墊, 因為會流奶,
最好買d貴少少既, 因為餵完奶放番個墊上去之後,
下次餵個墊會黏住個乳頭, 好痛嫁!
新出有d唔會黏住, 到時你問下d sales啦!

以我所知就 "荷花" 同 "OIO" 都有得賣啦!
你洗唔洗返工, 同係唔係長期餵人奶?
如果長餵既就唔洗咁多奶樽, 一合6~8個果d就夠啦!
最好買多個吸奶器, 就算你要返工, 都可以吸定出黎,
或者有時bb唔肯食奶, 食唔晒, 谷奶既時候都可以吸出黎, 留番下餐食.
記得仲要買個奶煲wo~
吉之島有d一套買, 有奶樽, 電奶煲, 仲有洗奶樽刷嫁!!! 好平嫁!!!

如果你唔多出街既都係咁多野, 多出既就買多條圍巾,
出到街無育嬰室都可以圍住黎餵奶呀ma,
唔通要亞B入洗手間食咩, 我自己都係咁嫁!!!