見工有人叫你介紹自己時, 應該講什麼？

最常是用來考你的英文，因為這條問題多數要用英文作答，既然這樣，答的內容便不是太重要，重要的是你表現出來的英文水準。英文好便掂，英文不好就爭啲。
如果用中文作答，我也試過，但比例很少，如果遇到我會覺得是送的，因為很容易應付，而且講嘅內容全憑自己控制，佢challenge嘅機會會比大部份問題少，因此面試時見到有呢條問題會很開心，因為起碼其中一條已經易答了，而且通常呢條都係第一條，我可以利用呢條喺整個inteview攞多啲主動權。當然如果要用英文答會驚啲，但都仍然係比較易嘅一條題目。
我見工前一般會因應工種，預先諗定佢會問嘅問題，同時諗埋一個佢會啱聽嘅答案，介紹自己由於係一條極熱門題目，每次我都會諗。
我會用中文諗定一編預定講兩分半至三分鐘嘅中文腹稿，頭三句會講我嘅出身，由於我喺大陸出世，我會講我幾歲先嚟香港，順便便sell埋我識講純正普通話。就算你冇我呢啲background，頭三句講吓自己幾多歳，同屋企人住/自己住都實冇壞，呢啲廢話有助你喺呢個問題嘅初段以至呢個interview嘅初段令自己個心定啲。
跟住我會用三四句講我讀乜野大學，主修乜野，強調吓自己嘅學歷。但當然如果你連diploma都冇，就skip左呢段，費事自暴其短，反正呢段作用不大。
真正嘅精華其實就係喺頭先講自己出身同學歷之後，我會馬上講我嘅工作經驗，重點講最近嘅工作同跟要in嘅post相關嘅工作經驗。如果你冇乜工作經驗都唔使怕，因為跟住就會講自己嘅未來career path，講自己嘅抱負，可以係作，但一定要跟你目前in嘅post相關，例如，你in售貨員，你可以話你覺得佢提供嘅呢份工係大公司，會有晉升機會，而且假期多，放工時間又早，可以利用晚間時間讀個bba等。記住字裡行間要強調呢啲係自己嘅抱負，咁佢就唔會話你離題。
你講埋呢啲野，已經好容易過三分鐘。應付左條問題，但呢個都係其次，最重要係後段呢part提及自己嘅職場展望，呢樣係佢喺面試時一定會問你嘅野(無論係開門見山定係旁敲側擊)，但你喺第一條問題已經自己講左出嚟，呢個主動權非同小可。一啲好相遇嘅interviewer(我見過)，可能會就咁因應你呢段野問落去，咁成個interview嘅主動權就落左落我度，見成工嘅機會極大。就算個面試官冇咁笨，你咁答亦表現出你嘅得體、成熟，同答道佢想知嘅野，喺其後嘅面試過程中，唔好唔少都仲攞到啲主動權同分數。
諗完中文腹稿，咁就翻譯成英文，寫落張紙度，背熟佢。練習時睇埋個錶，唔會太長或太短即可。

好好