✔ 最佳答案
聖誕節都係一個節日姐,唔駛一定要有節日氣氛,樓主想去邊都無所謂。不過埃及係回教國家中既大阿哥,所以絕對唔會慶祝聖誕節,你係嗰度絕對唔會有任何聖誕氣氛。小弟都係同樓主一樣,我係2006年聖誕節去過埃及旅行,可以比一啲意見樓主。
先講天氣問題。令人驚奇既係,埃及既冬天以香港人既標準來講非常寒冷,小弟全程都必須著上僅有既一條長褲及披上薄薄既風褸,但仍不夠禦寒。小弟係行程最後一日於開羅大市集外圍坐低休息,即使當時已經係早上10:30,陽光普照,但小弟仍肯定嗰度既氣溫最多只有攝氏10度左右,而且全程氣溫超過二十五度既時間極少。所以樓主如果係冬天到埃及,你必須帶足夠既禦寒衣物,但應該唔駛帶羽絨。
雖然樓主有三位壯男咁多,但我仍然唔建議你地自由行。因為雖然埃及唔算危險,但前排先至有11個歐洲遊客比人綁架左,好彩佢地後尾被放番無事,但始終都係令人擔心。而且埃及人一般都幾貪小便宜,咩都向你收小費,雖然你可以唔比,但有啲情況好難脫身(例如於吉薩金字塔附近騎駱駝),如有旅行社導遊及領隊安排就完全唔會有問題。另外由於埃及係阿拉伯國家,有啲禁忌需要特別留意(例如唔好同當地女性影相),如果不幸犯上,當地導遊及領隊絕對係你既救命恩人。仲有,去埃及唔同景點要有軍警護送(convoy),而呢啲都要旅行團才可辦到,所以閣下最好都係參加旅行團為妙。另外,埃及既旅遊景點好分散,有統一既交通安排會方便好多。而且一般旅行社搞既團已經包晒所有最典型既景點,吉薩金字塔、獅身人面像就唔駛講一定包,而所有香港出發既埃及團都一定會去帝王谷、女王大殿、卡納克神廟、伊芺神廟、洪加達、亞斯旺及阿布辛貝神廟,另外通常仲會包一次尼羅河船河。上述既所有景點已經係埃及最好睇既野,好大機會比你自遊行去既地方多。除非你同小弟一樣係埃及迷,係都想去埋階梯金字塔、帝后谷、紅金字塔及費萊神廟,否則你跟團已經行到你嘔。