香港那個渡假營最好?

小弟係做學生時都去過唔少地方宿營，所以可以講唔少野。

我覺得香港既渡假營可以分兩類，一類係好大好有規模，咩設施都有既綜合營，另一類係設施有限既中小營。綜合營通常由政府或大慈善機構興建，啲設施齊全同埋靚到你唔信。

我覺得最好玩既政府大綜合營係麥理浩夫人渡假村，嗰度有最當見既繩網、攀石牆、射箭場等。最正既係嗰度依家啱啱起好左一個有全港最大天文望遠鏡既天文台，遲啲會開放比公眾玩。嗰度睇星超正，如果好彩，可能見到銀河。而嗰度住亦唔錯。

另外一個好玩既政府營係鯉魚門公園渡假村。嗰度以前係軍營，入面勁大，亦係咩都有得玩，仲要有草地足球場比人踼波！而且嗰度啲營舍係百幾年前既維多利亞式建築風格，好有格調。不過嗰度經常要上山落山，週圍去玩都跑都你索氣。

政府既黃宜洲渡假營亦值得講下。嗰度又係一個咩都有既營地，無咩特別，但佢最過癮既係嗰度係一個島，成個島都係營地，要走一定要搭船。

講到渡假營，保良局嗰啲簡直就一流。我玩過最好玩既係北潭涌渡假營，設施齊全唔駛講，又有單車踩，而且營舍係間間獨立屋，不過小弟嗰次玩日營無住到。最正既係嗰度出面有條河好靚，離開營地行遠十幾分鐘又夠黑可以睇星。大棠渡假營係元朗，我去嗰陣時啱啱開左無幾耐，無咩玩，但聽聞依家勁正。而嗰度既營舍又係獨立屋，今次我有住，發覺好靚好舒服。而且保良局兩個渡假營啲野都幾好食。

中小營通常都係啲無咁有錢同無咁出名既慈善機構搞，當然就無大營咁多野玩，但如果你係自己有function而唔係特登走入去玩佢啲設施就無咩所謂，否則就可以好悶。我因不同原因去左3次保良局北潭涌營對面嗰個白普理營。個營其實好細，仲要依山而建，無咩玩，不過個營其實主要係比人入去睇星，所以如果係去睇星就唔錯。要入去個營要由大路經一條又窄又長既路，係嗰度玩唔開電筒既夜行就最過癮。

大埔有一個洞梓童軍中心。唔一定係童軍先去得嗰度，普通人都入得去玩，不過其實嗰度就無咩玩，而且又係由一條私家路入去，都幾麻煩，我唔係咁建議去。

有幾個營小弟未去過，但因為聽太多傳聞，所以想講下。長洲有愛暉同明暉營，去嗰度主要係睇星，我問過朋友，佢地話嗰度唔錯，不過唔係太多野玩。曹公潭戶外康樂中心係荃灣，係正可觀天文中心隔離。啲人話呢個營好得意，全個“營”其實係一幢大樓，食、住、玩都係晒座樓入面，聽聞唔係幾好玩。政府係西貢開左個西頁戶外康樂中心，好似話入面咩都有得玩，而我聽到既意見都係有口皆碑，值得去下。烏溪沙有一個渡假營，唔知邊個攪既，我以前聽有個長輩話幾十年前嗰度極靚，但聽番年輕啲既朋友講話依家附近既馬鞍山起晒樓，入去玩又唔覺真係靚得咁緊要，不過佢地話入面都有唔少野玩，所以值得一遊。

有趣補充：
steventtw20大師所言的烏溪沙有個渡假營，實為烏溪沙青年旅舍。現因馬鞍山發展不少以致該處失去近郊的引象。
該處最獨特的地方就是經常被電視台租用作外景場地，包括被當作為醫院、大學、甚至軍營；近期著名的「巾幗梟雄之義海豪情」亦有在此視作療養所。

2011-11-14 16:45:29 補充：
噢，原來己改名為烏溪沙青年新村：
為http://www.ymca.org.hk/big5/index.php?c=88&t=1

另，以下為證據：
http://kkground.blogspot.com/2011/07/blog-post_31.html